Me ren Jon 6:1-71
6 Mwirin ei, Jises a feiló epek ewe Setin Kalili,* are Taipirios.
2 Me eú mwichemmóngun aramas ra chék tattapweló mwirin i, pún ra kakkatol ekkewe manaman i a féri ren an echikara ekkewe mi samaw.
3 Iwe, Jises me néún kewe chón káé ra feitá wóón eú chuuk me ra móttiw ikena.
4 Iei a arapoto ewe Pasofer, ewe ránin chulap án chón Jus.
5 Lupwen Jises a chimwetá a kúna pwe eú mwichemmóngun aramas ra pwereto ren, a ereni Filip: “Ia sipwe kamé pilawa ie pwe ekkeei aramas repwe mwéngé?”
6 Iwe nge, a apasa ei pwe epwe sótuni i, pún Jises a fen silei met epwe féri.
7 Filip a pélúweni: “Úkúúkún pilawa mi mé ren 200 denarii,* esap naf ngeni emén me emén leir ar repwe mwo nge áni ekis.”
8 Andru, emén me lein néún kewe chón káé, pwiin Simon Piter, a ereni:
9 “Iei i ei kúkkún át mi wor ren nifféú féún pilawaan parli* me rúúemén kúkkún iik. Ifa ussun ekkeei repwe naf ngeni ei chómmóngun aramas?”
10 Jises a apasa: “Oupwe ereni ekkeei aramas ar repwe mómmóót.” Pokiten a watte sipa lón ei leeni, ekkewe aramas ra móttiw ikena. Lein ei mwichen aramas, a wor ina epwe 5,000 mwán.
11 Jises a angei ewe pilawa, me mwirin an kilisou ngeni Kot, a eineti ngeni chókkewe mi mómmóót ikena, ina met a pwal fér ngeni ekkewe kúkkún iik, me ra mwéngé úkúúkún ar mochen.
12 Nge lupwen ra métúló, a ereni néún kewe chón káé: “Oupwe ionifengeni ekkewe lusun pwe esap solap.”
13 Iwe, ra ionifengeniir me oura 12 chúúk ren lusun chókkewe mi mwéngé seni ekkewe nifféú féún pilawaan parli.
14 Lupwen ekkewe aramas ra kúna ewe esissil a féri, ra poputá le apasa: “Wesewesen iei i ewe Soufós epwe feito ngeni fénúfan.”
15 Iwe, pokiten Jises a silei pwe repwele feito me turufi i pwe repwe néúni king, a áláeménúló le feilósefál ngeni ewe chuuk.
16 Lupwen a lekunioletiw, néún kewe chón káé ra feitiw órosset,
17 me ra tétá wóón efóch waa, ra sáiló lón ewe sáát ngeni Kaperniom. Lón ei atun a fen kirocholó, nge Jises esaamwo etto rer.
18 Pwal och, ewe sáát a lóólótá ren enienin eú mélúmél mi péchékkúl.
19 Iwe nge, lupwen ra fétún, ina epwe úlúngát are rúáánú mwail* ra kúna Jises an feffetál wóón ewe sáát me a arapoto ngeni ewe waa, iwe ra niwokkus.
20 Nge a ereniir: “Ngang ei, ousap niwokkus!”
21 Iwe, ra pwapwa le atétáái wóón ewe waa, me mwittir chék ewe waa a tori ewe fénú repwe feiló ngeni.
22 Sorotá, ewe mwichen aramas mi nóm epek ewe sáát ra kúna pwe ese chúen nóm ewe kúkkún waa ikena. Ra mirititi pwe Jises ese fiti néún kewe chón káé le tétá wóón ena waa, pwe néún kewe chék chón káé ra ló.
23 Iwe nge, ekkewe waa seni Taipirios ra wareiti ewe leeni arap ngeni ikewe ra mwéngé ie ewe pilawa mwirin án ewe Samol kilisou ngeni Kot.
24 Iwe, lupwen ewe mwichen aramas ra kúna pwe Jises, pwal mwo nge néún kewe chón káé rese nóm ikena ie, ra tétá wóón waar kewe me sáiló ngeni Kaperniom pwe repwe kútta Jises.
