Me ren Mark 9:1-50
9 Pwal och, a ereniir: “Enlet úa erenikemi pwe mi wor ekkóch me lein chókkewe mi útá ikeei resap máló tori ar repwe akkomw kúna án ewe Mwúún Kot a fen nennemenem.”
2 Wonu rán mwirin, Jises a eweinaatá Piter me Jemes me Jon wóón ewe chuuk mi tekia nge iir chék. Me a wililó me mwen meser,
3 úfan we úféúfen lúkún a poputá le saramaram, a pwechepwech lap seni met emén chón sóópw wóón fénúfan a tongeni ápwecha.
4 Pwal och, ra kúna Moses me Elias ra apwóróus ngeni Jises.
5 Iwe, Piter a ereni Jises: “Rappai, a éch ám ei nóm ikeei. Iwe áúpwe aúetá úlúngát tento, eú fán itom, eú fán iten Moses, me eú fán iten Elias.”
6 Ren enletin, Piter ese silei met epwe féri pún ra fókkun niwokkus.
7 Me eú kuchu a pwá, a pwélúroló, me eú méngúngú a towu seni lón ewe kuchu: “Iei i nei Át, ewe mi áchengicheng. Oupwe aúseling ngeni.”
8 Iwe, ra nennefetál me ra kúna pwe ese chúen wor emén rer pwe Jises chék.
9 Lupwen ra feitiw me wóón ewe chuuk, i a allúkúchou ngeniir ar resap ereni emén met ra kúna tori mwirin án ewe Néún aramas manawsefál.
10 Ra álleasochisi alon, nge ra pwóppwóróusfengen lefiler met weween ei manawsefál seni máló.
11 Me ra poputá le kapas eis ngeni, ra apasa: “Pwata ekkewe soumak ra erá pwe Elias epwe feito akkomw?”
12 A ereniir: “Elias epwe feito akkomw me eliwinisefáli mettóch meinisin. Nge pwata a makketiw pwe ewe Néún aramas epwe kúna chómmóng riáfféú me kúna koput?
13 Nge úa erenikemi pwe ren enletin, Elias a fen feito, me ra fér ngeni met ra mochen féri, ussun chék met a fen makketiw ussun i.”
14 Atun ra etto ren ekkewe ekkóch chón káé, ra kúna eú mwichemmóngun aramas mi nóm pwellin únúkkúr, me a wor ekkóch soumak ra ánini ngeniir.
15 Nge atun chék ekkewe aramas meinisin ra kúna, ra máirú me ssáiti pwe repwe kapwong ngeni.
16 Iwe, a eisiniir: “Met oua ánini ngeniir ussun?”
17 Iwe, emén me lein ewe mwichen aramas a pélúweni: “Sense, úa wato nei ei át reom pokiten a wor emén ngún a wááni mi efisi án emén epwe awemwéch.
18 Ekis meinisin ia a wááni me ie, a oturaaló lepwúl, me a pwuropwurowu me lón awan me a assúngúrúfengeni ngiin me turu seni an péchékkúl. Úa tingorei noum kewe chón káé ar repwe asúoló, nge rese tongeni.”
19 Lón an pélúweni a ereniir: “Ei táppin aramas ese wor ar lúkú! Tori ineet ái úpwe sópweeló le nóm remi? Tori ineet úpwe engiló ngenikemi? Oupwe wato rei.”
20 Iwe, ra uweato ewe át ren, nge atun ewe ngún a kúna i, a mwittir efisi án ewe át watteen chchech.* Mwirin an turuló lepwúl, a sokopenfetál, me pwuropwurowu me lón awan.
21 Iwe, Jises a eisini ewe sam: “Ifa ttamen an a fiffis ei ngeni?” A erá: “Seni chék lekúkkúnún,
22 me fán chómmóng a oturaalong i lón ekkei me pwal lón konik pwe epwe nieló i. Nge iká ka tongeni féri och, kopwe tongekem me álisikem.”
23 Jises a ereni i: “Pwata ka apasa, ‘Iká ka tongeni’? Ren emén mi wor an lúkú, mettóch meinisin a tufich ngeni.”
24 Mwittir chék, semen ewe át we a púchérútá me apasa: “A wor ái lúkú! Nge iká ái lúkú a apwangapwang álisiei le apéchékkúlaló!”
