Ngeni Chón Ipru 13:1-25
13 Oupwe sópweeló lón ámi tongen pwipwi.
2 Oupwe chechchemeni le awasélai aramas,* pún ekkóch ra etiwa chónláng inaamwo iká rese tepereni.
3 Oupwe chechchemeni chókkewe mi nóm lón imwen kalapus, ussun itá nge oua pwal fitiir le kalapus. Oupwe pwal chechchemeni chókkewe aramas ra kirikiringaw ngeniir, ussun itá nge oua pwal fitiir lón ar riáfféú.
4 Aramas meinisin repwe asamolu ewe ririin pwúpwúlú me resap elimengawa ewe kiekien pwúpwúlú, pún Kot epwe apwúngú meinisin chókkewe mi féri tipisin lisowumwáál,* ese lifilifil iká iir mi lipich are iir mi pwúpwúlú.
5 Ousap tongei moni, nge oupwe fen menemenéch ren ekkewe mettóch mi wor remi iei. Pún Kot a erá: “Úsapw fókkun likitukoló me úsapw fókkun péútukoló.”
6 Ina minne, sia tongeni apasa fán ach unusen lúkúlúk: “Jiowa* ái chón álillis, úsapw fókkun niwokkus. Met aramas repwe tongeni féri ngeniei?”
7 Oupwe chechchemeni chókkewe mi wisen emmwenikemi, iir kewe mi apwóróusa ngenikemi án Kot kapas, me atun oua ekieki ussun féffér múrinnéér, oupwe áppirú ar lúkú.
8 Jises Kraist ese siwil seni nánew, tori ikenái me tori feilfeiló.
9 Ousap tupuló ren sókkopaten afalafal me káit mi sókkóló. Oupwe lúkúlúk wóón án Kot kirekiréch mi somwoló an epwe apéchékkúla letipemi, nge ousap lúkúlúk wóón mwéngé.* Chókkewe mi kon aúcheani mwéngé, rese kúna álillis seni.
10 A wor rech eú róngen asor, me ese wor án chókkewe mi eáni angang mi pin lón ewe imwenfel mangaku pwúúng* le mwéngé seni ena róngen asor.
11 Pún ekkena mwán ra kenaaló inisin ekkewe man lúkún ikewe aramas ra imweimw ie. Nge ewe souasor mi lapalap a uwealong chchaan ekkena man lón ewe leeni mi pin pwe asoren omusomusen tipis.
12 Iei minne, Jises a pwal kúna riáfféú lúkún asamen ewe telinimw pwe epwe epinaaló ekkewe aramas ren pwisin chchaan.
13 Iwe, ousipwe feiló ren lúkún ikewe aramas ra imweimw ie pwe sipwe kúna itengaw ussun chék i,
14 pún ese wor rech eú telinimw mi nómoffóch, nge sia mwétéres le witiwiti ewe eú epwe fférútá lón mwachkkan.
15 Ren Jises, ousipwe isettá ngeni Kot ach asoren mwareiti iteitan, weween uwaan tunawach, ewe sia áeá le esilei ngeni aramas itan we.
16 Pwal och, ousap ménúki le eáni féfféréch me áeáái ekkewe ekkóch met mi wor remi, pún Kot a fókkun pwapwa ren ekkena esin asor.
17 Oupwe álleasochisi chókkewe mi wisen emmwenikemi me onómukemi fán emmwenier pún iir ra mammasakemi me Kot epwe apwúngúúr. Iká oua féri ena, iwe repwe féri ar angang fán pwapwa nge esap fán letipechou, pwe ena epwe tongeni efeiengawakemi.
18 Oupwe sópweeló le iótek fán item, pún áúa lúkúlúk pwe áúa eáni eú mwelien letip mi múrinné,* me áúa mochen wenechar lón mettóch meinisin.
19 Nge úa ákkáeúin pese ngenikemi ámi oupwe iótek pwe úpwe liwinitikemi ekiseló chék.
20 Iwe, amwo ewe Koten kinamwe, ewe a amanawasefáli ach Samol Jises, ewe chón masen siip mi lap, ewe a isettá ngeni Kot ewe chcha fán iten eú pwonen etipeeú esemuch,
21 epwe atufichikemi ren mettóch meinisin mi múrinné pwe oupwe féri letipan. Epwe néúnéú Jises Kraist an epwe amwékútúkich le féri minne mi apwapwaai i. Amwo Kot epwe angei ling feilfeiló chék. Amen.
22 Ámi pwii kana, iei úa pese ngenikemi ámi oupwe likiitú le aúseling ngeni ei kapasen apéchékkúl, pún mi chék mwoch ewe taropwe úa makkeei ngenikemi.
23 Úa mochen esile ngenikemi pwe pwiich we Timoty a musowu. Iká epwe warekkáito, áúpwe mwin le ló chuurikemi.
24 Oupwe uwei ái kapwong ngeni meinisin chókkewe mi emmwenikemi me meinisin ekkewe chón pin. Chókkewe mi nóm Italy ra tiinaaló ar kapwong ngenikemi.
25 Án Kot kirekiréch mi somwoló epwe nónnóm remi meinisin.
Footnote
^ Are “kirekiréch ngeni emén sise sissilei.”
^ Ina, ekkewe allúk ussun mwéngé.
^ Krik, “nemenem.”
^ Are “wenechar.”
