EN MI silei ié ena mi itiló wóón ena pwúl? Ina i Saul. Chechchemeni pwe i ewe mi wisen mammasa úfen ekkewe mwán mi monei Stefanus. Nengeni ena saram mi saramaram! Met ei a fiffis?

Mwirin án Stefanus we ninniiló, Saul a wisen sou emmwen le kútta néún Jesus kewe chón áppirú pwe epwe awater. A kan tolong lón eú me eú ekkewe imw, átekiniirewu me otururelong lón imwen fétek. Chómmóng chón káé ra sú ngeni ekkóch telinimw me ra poputá le afalafala ewe “kapas allim” ie. Nge Saul a feiló ngeni ekkóch telinimw pwe epwe kútta néún Jesus kewe chón áppirú. Nge lón ei atun a feffeiló ngeni Tamaskus. Nge lón an fetál, iei ewe mettóch mi amwarar a fis:

Och saram a mwittir ttinetiw seni láng únúkkún Saul. A turuló wóón ei pwúl, usun sia kúna me ikeei ie. Iwe eú méngúngú a apasa: ‘Saul, Saul! Pwata ka eriáfféúei?’ Ekkena mwán mi fiti Saul ra kúna ewe saram me pwal rong ewe méngúngú nge rese tongeni weweiti met a apasa.

Saul a eis: ‘En ié, Samol?’

Ewe méngúngú a apasa: ‘Ngang Jesus, ewe ka eriáfféwú.’ Jesus a apasa ei mettóch pún lupwen Saul a kan eriáfféwú néún Jesus kewe chón áppirú, usun itá Jesus a pwal meefi ewe riáfféú.

Iwe iei Saul a eis: ‘Samol, met upwe féri?’

Jesus a apasa: ‘Kopwe útá me tolong lón Tamaskus. Me ikena ie emén epwe erenuk met kopwe féri.’ Lupwen Saul a útá me ánnelói mesan kewe, ese tongeni kúna och mettóch. A chunuló! Iwe ekkewe mwán mi fiti i ra kamwéch péún me panaalong lón Tamaskus.

Iwe iei Jesus a kapas ngeni emén néún chón káé lón Tamaskus, a apasa: ‘Ananias, útá. Kopwe feiló ngeni ewe al itan Wenechar. Lón imwen Jutas we, kopwe eis emén mwán itan Saul. Ua fen filatá átena pwe epwe emén nei chón angang mi watte wisan.’

Ananias a álleasochis. Lupwen a chuuri Saul, a isetá péún kewe wóón me a apasa: ‘Ewe Samol a tiinieito pwe kopwe tongeni nennelósefál me pwal uroló ren ewe manaman mi fel.’ Lón chék ena atun, och mettóch usun únen iik a turutiw seni mesen Saul kewe me a tongeni nennelósefál.

A watte wisen Saul we le afalafala aramasen chómmóng mwú. Mwirin, a silleló ren an iteni aposel Paulus, iwe nge sipwap káé chómmóng mettóch usun mwirin. Nge akkomw, sipwe ppii met Kot a akúnéló Petrus pwe epwe féri.