25 Jises a kúna pwe eú mwichen aramas ra ssáto rer, a apwúngú ewe ngún mi limengaw, a ereni: “En ngún mi efisi án emén epwe awemwéch me selingepúng, úa allúk ngonuk pwe kopwe towu seni átei me kosap tolongsefál lón i!”
26 Mwirin án ewe ngún púchérútá me efisi án ewe át watteen chchech* fán chómmóng, a towu, me ussun nge ewe át a máló, ina minne lap ngeni ekkewe aramas ra apasa: “A máló!”
27 Nge Jises a amwéchú péún me ápwáátái, iwe a útá.
28 Iwe, mwirin an tolong lón eú imw, néún kewe chón káé ra eisini i nge iir chék: “Pwata áúse tongeni atowu?”
29 A ereniir: “Ei sókkun a tongeni towu ren chék iótek.”
30 Ra feiló seni ikena ie me pwerelong lón Kalili, nge i ese mochen án emén epwe silei ussun.
31 Pún a asukula néún kewe chón káé me a ereniir: “Ewe Néún aramas epwe kúna afangemá me lepéún aramas, me repwe nieló i, nge inaamwo iká epwe ninniiló, epwe manawetá mwirin úlúngát rán.”
32 Iwe nge, rese weweiti alon na, me ra niwokkus le kapas eis ngeni.
33 Iwe, ra tori Kaperniom. Nge atun a nóm lón ewe imw, a eisiniir: “Met ewe oua ániniin me wóón ewe al?”
34 Ra chék fanafaneló, pún ra áninifengen lefiler wóón ewe al iká ién a lap.
35 Iwe, a móttiw me kérato ekkewe Engol me Rúúemén me ereniir: “Iká emén a mochen epwe akkomw, epwe kukumwir seni meinisin me chón angangen meinisin.”
36 Iwe, a angei emén semirit me a aútáái lukanaper, me a roomi me ereniir:
37 “Ié a etiwa emén semirit ussun ei emén fán ásengesin itei, a pwal etiwaei, me ié a etiwaei ese chék etiwaei nge pwal ewe Emén mi tiinieito.”
38 Jon a ereni: “Sense, áúa kúna emén mi asúoló ekkewe timon ren an néúnéú itom, me áúa sótun le aúkatiw i pokiten i esap emén me leich.”
39 Nge Jises a apasa: “Ousap sótun aúkatiw i, pún ese wor emén epwe féri eú manaman fán ásengesin itei, nge mwirin chék epwe tongeni apasa och mi ngaw ussui.
40 Pún ié ese ú ngenikich, i a álisikichetá.
41 Me ié a ngenikemi eú kapen konik ámi oupwe únúmi pokiten ámi néún Kraist chón káé, enlet úa erenikemi pwe epwe wesewesen angei liiwinin.
42 Nge ié a áchepeteki emén me lein ekkeei kúkkún mi wor an lúkú, epwe fen éch ngeni an epwe ámweraalong wóón úwan eféú féúmmóngun faw* me kóturutiw lón ewe mataw.
43 “Iká poum a efisi óm kopwe tipis,* kopwe pékúoló. A múrinné ngonuk óm kopwe tolong lón manaw fán óm ter lap seni óm péúruuofóch le tolong lón Keena,* lón ewe ekkei esap tongeni kun.
44 * ——
45 Me iká pecheom a efisi óm kopwe tipis,* kopwe pékúoló. A múrinné ngonuk óm kopwe tolong lón manaw fán óm ter lap seni óm pecheruuofóch le kóturulong lón Keena.*
46 * ——
47 Me iká mesom a efisi óm kopwe tipis,* kopwe otur sonuk. A múrinné ngonuk óm kopwe tolong lón ewe Mwúún Kot fán óm meseeféú lap seni óm meserúúeféú le kóturulong lón Keena,*
48 ikewe métté esap máló me ie me ewe ekkei esap kun.
49 “Pwe meinisin epwe mworomworeitiir salt ussun chék ekkei.
50 A múrinné salt, nge iká ewe salt a nepateló, ifa ussun epwe nekensefál? Oupwe ussun salt, me oupwe chék kinamwefengen lefilemi.”
Footnote
^ Krik, “oturaaló ewe át nge a chék wei.”
^ Krik, “oturaaló ewe át nge a chék wei.”
^ Krik, “efisi óm kopwe chepetek.”
^ Krik, “efisi óm kopwe chepetek.”
^ Krik, “efisi óm kopwe chepetek.”
