“Ämi oupwe sense.” (Ipru 5:12) Anchangei mwo! Jiowa, ewe Sense mi múrinné seni meinisin lón unuselapen láng me fénúfan, a etiwakich ach sipwe asukula ngeni ekkewe ekkóch usun i! Ese lifilifil ika sia asukula ewe enlet usun Jiowa lón famili, lón mwichefel, are lón ewe angangen afalafal, iei eú angang mi aúchea me eú wis mi chou. Ifa usun sipwe sópwéch lón ei angang?

Pélúwen ena kapas eis a nóm lón makkeien aposel Paulus ei ngeni Timoty: “Kopwe likitü lon om aleani ekewe Toropwe mi Pin ngeni ekewe souläng, kopwe afalafaleer usun o asukula ngeniir.” Paulus a pwal apasa: “Are kopwe föri iei usun, kopwe püsin amanauok me chokewe mi aüselingok.” (1 Tim. 4:13, 16) Ewe pwóróus ka afalafala a tongeni amanawa aramas. Iwe, a fókkun lamot óm kopwe achocho le ámúrinnééló óm állea me asukul. Ei brochure a ffér lón napanap epwe álisuk le féri ena. Ikkeei fitu masouan.

Jiowa i ewe “Soukait” mi Lapalap. (Ais. 30:20) Inaamwo ika ei brochure epwe álisuk le lipwákéchúló lón óm tufichin állea me asukul, nge kosap ménúki pwe Jiowa i ewe Populapen ewe pwóróus sia uwei me a wisen lukeato aramas. (Joh. 6:44) Iwe, tittingor lón iótek ewe manaman mi fel. Kopwe néúnéú án Kot we Kapas iteitan. Álisi ewe chón aúseling ngonuk an epwe nefótófót wóón Jiowa, nge esap wóóm. Achocho le fótukalong lón letipan an epwe fókkun tongei i.

Ka ketiw le asukula ewe pwóróus mi lamot seni meinisin mi kawor ngeni aramas. Aua silei pwe ika ka lúkúlúk wóón ewe ‘pöchökül Kot epwe ngonuk,’ ka tongeni sópwéch.​—1 Pet. 4:11.

Seni chiechiom kewe chón asukul,

Mwichen Soupwúngúpwúng án Chón Pwáraatá Jiowa