Me ren Jon 4:1-54
4 Lupwen Jises* a kúna pwe ekkewe Farisi ra rong pwe i a néúni me papataisi chómmóng chón káé lap seni Jon,
2 (inaamwo iká Jises ese pwisin féri angangen papatais nge néún kewe chón káé ra féri)
3 i a ló seni Jutia me feilósefál Kalili.
4 Nge a lamot ngeni an epwe pwer Sameria.
5 Iwe, a tori eú telinimw lón Sameria itan Saikar, arapakkan ngeni ewe fénú Jekop a ngeni néún we Josef.
6 Nge án Jekop we ito a nóm ikena ie. Iei Jises a pekkus ren an sáittam, iwe a móttiw ren ewe ito.* Ina epwele awonuen kulók.*
7 Emén fin Sameria a feito pwe epwe úfúf konik. Jises a ereni: “Kese mochen kopwe ngeniei och konik.”
8 (Pún néún kewe chón káé ra feiló ngeni ewe telinimw pwe repwe kamé mwéngé.)
9 Iwe, ewe fin Sameria a ereni: “En emén chón Jus, iwe pwata ka tingoreei únúmom konik nge ngang emén fin Sameria?” (Pún chón Jus rese kan chiechifengen me chón Sameria.)
10 Lón án Jises pélúweni a ereni: “Iká ka silei ussun ewe liffang ese kamé me ren Kot me ié ei a erenuk, ‘Kese mochen kopwe ngeniei och konik,’ itá kopwe fen tingorei i me epwe ngonuk ewe konikin manaw.”
11 Neminna a ereni: “Samol,* ese mwo nge wor óm pwekit óm kopwe úfúf konik, me ewe ito a alóllóól. Iwe, seni ia ei konikin manaw kopwe ngeniei?
12 Ifa ussun, ka lap seni semelapem we Jekop, ewe mi ngenikem ewe ito, me i fengen me néún kewe pwal néún kewe kou ra ún seni?”
13 Lón án Jises pélúweni a ereni: “Meinisin mi ún seni ei konik repwe kakasefál.
14 Ié mi ún seni ewe konik úpwe ngeni, esap fókkun chúen kakasefál, nge ewe konik úpwe ngeni i, epwe wiliiti eú puwachen konik mi puropuretá lón i pwe epwe ngeni manaw esemuch.”
15 Ewe fefin a ereni: “Samol,* kopwe ngeniei ei konik pwe úsapw chúen kakasefál are feffeito lón ei leeni ái úpwe úfúf konik.”
16 A ereni neminna: “Kopwe feiló, kéri pwúlúwom we me feito ngeni ei leeni.”
17 Ewe fefin a pélúweni: “Ese wor pwúlúwei.” Jises a ereni: “Mi pwúng óm apasa, ‘Ese wor pwúlúwei.’
18 Pún a fen wor nimmén pwúlúwom, me ewe mwán mi nóm reom iei esap pwúlúwom. Minne ka apasa mi enlet.”
19 Ewe fefin a apasa: “Samol,* úa meefi pwe en emén soufós.
20 Semelapem kewe ra fel wóón ei chuuk, nge ámi oua erá pwe aramas repwe chék fel lón Jerusalem.”
21 Jises a ereni: “Fefin, kopwe lúkúei, ewe fansoun epwe feito lupwen ousap fel ngeni ewe Sam wóón ei chuuk are lón Jerusalem.
22 Ámi oua fel ngeni met ouse silei, nge ám áúa fel ngeni met ám mi silei, pún amanaw a poputá ren ekkewe chón Jus.
23 Nge ewe fansoun epwe feito, iei a fen nóm, lupwen ekkewe chón fel mi enlet repwe fel ngeni ewe Sam lón ngún me enlet, pún ren enletin, ewe Sam a kúkkútta ei sókkun aramas ar repwe fel ngeni i.
24 Kot emén ngún,* me a lamot chókkewe mi fel ngeni repwe fel ngeni lón ngún me enlet.”
25 Ewe fefin a ereni: “Ngang mi silei pwe ewe Messaia epwe feito, ewe mi iteni Kraist. Lupwen ena emén epwe feito, i epwe esile ngenikich mettóch meinisin.”
26 Jises a ereni: “Ngang i, ewe emén mi kakkapas ngonuk.”
27 Iwe néún kewe chón káé ra war, me ra máirú ren an fóffós ngeni emén fefin. Iwe nge, ese wor emén a apasa: “Met ka mochen?” are “Pwata ka fós ngeni neminna?”
