Ngeni Ekkewe Chón Filipai 3:1-21
3 Ina minne, ámi pwii kana, oupwe sópweeló ámi pwapwa lón ewe Samol. Ese áweires ngeniei ái úpwe pwal makkeei ekkewe mettóch úa fen piin makkeei ngenikemi, pokiten ina met epwe túmúnúkemi.
2 Oupwe túmúnúkemi seni ekkewe aramas mi limengaw.* Oupwe túmúnúkemi seni chókkewe mi efisi feiengaw. Oupwe túmúnúkemi seni chókkewe mi álisaatá angangen sirikomsais.
3 Pún kich chókkewe mi eáni ewe enletin sirikomsais, sia eáni angang mi pin ren án Kot we ngún mi fel me sia sikásini Kraist Jises me sise alónga ach lúkúlúk wóón mettóchun aramas.
4 Ikáámwo ina, nge mi wor popun ái úpwe lúkúlúk wóón ekkena mettóch lap seni ekkewe pwal ekkóch aramas pokiten
5 úa sirikomsais lón ewe awanúen rán. Ngang seni ewe mwúún Israel, seni ewe einangen Peniamin. Ngang emén chón Ipru, upun wóón chón Ipru. Ngang emén Farisi lón ái álleasochisi ewe Allúk.
6 Úa tinikken le eriáfféwú ewe mwichefel, me úa fókkun fiti met ewe allúk a apasa pwe a pwúng.
7 Nge ekkewe mettóch úa aúcheaniir me lóóm, iei úa unusen likitiireló fán pwapwa pokiten ewe Kraist.
8 Lap seni ena, me rei mettóch meinisin ra lamotongaw pokiten wakkatteen aúchean ewe sile ussun Kraist Jises ái Samol. Úa likitaaló mettóch meinisin fán itan, me úa ekieki pwe ekkena mettóch ra lamotongaw,* pwe úpwe tongeni ririéch ngeni Kraist,
9 me emén chón tapweló mwirin. Nge ngang úse erá pwe ngang chón pwúng pokiten ái álleasochisi ewe Allúk, nge pokiten ái lúkúlúk lón Kraist, úa emén chón pwúng. Enlet, ekkewe chón lúkúlúk lón Kraist, iir aramas pwúng me ren Kot.
10 Úa achocho ngeni ái úpwe silei i me silei manamanen an we manawsefál me fiti i lón an kewe riáfféú, úa mmólnetá le mááni ewe esin máló a eáni,
11 pwe úpwe kúna iká mi tufich ái úpwe emén me lein chókkewe repwe akkomw manawsefál seni máló.
12 Esap weween nge úa fen angei ewe win are úa fen tikeri unuséch, nge úa fókkun achocho ngeni pwe úpwe tongeni angei ewe win, pún úa silei pwe Kraist Jises a fen filieitá fán itan.
13 Ámi pwii kana, úsaamwo ekieki pwe úa angei, nge iei met úa féri: Úa ménúkaaló ekkewe mettóch mi nóm lúkúsékúrúi nge úa éttúresi ekkewe mettóch mi nóm mwei.
14 Úa fókkun achocho ngeni ái úpwe angei ewe win. Ena win, ina ewe manaw lón láng, ewe Kot epwe ngeni chókkewe a kériir me ren Kraist Jises.
15 Ina minne, chókkewe me leich mi ásimaw lón lúkú, ousipwe eáni ekiek me ren ekkewe mettóch úa fen erenikemi ussur, nge iká esap ina ussun ámi ekiek, Kot epwe álisikemi le eáni ei esin ekiek.
16 Iwe nge, ese lifilifil úkúúkún feffeitáách, sipwe chék sópweeló le feffeitá lón ei esin napanap.
17 Ámi pwii kana, oupwe áppirúei, me oupwe sópweeló le nennengeni chókkewe mi etipeeúfengeni manawer ngeni ewe manaw áúa áiti ngenikemi.
18 Pún a chómmóng chókkewe úa fósur fán chómmóng, nge iei úa kechiw atun úa fósur, pokiten ra manaweni manawen chón oputa án Kraist we iráán ninni.*
19 Sópwólóór ina kitetter, ar kot ina nuuker, linger ina wesewesen ássáwer, me ekiekiir a fót wóón mettóchun fénúfan.
20 Nge kich chón wiliposun láng, me sia mwétéres le witiwiti emén chón amanaw seni ikena, ina i ewe Samol Jises Kraist.
21 I epwe áeá an we manaman mi lapalap mi atufichi an epwe nemeni mettóch meinisin me epwe ekkesiwili inisich mi apwangapwang an epwe ussun inisin we mi ling.
