IKA ka nengeni ena serepenit mi ffititá wóón ena efóch irá, óm lúkú nge wesewesen emén serepenit? Aapw, esap wesewesan. Ena serepenit a ffér seni kapa. Jiowa a ereni Moses pwe epwe effitaatá wóón ena efóch irá pwe ekkewe aramas repwe nengeni pwe resap máló. Nge ekkena serepenit wóón ena pwúl, iir wesewesan. Ra fen kkúú ekkewe aramas, iwe ra semmwen rer. Ka silei pwata?

Popun, pún ekkewe chón Israel ra eáni kapasen ú ngeni Kot me Moses. Ra ngúnúngún: ‘Pwata ka emmwenikichewu seni Isip pwe sipwe máló lón ei fénúpéén? Ese wor mwéngé are konik ikeei. Iwe, a fen pwal nuwooch ei mana.’

Nge ewe mana, ina eú mwéngé mi anné. Jiowa a awora ngeniir ena mwéngé ren eú manaman. A pwal awora ngeniir konik ren eú manaman. Nge ekkewe aramas rese pwáraatá kilisou ren napanapen án Kot túttúmúnúúr. Ina popun Jiowa a tiinaato ekkeei serepenit mi poison pwe epwe apwúngú ekkeei chón Israel. Ekkeei serepenit ra kkúúr, iwe chómmóng me leir ra máló.

Iwe ekkewe aramas ra feito ren Moses, ra apasa: ‘Ám aua fen tipis, pún aua eáni kapasen ú ngenikemi me Jiowa. Iwe iei, kopwe iótek ngeni Jiowa pwe epwe tiinaaló senikem ekkeei serepenit.’

Iwe, Moses a iótek fán iten ekkewe aramas. Iwe, Jiowa a ereni Moses pwe epwe féri ei serepenit kapa. A apasa pwe epwe effitaatá wóón efóch irá, iwe iir kewe mi kkúúr ekkewe serepenit repwe nengeni. Moses a féri minne chék Kot a apasa. Iwe, ekkewe aramas mi kkúúr ekkewe serepenit ra nengeni ewe serepenit kapa, iwe ra péchékkúlsefál.

Mei wor eú lesen sipwe káé seni ei pwóróus. Oukich meinisin, sia usun ekkewe chón Israel mi feiengaw ren ekkewe serepenit. Ika ka nennefetál, kopwe kúna pwe aramas ra kan chinnapeló, semmwen me máló. A iei usun pún ewe áeménún mwán me áeménún fefin, Atam me Efa, ra kul seni Jiowa, iwe kich meinisin mwirimwiriir. Nge Jiowa a fen féri alen ach sipwe tongeni kúna manaw esemuch.

Jiowa a tiinaato Néún we Jesus Kraist, ngeni fénúfan. Chómmóng aramas ra ekieki pwe Jesus a ngaw, iwe ra eitiwaatá Jesus wóón efóch irá. Nge, Jiowa a fangóló Jesus pwe epwe selánikich. Ika sia nennengeni Jesus lón kapas áwewe me áppirú i, iwe sia tongeni kúna manaw esemuch. Nge sipwap káé usun ei mettóch mwirin.