Me ren Luk 11:1-54
11 Iwe, a nóm lón eú leeni me iótek, me atun a wes, emén me lein néún kewe chón káé a ereni: “Samol, kopwe áiti ngenikem ifa ussun áúpwe iótek, ussun chék Jon a pwal áiti néún kewe chón káé.”
2 Iwe a ereniir: “Lupwen oupwe iótek, oupwe apasa: ‘Semem, itom epwe pin. Amwo Mwuum epwe feito.
3 Kopwe ngenikem enem mwéngé* eú me eú rán me ren minne áúa osupwangan iteiten rán.
4 Me omusaaló ám kewe tipis, pún ám áúa pwal omusaaló meinisin iir kewe mi liwinimmang ngenikem, me kosap uweikemilong lón sóssót.’ ”
5 Mwirin a ereniir: “Epwe ifa iká emén me leimi a wor emén chienan me a feiló ren lukenipwin me ereni, ‘Chienei, kopwe mut ngeniei úlúféú pilawa,
6 pún emén me lein chienei kewe a kerán chék wareitiei seni an sái me ese wor met úpwe etiwa ngeni.’
7 Nge ena emén a pélúwenawu me lón: ‘Kaúló le aosukosukaei. Ewe asam a fen lok, me nei keei semirit ra nóm rei wóón peet. Úse tongeni pwáátá me ngonuk och.’
8 Úa erenikemi pwe i epwe wesewesen pwáátá me ngeni chienan we met a osupwangan, esap pokiten ena emén i chiechian, nge pokiten ena emén a éúcho.*
9 Ina minne úa erenikemi, oupwe tittingor me oupwe angei, oupwe kúkkútta me oupwe kúna, oupwe fiffichifich me epwe suuk ngenikemi.
10 Pún meinisin mi tittingor mi angei, me meinisin mi kúkkútta mi kúna, me meinisin mi fiffichifich epwe suuk ngeniir.
11 Ren enletin, ié me lein ámi kana sam, iká néún epwe tingor emén iik, nge epwe fen ngeni i emén serepenit nge esap emén iik?
12 Are iká epwe pwal tingor eféú sokun, nge epwe ngeni emén scorpion?
13 Ina minne, ikáámwo ámi mi ngaw nge oua silei ifa ussun oupwe liffang ngeni néúmi kewe liffang mi múrinné, epwele fen ifa me án ewe Sam lón láng fang ewe ngún mi fel ngeni chókkewe mi tittingorei i!”
14 Mwirin, a asúoló emén timon mi efisi án ewe mwán mi wááni timon epwe awemwéch. Atun ewe timon a towu, ewe mwán a tongeni kapas, iwe, ewe mwichen aramas a fókkun mwaar.
15 Nge ekkóch me leir ra apasa: “Ren Peelsepul,* ewe sounemenemen ekkewe timon, i a asúoló ekkewe timon.”
16 Nge ekkewe ekkóch, ren ar repwe sótuni Jises, ra ereni an epwe féri eú manaman lón iten Kot.
17 A silei ar ekiek, iwe a ereniir: “Iteiten mwú mi tipefesen, epwe taló, me eú imw mi tipefesen, epwe turuló.
18 Pwal ina chék ussun, iká Setan a pwal ú ngeni pwisin i, iwe ifa ussun an epwe útá mwúún? Pún ámi oua erá pwe ngang úa asúoló ekkewe timon fán iten Peelsepul.
19 Iká úa asúoló ekkewe timon fán iten Peelsepul, nge néúmi kewe ra asúroló fán iten ié? Ina popun, iir repwe néúmi soukapwúng.
20 Nge iká úa asúoló ekkewe timon ren aútún péún Kot, weween pwe ewe Mwúún Kot a fen nóm ikeei nge ouse tepereni.
21 Lupwen emén mwán mi péchékkúl, fán néún pisekin maun a mammasa imwan, pisekin kewe repwe túmún.
22 Nge lupwen emén mi péchékkúl seni epwe ú ngeni me okkufu, ena mwán epwe angealó meinisin néún kewe pisekin maun a lúkúlúk wóór, me a eineti ekkewe mettóch a angei seni.
23 Ié esap peniei a ú ngeniei, nge ié esap fitiei le ioni aramas a atoropasa aramas.
24 “Lupwen emén ngún mi limengaw a towu seni emén aramas, a fetáleló lón ekkewe leeni ese wor konik ie pwe a kútta eú leenien asésé, nge mwirin an ese kúnékún, a apasa, ‘Úpwe liwiniti imwei we, ewe úa mwékút seni.’
25 Me atun a tikeri ewe imw, a kúna pwe a liméch me lingéch.
26 Iwe, a ló me a uwei pwal fúmén ngún mi fókkun ngaw seni i, me mwirin ar tolong lón, ra nónnóm ikena. Iwe lesópwólóón nónnómun ei mwán a kon ngaw seni akkomwan.”
27 Iwe, atun a apasa ekkeei mettóch, emén fefin seni me lein ewe mwichen aramas a kékkéwu ren: “Pwapwaan ewe leenien ménúkol mi uweuk me ekkewe oupw mi oupwuk!”
28 Nge a apasa: “Aapw, fen chókkewe mi rongorong ewe kapasen Kot me akkamwéchú, iir ra pwapwa!”
29 Lupwen ekkewe aramas ra kochufengen, a poputá le apasa: “Ei táppin aramas, iir eú táppin mi fókkun ngaw, mi kúkkútta eú esissil, nge ese wor esissil epwe kawor ngeniir lúkún chék ewe esissillen Sona.
