EÚ RÁN, Jesus a ereni emén mwán pwe epwe tongei chón órun. Ewe mwán a eisini Jesus: ‘Ié chón órui?’ Iwe Jesus a silei met ei mwán a ekieki. Ewe mwán a ekieki pwe chón órun a wewe ngeni pwisin chék chón an einang are an lamalam. Ina popun, sipwe ppii met Jesus a ereni.

Fán ekkóch, Jesus a asukula aramas ren an apwóróusa eú pwóróus. Iei usun met a féri. A apwóróusa usun emén chón Jus me emén chón Samaria. Sia fen káé pwe chómmóng chón Jus rese sani chón Samaria. Iwe iei án Jesus apwóróus:

Eú rán, emén chón Jus a pweretiw wóón efóch al seni lemal ngeni Jeriko. Nge chón solá ra turufi. Ra angei seni néún moni me awata tori arapakkan epwele máló.

Mwirin, emén souasorun Jus a pwereto wóón ewe al. A kúna ewe mwán mi feiengaw. Óm ekiek nge met a féri? Mwa met a chék pwere seni me fetál wóón epek ewe al. Mwirin, pwal emén mi fókkun achocho lón lamalam a pwereto. I emén chón Lefi. Met a kaúló? Aapw ese pwal kaúló pwe epwe álisi ewe mwán mi feiengaw. Ka tongeni kúna ewe souasor me ewe chón Lefi ar ra pwepwereló wóón ena al.

Nge nengeni ewe emén mi nóm ikeei ie ren ei mwán mi feiengaw. I emén chón Samaria. Iwe, a álisi ewe chón Jus. A sáfeni kinásan kewe, mwirin a uwealó ngeni eú leeni a tongeni asésé me chikaretá me ie.

Mwirin án Jesus wes le apwóróusa ena pwóróus, a ereni ewe mwán mi eisini ewe kapas eis: ‘Óm ekiek nge ié lein ekkeei úlúmén ra pwári pwe i chón órun ewe mwán mi feiengaw? Ewe souasor ika ewe chón Lefi are ewe chón Samaria?’

Ewe mwán a pélúweni: ‘Ewe re Samaria. A úméúméch ngeni ewe mwán mi feiengaw.’

Jesus a apasa: ‘Mi pwúng reom. Iwe, kele feiló me úméúméch ngeni aramas usun féfférún ewe chón Samaria.’

Kese kan sani napanapen án Jesus asukul? Sia tongeni káé chómmóng, chómmóng mettóch mi lamot ika sia aúseling ngeni minne Jesus a apasa lón ewe Paipel, ika met?