Taropwe Ngeni Ekkewe Chón Kolose 3:1-25
3 Iwe nge, iká Kot a amanawakemiitá fengen me ewe Kraist, oupwe sópweeló le kúkkútta met mi nóm láng, ikewe Kraist a móót ie lepeliefichin Kot.
2 Oupwe chék nefótófót wóón mettóchun láng, nge esap wóón mettóchun fénúfan.
3 Ámi oua máló, nge manawemi a nóm lepéún Kraist pokiten iei met a tipeeú ngeni mochenin Kot.
4 Lupwen ewe Kraist, manawach we, epwe pwápwááló, ámi oupwe pwal fiti le pwááló lón lingan.
5 Ina minne, oupwe ámálóói kifetin inisimi pwe ousap turulong lón féfférún lisowumwáál,* pwe ousap féri minne mi limengaw, pwe ámi mochenian fefin are mwán esap nemenikemi, pwe oute ekieki ekkewe mettóch mi ngaw me ousap tipemmóng, pún tipemmóng a ussun fel ngeni uluulun.
6 Pokiten ekkena mettóch, án Kot song epwe feito.
7 A pwal ina ussun manawemi me lóóm.
8 Nge iei oupwe atowawaló senikemi meinisin ekkeei mettóch: lingeringer, song, minne mi ngaw, kapas mi ámmetek, me kapas mi annou.
9 Ousap kapas chofona lefilemi. Oupwe pwiliti senikemi manawemi me lóóm fitifengen me féfférún kewe,
10 nge oupwe fen éúféúfa ngenikemi ewe manaw mi fé Kot a fang ngenikich. Ei manaw mi fé a fférútá lón napanapen Kot. Ina minne, atun oua sissileeló ewe enlet ussun Kot, oupwe akkaséfékemiiló.
11 Lón ewe manaw mi fé, ese wor sókkofesenin chón Krik me chón Jus, ekkewe mi sirikomsais me ekkewe rese sirikomsais, chón ekis, chón Sitia,* slave, are chón ngas; nge Kraist i lón mettóch meinisin me a nóm lón meinisin.
12 Iwe, pokiten ámi néún Kot mi fil, ámi mi pin me áchengicheng, oupwe éúféúfa ngenikemi úméúméch me tong, kirekiréch, tipetekison, mosonoson, me mosonottam.
13 Oupwe sópweeló le engilófengen lefilemi me unusen omusaaló tipisin emén me emén inaamwo iká emén a asongakemi wóón och mettóch. Pokiten Jiowa* a unusen omusaaló tipisimi, iwe ámi oupwe pwal ina ussun.
14 Nge me lúkún ekkeei mettóch meinisin, oupwe éúféúfa ngenikemi tong, pún tong a enletin etipeeúfengeni aramas.
15 Pwal och, oupwe mut ngeni án Kraist we kinamwe an epwe nemenem lón letipemi. Kot a kérikemi pwe oupwe tongeni wiliiti eú chék inis me eáni kinamwe. Me oupwe kilisou fansoun meinisin.
16 Oupwe mut ngeni án Kraist kapas an epwe ourakemiiló pwe oupwe tipáchem. Oupwe sópweeló le asukula me apéchékkúlafengenikemi* ren ekkewe kél mi fel, kélún mwareiti Kot, kélún fel fiti kilisou, oupwe kél ngeni Jiowa* seni unusen letipemi.
17 Lón mettóch meinisin oupwe féri are apasa, oupwe féri meinisin lón iten ewe Samol Jises, oupwe kilisou ngeni Kot ewe Sam me ren i.
18 Ámi fefin kana, oupwe onómukemi fán nemenien pwúlúwemi kewe, pún ina met chón tapweló mwirin ewe Samol repwe féri.
19 Ámi mwán kana, oupwe sópweeló le tongei pwúlúwemi kewe me ousap song ngeniir.*
20 Ámi naw kana, oupwe álleasochisi sememi kewe me inemi lón mettóch meinisin, pún iei met a apwapwaai ewe Samol.
21 Ámi sam kana, ousap asonga néúmi kewe pwe rete letipengaw.
22 Ámi slave kana, oupwe álleasochisi néúmi kewe masta lón mettóch meinisin, esap mwen meser chék ren ámi oupwe chék apwapwaai aramas, nge epwe seni enletin letipemi fiti ámi niwokkusiti Jiowa.*
23 Ese lifilifil met oupwe féri, oupwe féri seni unusen letipemi me péchékkúlemi fán iten Jiowa* nge esap fán iten aramas,
24 pún oua silei pwe Jiowa* epwe ngenikemi ewe álemwir pwe liffangemi. Oupwe angang ngeni Kraist, ewe Masta.
25 Ese fókkun wor tipemwárámwár pwe ewe emén mi féri minne mi ngaw epwe angei liwinin an féffér, pún Kot ese aapaap.
Footnote
^ Me lóóm ei kapas a weneiti ekkewe aramas ese wor ésúfélúr pokiten féfférúr me éérenier.
^ Are “fénéúfengenikemi.”
^ Are “fókkun lingeringeritiir.”
