Me ren Mark 6:1-56
6 A feiló seni ikena me ló ngeni leenian we, nge néún kewe chón káé ra tapweló mwirin.
2 Lupwen a tori ewe Sapat, a poputá le asukul lón ewe sinakok me lap ngeni ekkewe mi rongorong ngeni ra mwaar me apasa: “Ia ei mwán a angei me ie ekkeei mettóch? Ifa ussun ei mwán a angei ei tipáchem, me ifa ussun a tongeni féri ekkeei esin manaman?
3 Esap iei i ewe chón táikú? Esap i néún Meri we, me pwiin kewe Jemes, Josef, Jutas, me Simon? Esap pwe fefinan kewe ra nóm rech?” Iwe, ra poputá chepetek ren.
4 Nge Jises a ereniir: “Emén soufós a kúna súfélún ekis meinisin, lúkún chék lón leenian we, me lein aramasan kewe, me lón pwisin imwan.”
5 Iwe, ese tongeni féri manaman ikena ie lúkún chék an isettá péún wóón ákkáemén aramas mi semmwen me a echikareretá.
6 A fókkun nenneiruk pokiten ese wor ar lúkú. Me a pwelli ekkewe sóópw me asukul.
7 Iwe, a kérato ekkewe Engol me Rúúemén me a poputá le tiiniireló ákkárúúemén, me a ngeniir manaman wóón ekkewe ngún mi ngaw.*
8 Pwal och, a allúkú ngeniir ar resap uwou mettóch lón ar sái me lúkún chék efóch wok, esap pilawa, esap pwotoun mwéngé, me moni* lón ar kewe penit
9 nge repwe ipweipw ipwer, me resap úféúf rúúaché úf.*
10 A pwal ereniir: “Ese lifilifil imw oua tolong lón oupwe nónnóm ikena tori oupwe towu seni ena leeni.
11 Me ese lifilifil leeni rese etiwakemi are aúseling ngenikemi, atun oua towu seni ikena, oupwe wichikaaló ewe pwúl wóón pechemi pwe epwe eú minen éúréúr ngeniir.”
12 Iwe, ra feiló me afalafala pwe a lamot aramas repwe áier,
13 me ra asúoló chómmóng timon me epiti chómmóng aramas mi semmwen lépwuk* me echikareretá.
14 Iwe, King Erot a rong ei, pún iten Jises a féúló me aramas ra apasa: “Jon ewe Chón Papatais a manawetá seni máló, me iei popun a tongeni féri ekkeei manaman.”
15 Nge ekkóch ra apasa: “I Elias.” Pwal ekkóch ra apasa: “I emén soufós ussun chék emén me lein ekkewe soufósun lóóm.”
16 Nge lupwen Erot a rong ussun, a apasa: “Jon ewe úa úkúfi mékúran, ei emén a fen manawetá.”
17 Pún pwisin Erot a fen tiitiiló ar repwe aresini Jon me fééti i lón imwen kalapus pokiten Erotias, pwúlúwen pwiin we Filip, pokiten a pwúlúweni.
18 Pún Jon a fen ereni Erot fán chómmóng: “Ese mumutá me ren ewe allúk óm kopwe pwúlúweni pwúlúwen pwiium we.”
19 Iwe, Erotias a akkamwéchú an song ngeni i me a mochen nieló i, nge ese tongeni.
20 Pún Erot a niwokkusiti Jon pokiten a silei pwe i emén mwán mi pwúng me pin, me a túmúnú an esap feiengaw. Mwirin an rongorong ngeni, ese silei met epwe féri, nge a chék sópweeló le rongorong ngeni fán pwapwa.
21 Nge a wor án Erotias fansoun fich le apwénúetá an we kókkót atun Erot a féri kametip lón ránin uputiwan we fán iten néún kewe néúwis me ekkewe meilapen soufiu me ekkewe mwán mi fókkun tekia lón Kalili.
22 Iwe, néún Erotias we fépwúl a tolong me pwérúk me apwapwaai Erot me chókkewe mi eti i le mwéngé.* Ewe king a ereni ewe fépwúl: “Kopwe tingoreei ese lifilifil met ka mochen, me ngang úpwe ngonuk.”
23 Ewer, a ékképél ngeni neminnewe: “Ese lifilifil met ka tingoreei, úpwe ngonuk tori esopwun mwúúi.”
24 Iwe, a towu me eisini inan we: “Met úpwe tingor?” Neminna a pélúweni: “Mékúren Jon ewe Chón Papatais.”
25 Mwittir chék, neminna a feiló ren ewe king me ereni an we tingor, a apasa: “Úa mochen óm kopwe ngeniei iei chék lón eú sepi mékúren Jon Papatais.”
26 Inaamwo iká ewe king a fókkun letipeta, nge pokiten an we ékképél me néún kewe waséla,* iwe, a etiwa án neminna we tingor.
27 Iwe, ewe king a mwittir tiinaaló emén chón mmas me allúkú ngeni an epwe uweato mékúren Jon. Iwe, a ló me úkúfi mékúran me lón imwen kalapus
28 me a uweato mékúran we lón eú sepi. A ngeni ewe fépwúl, iwe, ewe fépwúl a ngeni inan we.