30 Pún ussun chék Sona a wiliiti eú esissil ngeni ekkewe chón Ninifa, iwe ewe Néún aramas ngeni ei táppin aramas.
31 Ewe kiwinen éér epwe pwáátá lón ewe kapwúng fiti ekkewe mwán seni ei táppin aramas me epwe apwúngúúr, pún neminnei a feito seni lesopwun fénúfan pwe epwe rongorong tipáchemen Salomon. Nge nengeni! emén mi lap seni Salomon a nóm.
32 Ekkewe aramasen Ninifa repwe pwáátá lón ewe kapwúng fiti ei táppin aramas me repwe apwúngú ei táppin aramas pún aramasen Ninifa ra áier ren án Sona afalafal. Nge nengeni! emén mi lap seni Sona a nóm.
33 Mwirin an kek eú lamp, emén aramas a isettá, esap wóón eú leeni mi opoló are éppwélúló,* nge wóón ewe leenien lamp, pwe chókkewe mi tolong repwe kúna ewe saram.
34 Mesom ina lampen inisum. Lupwen mesom a nefótófót,* unusen inisum epwe pwal saramaram,* nge lupwen a lólówó,* inisum epwe pwal rochopwak.
35 Ina minne, kopwe mammasa pwe ewe saram mi nónnóm reom, esap rochopwak.
36 Ina minne, iká unusen inisum a saram, ese wor kinikinin mi rochopwak, unusen ewe inis epwe saram ussun eú lamp mi asaramaok ren ttinan.”
37 Lupwen a apasa ei, emén Farisi a tingorei an epwe mwéngé ren. Iwe, a tolong me móttiw* ren ewe cheepel.
38 Iwe nge, ewe Farisi a máirú an kúna pwe i ese akkomw télú* péún me mwen ewe mwéngéén leolowas.
39 Nge ewe Samol a ereni: “Ámi kana Farisi, oua limeti lúkún ewe kap me ewe sepi, nge lón ámi oua ur ren tipemmóng me féfféringaw.
40 Ámi mi umwes! Esap pwe ewe emén mi féraatá ewe lúkún a pwal féraatá ewe lón?
41 Nge oupwe fangoló ussun liffangen úméúméch* ekkewe mettóch seni me lón letipemi, me nengeni! mettóch meinisin ussumi epwe liméch.
42 Nge feiengaw ngenikemi Farisi, pokiten oua fang leengolun mint me ru* me iteiten ekkewe pwal ekkóch iásái, nge oua tunaaló ewe pwúng me ewe tong án Kot! A lamot oupwe féri ekkena mettóch, nge ousap tunaaló ekkeei pwal ekkóch mettóch.
43 Feiengaw ngenikemi Farisi, pokiten oua tongei ekkewe leenien móót mi nóm mwan* me lón ekkewe sinakok me ekkewe kapwong me lón ekkewe leenien amémé!
44 Feiengaw ngenikemi, pokiten oua ussun ekkewe peiás rese kon pwá,* aramas ra fetál wóón nge rese silei ussun!”
45 Emén me lein chókkewe mi silefichi ewe Allúk a pélúweni, a ereni: “Sense, lón óm apasa ekkeei mettóch, ka pwal esiitakem.”
46 Mwirin a apasa: “Pwal feiengaw ngenikemi ámi ekkewe mi silefichi ewe Allúk, pún oua achowaatiw aramas ren os mi weires le ekii, nge ámi pwisin ouse attapa ekkewe os ren efóch aútúmi!
47 “Feiengaw ngenikemi, pún oua férsefáli peiásen ekkewe soufós, nge semelapemi kewe ra nireló!
48 Pwúngún, ámi chón pwáraatá ussun féfférún semelapemi kewe, me oua tipeeú ngeniir, pún iir ra nieló ekkewe soufós nge ámi oua férsefáli peiáser kewe.
49 Iei popun, ewe tipáchemen Kot a pwal apasa: ‘Úpwe tiinaaló rer ekkewe soufós me aposel me repwe nieló me eriáfféwú ekkóch me leir,
50 pwe chchaan meinisin ekkewe soufós mi niniiló seni ewe atun aramas ra uputiw wóón fénúfan epwe etipisi ei táppin aramas,
51 seni chchaan Epel ngeni chchaan Sekaraia, ewe a ninniiló lefilen ewe róóng me ewe imw.’* Ewer, úa erenikemi epwe etipisi ei táppin aramas.
52 “Feiengaw ngenikemi ámi ekkewe mi silefichi ewe Allúk, pún oua angealó ewe kiien sile. Pwisin ámi ouse tolong lón, me oua eppeti chókkewe mi tolong lón!”
53 Iwe, atun a towu seni ikena ie, ekkewe soumak me Farisi ra poputá le fókkun etieppach ngeni i me átepa ngeni chómmóng kapas eis,
54 ra chék ewitiwiti ar repwe liapeni i lón met neman epwe apasa.
Footnote
^ Krik, “pilawa.”
^ Are “ese úkútiw le tingormaw.”
^ Eú itelap mi weneiti Setan.
^ Are “éppwélú ngeni eú pasikit.”
^ Are “ffat.”
^ Are “uren saram.”
^ Krik, “ngaw.”
^ Are “móót tiwiniin.”
^ Ekkewe Farisi me ekkóch chón Jus ra kan télú péúr ren ar fiti ar we ééreni.
^ Iei efóch irá fán iten sáfei me fán iten ánennen mwéngé.
^ Are “fókkun múrinné.”
^ Are “ekkewe peiás ese wor esissillan.”
^ Are “imwenfel.”