25 Lupwen ra kúna i me ewe epek, ra ereni: “Rappai, ineet ke tikeri ikeei?”
26 Jises a pélúweniir: “Enlet úpwe erenikemi, oua kúttaei esap ren ámi kúna ekkewe esissil, nge ren ámi mwéngé ekkewe pilawa me métúló.
27 Ousap angang fán iten ewe mwéngé epwe móróló, nge oupwe angang fán iten ewe mwéngé epwe nóm fán iten manaw esemuch, ewe, ewe Néún aramas epwe ngenikemi, pún ren ei emén, ewe Sam, pwisin Kot, a fen onómu wóón an esissillen tipeeú ngeni.”
28 Iwe ra ereni: “Met a lamot áúpwe féri pwe áúpwe apwénúetá án Kot kewe angang?”
29 Lón án Jises pélúweni a ereniir: “Iei án Kot we angang pwe oupwe anganga ámi lúkú lón ewe emén i a tiinaato.”
30 Iwe ra ereni: “Menni ewe angang ka féri pwe eú esissil, pwe áúpwe tongeni kúna me lúkuk? Menni angang ka féri?
31 Semelapach kewe ra mwéngé ewe mana me lón ewe fénúpéén, ussun chék met a makketiw: ‘A ngeniir pilawa seni láng pwe repwe mwéngé.’ ”
32 Mwirin, Jises a ereniir: “Enlet úpwe erenikemi, esap Moses ewe a ngenikemi ewe pilawa seni láng nge Semei we a ngenikemi ewe pilawa mi enlet seni láng.
33 Pún ewe pilawa Kot a fangoto, i ewe mi feitiw seni láng me awora manaw ngeni fénúfan.”
34 Ina minne ra ereni: “Samol, kopwe ngenikem ei pilawa fansoun meinisin.”
35 Jises a ereniir: “Ngang ewe pilawaan manaw. Ié a feito rei esap fókkun chúen echik, me ié a anganga an lúkú lón ngang esap fókkun chúen kaka.
36 Nge ussun met úa fen erenikemi, ámi oua fen kúnaei nge ouse lúkú.
37 Meinisin chókkewe ewe Sam a ngeniei, repwe feito rei, me ewe emén mi feito rei úsapw fókkun asúoló,
38 pún úa feitiw seni láng ái úpwe féri letipen ewe mi tiinieito, nge esap pwisin letipei.
39 Iei letipen ewe mi tiinieito, pwe meinisin chókkewe a ngeniei resap péút seniei, nge úpwe amanaweretá lón ewe sáingoon rán.
40 Pún iei letipen Semei we, ié mi etiwa ewe Naw me anganga an lúkú lón i epwe kúna manaw esemuch me úpwe amanawaatá i lón ewe sáingoon rán.”
41 Iwe, ekkewe chón Jus ra poputá le ngúnúngúnú pún a apasa: “Ngang ewe pilawa mi feitiw seni láng.”
42 Me ra poputá le apasa: “Esap iei i Jises néún Josef we, ewe kich mi sissilei seman kewe me inan? Pwata iei a apasa, ‘Ngang úa feitiw seni láng’?”
43 Lón án Jises pélúweni a ereniir: “Oupwe úkútiw le ngúnúngún lefilemi.
44 Ese wor emén epwe tongeni feito rei iká pwe ewe Sam, ewe mi tiinieito, esap pani i, me úpwe amanawaatá i lón ewe sáingoon rán.
45 A makketiw lón makkeien ekkewe soufós: ‘Iir meinisin repwe káit me ren Jiowa.’* Meinisin mi aúseling ngeni ewe Sam me káé seni repwe feito rei.
46 Esap weween nge aramas ra kúna ewe Sam, lúkún chék ewe emén mi feito seni Kot, ei emén a kúna ewe Sam.
47 Enlet úa erenikemi, ié a lúkú, a eáni manaw esemuch.
48 “Ngang ewe pilawaan manaw.