29 Lupwen néún kewe chón káé ra rong ei, ra feito me angei inisin we me waalong lón eú peiás.
30 Ekkewe aposel ra rongeeló Jises me apwóróusa ngeni ekkewe mettóch meinisin ra féri me asukula.
31 A chómmóng aramas ra feito me feiló, nge ese wor atun ar repwe asésé pwal mwo nge áni ekis mwéngé. Ina minne, a ereniir: “Ousipwe feiló ngeni eú leeni ese wor aramas ie me ekis asésé.”
32 Iwe, ra sái wóón efóch waa ngeni eú leeni ese wor aramas ie pwe epwe chék iir.
33 Nge aramas ra kúna ar ló me chómmóng ra silei ussun, me ra ssá wóón pecher seni meinisin ekkewe telinimw me ra tori ikena ie akkomw mwer.
34 Iwe atun a tétiw, a kúna eú mwichemmóngun aramas me a fókkun tongeer, pokiten ra ussun siip ese wor chón mmaser. Iwe, a poputá le asukuler chómmóng mettóch.
35 Iei a lekuniol, iwe, néún kewe chón káé ra etto ren me ereni: “Ei leeni mi towaw me ei kulók a fen luló.
36 Kene tiiniireló pwe repwe tongeni ló ngeni ekkewe leenien atake me ekkewe sóópw me kamé met repwe áni.”
37 A pélúweniir: “Oupwe ngeniir met repwe áni.” Ren ei, ra ereni: “Áúpwe feiló me kamé úkúúkún pilawa mi mé ren 200 denarii* me ngeni ekkeei aramas ar repwe mwéngé?”
38 A ereniir: “Fiteféú pilawa a wor remi? Oupwe feiló katol!” Mwirin ar ra silei, ra apasa: “Nifféú me lúkún rúúemén iik.”
39 Iwe, a ereni meinisin ekkewe aramas ar repwe móttiw lón ewe sipa* nge lón eú me eú kúmi.
40 Iwe, ra móttiw nge ákkáipúkú me ákkánime lón eú kúmi.
41 A angei ekkewe nifféú pilawa me ekkewe rúúemén iik, a sachchetá láng me eáni eú iótek. Mwirin a kinikisi ekkewe pilawa me poputá le ngeni ekkewe chón káé ar repwe isettiw mwen ekkewe aramas, me a kinifeseni ekkewe rúúemén iik fán iten meinisin.
42 Iwe, iir meinisin ra mwéngé me métúló,
43 me ra ionifengeni 12 chúúk mi ur ren ekkewe lusun, me lúkún ekkewe iik.
44 Chókkewe mi mwéngé ekkewe pilawa, iir 5,000 mwán.
45 Iwe, mwittir chék a ereni néún kewe chón káé ar repwe tétá wóón ewe waa me akkomwoló ewe epek ngeni Petsaita, nge i a áfeilóói ekkewe aramas.
46 Nge mwirin an kapwong ngeniir, a feitá wóón eú chuuk pwe epwe iótek.
47 Lupwen a pwiniló, ewe waa a nóm lukanapen mataw, nge i a áláeménúló wóón ewe fénú.
48 Iwe, a kúna néún kewe chón káé, ra weires ren ewe waa pokiten enienin ewe ásepwál a péchékkúl ngeniir. Iwe, atun a arap ngeni wilingángách atun mi chúen kiroch,* Jises a feiló rer nge a fetál wóón ewe sáát, nge ussun itá epwele lu seniir.
49 Atun ra kúna an fetál wóón ewe sáát, ra ekieki: “Met ei a pweppwereto!” Me ra púchér.
50 Pún iir meinisin ra kúna i me ra osukosuk. Nge mwittir chék a fós ngeniir me apasa: “Oupwe pwora! Ngang ei, ousap niwokkus.”
51 Mwirin, a tétá rer wóón ewe waa me ewe ásepwál a maséséló. Iwe ren ei, ra fókkun mwaar,
52 pún rese weweiti weween ekkewe pilawa, nge letiper a chúen wewemmang.
53 Lupwen ra tori ewe epek, ra tori Kenesaret, me ikena ie ra angkénaaló ewe waa.
54 Nge atun chék ra tétiw me wóón ewe waa, aramas ra fen esilla i.
55 Ra ssáfetál lón unusen ewe fénú me poputá le ekieto ekkewe mi semmwen wóón ekkewe leenien keki ikewe ia ra rong pwe a nóm ie.
56 Iwe, ese lifilifil menni sóópw are telinimw are leenien atake a tolong lón, ra onómu ekkewe mi semmwen lón ekkewe leenien amémé, me ra tingormaw ngeni ar repwe chék mwaren attapa lepwúlún úfan we úféúfen lúkún. Iwe, meinisin chókkewe mi attapa ra chikaretá.
Footnote
^ Krik, “limengaw.”
^ Krik, “kapa.”
^ Are “pwal eché úf.”
^ Ina, seni féún olif.
^ Are “móót tiwiniin órun ewe cheepel.”
^ Are “me chókkewe mi móót tiwiniin órun ewe cheepel.”
^ Krik, “lón ewe sipa mi anúwen fetil.”
^ Krik, “ewe arúáánúún kinikinin fansoun lepwin.” Ina epwe 3:00 a.m. tori tétáán akkar ina epwe 6:00 a.m.
