LUPWEN ekkewe aramas wóón fénúfan ra chómmóngóló, lap ngeniir ra féri minne mi ngaw usun chék Kain. Nge a sókkóló emén mwán me leir. Iei i ewe mwán itan Enok. Átena mi pwora. Inaamwo ika ekkewe aramas ra féri mettóch mi fókkun ngaw, nge Enok a chúen angang ngeni Kot.

Ka silei ika met popun ekkewe aramas lón ena fansoun ra chék féri minne mi ngaw? Iwe, ekieki mwo, Ié we a amwékútú Atam me Efa ar repwe álleasolapa Kot me pwal ocheei ewe féún irá Kot a ereniir ar resap ocheei? Ewer, emén chónláng mi ngaw. Ewe Paipel a eita ngeni Satan. Iwe, a sótuni aramas meinisin ar repwe féri minne mi ngaw.

Eú rán, Jiowa Kot a ewisa ngeni Enok an epwe ereni aramas eú mettóch resap mochen aúseling ngeni. Iei ewe pwóróus: ‘Eú rán, Kot epwe nieló ekkewe aramas mi ngaw meinisin.’ Ese mwáál ei pwóróus epwe asonga ekkewe aramas ika ra rongorong. Eli, ra pwal sótuni le nieló Enok. Iwe, mi lamot ngeni Enok an epwe fókkun pwora le ereni ekkewe aramas minne Kot epwe féri.

Kot ese mut ngeni Enok an epwe nomottam lein ekkewe aramas mi ngaw. A chék tori 365 ierin Enok. Pwata sia erá “365 ier chék”? Pún aramas lón ena fansoun ra mmen péchékkúl lap senikich ikenái me pwal manawattam. Iwe, néún Enok we itan Metusala a tori 969 ierin!

Iwe, mwirin án Enok a máló, napanapen ekkewe aramas a fókkun ngawóló. Paipel a erá pwe ‘ekiekin letipen ekkewe aramas mi chék ngaw fansoun meinisin’ me pwal ‘ewe fénúfan a ur ren féffér mi efeiengaw.’

Ka silei eú me lein ekkewe popun an a wor chómmóng fitikoko wóón fénúfan lón ena fansoun? Pún Satan a áeá pwal eú mettóch ren an epwe amwékútú aramas ar repwe féri minne mi ngaw. Sipwele káé usun ena mettóch.