49 Semelapemi kewe ra mwéngé ewe mana lón ewe fénúpéén nge ra chúen máló.
50 Iei ewe pilawa mi feitiw seni láng pwe ié epwe mwéngé seni esap máló.
51 Ngang ewe pilawa mi manaw mi feitiw seni láng. Iká ié a mwéngé seni ei pilawa epwe manaw tori feilfeiló chék. Ren enletin, ewe pilawa úpwe fangoló fán ásengesin manawen fénúfan ina futukei.”
52 Mwirin, ekkewe chón Jus ra poputá le áninifengen lefiler, ra apasa: “Ifa ussun án ei mwán epwe ngenikich futukan ach sipwe áni?”
53 Iwe, Jises a ereniir: “Enlet úpwe erenikemi, iká ousap mwéngé futuken ewe Néún aramas me únúmi chchaan, esap wor manaw lón ámi.
54 Ié a mwéngé futukei me únúmi chchaai epwe kúna manaw esemuch, me úpwe amanawasefálietá lón ewe sáingoon rán.
55 Pún futukei ina enletin mwéngé me chchaai ina enletin minen ún.
56 Ié a mwéngé futukei me únúmi chchaai, i me ngang áúpwe chék eú.
57 Ussun chék án ewe Sam mi manaw tiinieito me ngang úa manaw pokiten ewe Sam, ina pwal ussun ren ewe emén mi mwéngé futukei epwe manaw pokiten ngang.
58 Iei ewe pilawa mi feitiw seni láng. Esap ussun ewe semelapemi kewe ra mwéngé nge ra chúen máló. Ié mi mwéngé ei pilawa epwe manaw tori feilfeiló chék.”
59 A apasa ekkeei mettóch, atun an asukul lón ewe sinakok* lón Kaperniom.
60 Lupwen ra rong ei, chómmóng me lein néún kewe chón káé ra apasa: “Ei kapas a kon péchékkúl, ié a tongeni aúseling ngeni?”
61 Nge Jises a silei pwe néún kewe chón káé ra ngúnúngúnfengen ussun ei, a ereniir: “Oua chepetek ren ei mettóch?
62 Ina minne, epwe ifa iká oua kúna ewe Néún aramas an feitá ngeni ikewe ia a nónnóm ie me mwan?
63 Ewe ngún mi fel ina ewe mi awora manaw, ewe futuk ese fókkun wor lamotan. Ekkewe kapas úa apasa ngenikemi ra pop seni ewe ngún mi fel me ra awora manaw.
64 Nge mi wor ekkóch me leimi ouse lúkú.” Pún Jises a fen silei seni lepoputáán chókkewe rese lúkú me ewe emén epwe afangemá i.
65 A sópweeló le apasa: “Iei popun úa erenikemi, ese wor emén epwe tongeni feito rei iká ewe Sam ese mochen uweato rei.”
66 Pokiten ei, chómmóng me lein néún kewe chón káé ra liwiniti ekkewe mettóch ra fen likitaaló me rese chúen tapweló mwirin.
67 Iwe, Jises a ereni ekkewe Engol me Rúúemén: “Met, ouse pwal mochen feiló?”
68 Simon Piter a pélúweni: “Samol, ié áúpwe feiló ren? A nóm reom ewe kapasen manaw esemuch.
69 Áúa lúkú me silei pwe en ewe Emén mi Pin me tiitiito me ren Kot.”
70 Jises a pélúweniir: “Esap pwe ngang úa filikemiitá ekkeei engol me rúúemén? Nge emén me leimi i chón pweni.”*
71 Ren enletin, i a fósun Jutas néún Simon Iskariot we, pún ei emén epwele afangemá i inaamwo iká i emén me lein ekkewe Engol me Rúúemén.
Footnote
^ Féún pilawa mi ffér seni eú sókkun pilawa mi ámás mi mékúkkún seni ewe pilawa mi ámás mi ffér seni wiich, me lape ngeni ekkewe mi mwelele ra mwémmwéngé.
^ Are ese mwáál, “mwicheichen aramas.”
^ Are “emén tefil.”
