A LULÓ chómmóng ier. Néún Noa kewe át ra oupwatiw chómmóng. Iwe, néúr kewe semirit ra wattetá, ra pwal néúnatiw chómmóng. Iwe, ekiseló, a fókkun chómmóng aramas wóón unusen fénúfan. Meinisin aramas lón ena fansoun ra chék eáni eú fós.

Emén me lein mwirimwirin Noa kana, itan Nimrot. I emén mwán mi ngaw pún a sou nieló aramas me man. Nimrot a pwal pwisin seikaatá an epwe wiseni wisen king ren an epwe nemeni ekkewe aramas. Kot ese sani Nimrot.

Nimrot a mochen epwe ochufengeniir ren an epwe tongeni nemeniir. Iwe, ka silei met a féri? A ereni ekkewe aramas ar repwe féri eú telinimw me aúetá eú imw mi watte mi tekia. Nengeni pwe ra ffér plak me lón ei lios.

Jiowa Kot ese fókkun pwapwa ren ei imw. A mochen pwe ekkewe aramas repwe parasfeil me nónnóm wóón unusen fénúfan. Nge ekkewe aramas ra apasa: ‘Ou feito! Sipwe féri eú telinimw me aúetá eú imw mi watte mi tekia, ungan epwe tori fán láng. Iwe, kich sipwe fókkun iteféúló!’ Ekkeei aramas ra mochen repwe elingaaló pwisin iir, nge esap Kot.

Iwe, Kot a aúkaló ekkewe aramas seni ar aúetá ewe imw mi tekia. Ka silei met a féri? Ese rúng mwo nge Kot a féri och mettóch pwe ekkewe aramas repwe kapas lón sókkópaten fós, nge esap chúen eú chék fós. Iwe, ekkewe chón kaú imw rese chúen tongeni wewe lefiler. Iei popun, ewe telinimw a iteni Papel ika Papilon, a wewe ngeni “Fitikoko.”

Ekkewe aramas iei ra feil seni Papilon. Ekkewe mwichen aramas mi eáni eú chék fós ra nomfengen lón eú leeni wóón fénúfan.