IEI liosun eú paratis, ina epwe usun ewe paratis Kot a eppii ngeni néún we soufós Aisea. Aisea a manaw ekiseló mwirin Sona.

Paratis a wewe ngeni eú leeni mi lingéch. Esap pwe a kan áchema ngonuk usun eú mettóch sia fen kúna lón ei puk? A usun ewe leeni mi lingéch Jiowa Kot a féri fán iten Atam me Efa, ika met? Nge itá epwe wor eú fansoun unusen fénúfan epwe wiliti eú paratis?

Jiowa a ereni néún we soufós Aisea pwe epwe makkeei usun warotoon ewe paratis mi fé fán iten néún Kot kewe aramas. A apasa: ‘Ekkewe wolif me siip repwe nónnómfengen fán kinamwe. Ekkewe kúkkún kou me kúkkún laion repwe mwéngéfengen, iwe ekkewe kúkkún semirit repwe túttúmúnúúr. Emén semirit esap mwo nge feiengaw ika a kunou únúkkún emén serepenit mi poison.’

Chómmóng ra apasa: ‘Ei mettóch esap tongeni fis. Seni chék me lóóm a fen wor osukosuk wóón fénúfan, iwe epwe pwal ina usun fansoun meinisin.’ Nge ekieki mwo ei mettóch: Met sókkun leeni Kot a awora fán iten Atam me Efa?

Kot a anómu Atam me Efa lón eú paratis. Pokiten ra álleasolapa Kot, ina chék ewe popun a péút seniir leenier mi lingéch, iwe ra chinnapeló me máló. Kot a pwonei pwe epwe liffang ngeni ekkewe aramas mi tongei i, ekkewe mettóch mi péút seni Atam me Efa.

Lón ewe paratis epwele war, esap chúen wor minen efeiengaw are met epwe taló. Epwe unus ewe kinamwe. Aramas meinisin repwe péchékkúl me pwapwa. Met Kot a mochen seni me lepoputáán, epwe pwal ina usun met epwe fis. Nge sipwap káé mwirin ika epwe ifa usun án Kot epwe féri ei mettóch.