Me ren Mattu 28:1-20
28 Mwirin ewe Sapat, únúmweiránin ewe áeúin ránin wiik, Meri Maktalin me pwal ewe emén Meri ra feito pwe repwe ppii ewe peiás.
2 Me nengeni! a fis eú watteen chchechin fénú, pún emén néún Jiowa* chónláng a feitiw seni láng me feiliiti ewe peiás me asokopenaaló ewe faw, me mómmóót wóón.
3 Napanapan a ussun inefi, me úfan a pwechepwech ussun sno.
4 Iwe, pokiten ekkewe chón mmas ra niweiti, ra chechchech me ra ussun aramas mi máló.
5 Nge ewe chónláng a ereni ekkewe fefin: “Ousap niwokkus, pún úa silei pwe oua kútta Jises, ewe a ninniiló wóón ewe irá.
6 Ese nóm ikeei pún a fen manawetá, ussun minne i a apasa. Ou feito katol ei leeni ia a koon ie.
7 Iwe, oupwe mwittiriló me ereni néún kewe chón káé pwe a manawetá seni máló, me ereniir: ‘Nengeni! A akkomwoló mwemi ngeni Kalili. Oupwe kúna i me ikena ie.’ Nengeni! Úa fen erenikemi.”
8 Iwe, ra mwittir ló seni ewe peiás fán ar niwokkus me watteen pwapwa. Ra ssáló pwe repwe apwóróusa ngeni néún kewe chón káé.
9 Me nengeni! Jises a chuuriir me apasa: “Rán allim!” Ra feiliiti me kémwéch pechen me asamolu* i.
10 Iwe, Jises a ereniir: “Ousap niwokkus! Oupwe feiló, ereni pwii kewe pwe repwe ló Kalili, me repwe kúnaei me ikena ie.”
11 Atun ar feffeiló, ekkóch me lein ekkewe chón mmas ra feiló lón ewe telinimw me apwóróusa ngeni ekkewe souasor mi lap meinisin ekkewe mettóch ra fis.
12 Iwe, ekkewe souasor mi lap me ekkewe néúwisin Jus ra kochufengen pwe repwe pwúngúpwúngfengen, iwe mwirin, ra ngeni ekkewe soufiu chómmóng féún moni silifer
13 me apasa: “Oupwe erá, ‘Néún kewe chón káé ra feito lepwinewe me soláái i atun ám méúr.’
14 Nge iká ei epwe tori selingen ewe governor, ám áúpwe áwewe* ngeni me ámi ousap pwal lólilen.”
15 Iwe, ra angei ekkewe féún silifer me féri met mi allúk ngeniir, me ei pwóróus a chéúfetál lein ekkewe chón Jus tori ikenái.
16 Iwe nge, ekkewe 11 chón káé ra feiló Kalili, wóón ewe chuuk Jises a akkóta ar repwe chufengen ie.
17 Lupwen ra kúna i ra asamolu,* nge ekkóch ra tipemwárámwár.
18 Jises a feiliitiir me a kapas ngeniir, a erá: “Kot a fen ngeniei nemenem meinisin lón láng me wóón fénúfan.
19 Ina minne, oupwe feiló me asukula aramasen mwú meinisin pwe repwe wiliiti chón tapwoto mwiri, me papataisiir lón iten ewe Sam me ewe Naw me ewe ngún mi fel.*
20 Oupwe asukuler pwe repwe álleasochisi meinisin ekkewe mettóch úa fen allúkú ngenikemi. Me nengeni! úpwe nónnóm remi lón ekkewe rán meinisin tori sópwólóón ótóten ei fénúfan.”*
Footnote
^ Are “chapetiw ngeni.”
^ Krik, “cháácháári.”
^ Are “chapetiw ngeni.”
^ Ina án Kot we manaman mi fel.