28 Iwe, ewe fefin a likitaaló an we leenien konik me feiló ngeni ewe telinimw me ereni ekkewe aramas:
29 “Oupwe etto me katol enan mwán mi ereniei mettóch meinisin úa féri. Esap fen iei i ewe Kraist?”
30 Ra ló seni ewe telinimw me poputá le feiló ren i.
31 Lón ei atun, ekkewe chón káé ra pesei i: “Rappai, kopwe mwéngé.”
32 Nge a ereniir: “Mi wor enei mwéngé ámi ouse silei ussun.”
33 Iwe, ekkewe chón káé ra eráfengen lefiler: “Ese wor emén a uwouto anan, iká met?”
34 Jises a ereniir: “Enei mwéngé ina ái féri letipen ewe mi tiinieito me áwesaaló an angang.
35 Esap pwe oua apasa pwe mi chúen wor rúáánú maram me mwen an epwe tori ewe fansoun kinikin? Nengeni! Úa erenikemi: Oupwe katol ekkewe málámál pún ra fen pwechepwech fán iten kinikin uwa.
36 Ewe chón kinikin a fen angei liwinin me ikkionfengeni ekkewe uwa fán iten manaw esemuch pwe ewe chón amwora me ewe chón kinikin repwe tongeni pwapwafengen.
37 Pún a iei ussun enletin ewe kapas: Emén chón amwora me pwal emén chón kinikin.
38 Úa tinikemiiló pwe oupwe kini met ouse anganga. Ekkewe ekkóch ra anganga, nge ámi oua tolong lón feiéchún ar angang.”
39 Chómmóng me lein ekkewe chón Sameria seni ena telinimw ra lúkú lón i pokiten ekkewe kapas ewe fefin a pwáraatá, a apasa: “A ereniei meinisin ekkewe mettóch úa féri.”
40 Iwe, lupwen ekkewe chón Sameria ra feito ren i, ra tingorei an epwe nómotiw rer, me i a nómotiw ikena ruu rán.
41 Iwe, chómmóng ra pwal lúkú pokiten ra rongorong minne a asukula,
42 me ra ereni ewe fefin: “Áúse chék lúkú pokiten met ka apasa, pún ám áúa pwisin rong me áúa silei pwe ei mwán wesewesen i ewe chón amanawa fénúfan.”
43 Mwirin ekkewe ruu rán, a ló seni ikena me feiló Kalili.
44 Iwe nge, pwisin Jises a pwáraatá pwe emén soufós esap wor súfélún me lón wesetáán leenian.
45 Iwe, atun a wareiti Kalili, ekkewe chón Kalili ra etiwa i pokiten ra fen kúna ekkewe mettóch meinisin a féri me lón Jerusalem atun ewe ránin chulap, pún iir ra pwal ló fiti ewe ránin chulap.
46 Mwirin a liwinsefáliló Kana lón Kalili, ikewe a ewili ewe konik ngeni wain me ie. Iwe, a wor emén chón angang ngeni ewe king lón Kaperniom, ewe néún át a semmwen.
47 Lupwen ei mwán a rong pwe Jises a feito seni Jutia ngeni lón Kalili, i a feiló ren me tingorei an epwe feitiw me echikara néún we át pún arap ngeni epwele máló.
48 Nge Jises a ereni: “Ámi aramas, iká ouse kúna esissil me manaman, sanne oupwe fókkun lúkú.”
49 Ewe chón angang ngeni ewe king a ereni: “Samol, kopwe feitiw me mwen án nei we epwe máló.”
50 Jises a ereni: “Kopwe feiló, noum we át a chikar.” Ewe mwán a lúkú minne Jises a apasa ngeni, me a feiló.
51 Nge atun an a feffeitiw, néún kewe slave ra chuuri ar repwe ereni pwe néún we át a chikar.
52 Iwe a eisiniir iká kulók fite a chikar. Ra pélúweni i: “Ewe pwichikkar a mwó seni nánew lón ewe efisuen kulók.”*
53 Iwe, ewe sam a silei pwe ina wesewesen ewe kulók Jises a ereni: “Noum we át a chikar.” Iwe, i me unusen chón leimwan ra lúkú.
54 Iei ewe oruuen esissil Jises a féri atun a feito seni Jutia ngeni lón Kalili.
Footnote
^ Krik, “ewe Samol.”
^ Are “chénúttu; puwach.”
^ Ina epwe 12:00 leolowas.
^ Ei kapas “Samol” ikeei, eú itelap fán iten ésúúfél.
^ Ei kapas “Samol” ikeei, eú itelap fán iten ésúúfél.
^ Ei kapas “Samol” ikeei, eú itelap fán iten ésúúfél.
^ Are “Kot i emén sise tongeni kúna.”
^ Ina epwe 1:00 p.m.
