EN MI silei ié ei fefin lón ei lios? Iten neminnei Repeka. Iei i ewe mwán Isaak, Repeka epwele chuuri. Epwe wiliti pwúlúwan we. Ifa usun a fis ei?

Iwe, Apraham, semen Isaak we a mochen pwe Isaak epwe pwúlúweni emén fefin mi múrinné. I ese mochen pwe Isaak epwe pwúlúweni emén me lein ekkewe fin Kanaan pún ekkewe chón Kanaan ra fel ngeni kot chofona. Iwe Apraham a kéri néún we chón angang, iwe a ereni: ‘Ua mochen óm kopwe feiló ren ia ra nóm ie me lón Haran aramasei kewe, iwe kopwe kút pwúlúwen nei we Isaak.’

Iwe mwittir chék, néún Apraham we chón angang a angei 10 kamel, iwe a poputááni an sáittam. Lupwen a arapakkan ngeni ewe leeni ikewe ie aramasen Apraham kewe ra nónnóm ie, a kaúló únúkkún eú ito. A fen lekuniol, ina ewe atun ekkewe fefin seni ewe telinimw repwele feito úfi konik seni lón ewe ito. Iwe, néún Apraham we chón angang a iótek ngeni Jiowa: ‘Amwo itá ewe fefin mi aúnúei konik me pwal aúnú ekkewe kamel epwe ewe emén ka filatá an epwe wiliti pwúlúwen Isaak.’

Iwe, Repeka a feito an epwe úfi och konik. Lupwen ewe chón angang a tingorei och konik, a ngeni. Iwe, a pwal úfi konik fán iten meinisin ekkewe kamel mi kaka. Ina eú angang mi weires pún ekkewe kamel ra kan únnúmmong konik.

Iwe, lupwen Repeka a áwesaaló an angang, néún Apraham we chón angang a eisini iten seman we. A pwal tingorei an epwe annutoló lón imwer we. Repeka a apasa: ‘Iten semei we Petuel, iwe mei wor leeniom rem.’ Néún Apraham we chón angang a silei pwe Petuel, i néún pwiin Apraham we itan Nahor. Iwe, a fótopukutiw le iótekin kilisou ngeni Jiowa ren an emmweni ngeni aramasen Apraham kewe.

Lón ena pwinin, néún Apraham we chón angang a ereni Petuel me pwal mongeien Repeka we itan Lapan, ewe popun an feito. Iir me rúúemén ra tipeeú ngeni án Repeka epwe fiti i me pwúlúweni Isaak. Met Repeka a apasa lupwen ra eisini? A apasa: ‘Ewer.’ A mochen feiló. Iwe sorotáán, ra tétá wóón ekkewe kamel, iwe ra poputááni ar sáittam ngeni Kanaan.

Lupwen ra war, a fen tori fansoun lekuniol. Repeka a kúna emén mwán a feffetál lón ewe atake. Ina i Isaak. A pwapwa le kúna Repeka. Nge iei Isaak epwele fókkun tongei Repeka. Inan we Sara a fen máló ina epwe úlúngát ier, iwe a fókkun letipechou ren. Nge iei, a pwapwasefál.