Eú Pwáraatá Ngeni Jon 2:1-29
2 “Kopwe mak ngeni ewe chón kúné lón ewe mwichefel lón Efisus: Ikkeei ekkewe mettóch ewe mi kémwéch ekkewe fúúféú fúú lón péúmwáánin péún me fetál lein ekkewe fisu leenien lamp mi ffér seni kolt a apasa:
2 ‘Úa silei óm kewe féffér, me óm angang me likiitú, me óm kese tongeni etiwa ekkewe aramas mi ngaw, me óm sótuni chókkewe mi erá pwe iir aposel nge esap iir aposel, me ka kúna pwe iir chón kapas chofona.
3 Ka pwal pwáári óm likiitú, me ka tipeppós fán ásengesin itei me kese achaanú.
4 Nge iei met úse tipeeú ngonuk wóón, ka likitaaló ewe tong ka eáni me lepoputáán.
5 “ ‘Ina minne, kopwe chemeni ia ka ttur me ie, me kopwe áier, me féri ekkewe féffér ka féfféri me akkomwan. Iká kese féri ena, ngang úpwe feiló reom me angei óm we leenien lamp seni lón leenian, chilóón chék iká ke áier.
6 Nge a wor och mettóch mi pwúng ka féri. Ka oput féfférún ewe lamalam án chón Nikolaus, ewe úa pwal oputa.
7 Emén mi wor selingan, epwe aúseling met ewe ngún mi fel a apasa ngeni ekkewe mwichefel: Ewe mi pworacho, úpwe mut ngeni an epwe mwéngé seni ewe iráán manaw, ewe mi nóm lón án Kot we paratis.’
8 “Me kopwe mak ngeni ewe chón kúné lón ewe mwichefel lón Smirna: Ikkeei ekkewe mettóch a apasa, ‘ewe Akkomwan me ewe Amuchúlóón,’ ewe a máló me manawsefál:
9 ‘Úa silei óm riáfféú me wéúngaw—nge ka pisekisek—pwal óm kúna turunufas seni chókkewe mi eita ngeni pwisin iir chón Jus, nge ren enletin esap iir chón Jus, nge iir án Setan sinakok.
10 Kosap niwokkus ren ekkewe mettóch kopwele riáfféú ren. Nengeni, ewe Tefil epwe sópweeló le oturaalong ekkóch me leimi lón imwen fétek pwe oupwe unusen kúna sóssót, me kúna riáfféú lón úkúúkún engol rán. Kopwe ánneta óm túppwél pwal mwo nge tori máló, me úpwe ngonuk ewe mwárin manaw.
11 Emén mi wor selingan, epwe aúseling met ewe ngún mi fel a apasa ngeni ekkewe mwichefel: Ewe mi pworacho, esap fókkun kúna ewe oruuen máló.’
12 “Kopwe mak ngeni ewe chón kúné lón ewe mwichefel lón Perkamom: Ikkeei ekkewe mettóch ewe mi wor ren efóch ketilas mi ttam me kken me rúúepek a apasa:
13 ‘Úa silei ia ka nóm ie, lón ewe leeni ia án Setan leenien móótun king a nóm ie. Iwe nge, ka kémwéchúnúk itei, me kese amam óm lúkúei pwal mwo nge lón fansoun Antipas we, nei we chón pwáraatá mi túppwél, ewe a ninniiló ikewe ka nóm ie, lón ewe leeni Setan a nóm ie.
14 “ ‘Nge mi wor ekkóch mettóch úse tipeeú ngonuk wóón. A wor reom chókkewe mi fitaaló met Palam a eáni káit, átewe mi áiti ngeni Palak an epwe isettiw och minen chepetek mwen ekkewe chón Israel, ren ar repwe áni ekkewe mwéngé mi piin asor ngeni uluulun, me repwe féri féfférún lisowumwáál.*
15 Ina chék ussun, a pwal wor reom chókkewe mi fitaaló áitien ewe lamalam án chón Nikolaus.
16 Ina minne, kopwe áier. Iká kese áier, úpwe mwittir feiló reom me maun ngeniir fán ewe ketilas mi ttam mi itiwu seni lón awei.
17 “ ‘Emén mi wor selingan, epwe aúseling met ewe ngún mi fel a apasa ngeni ekkewe mwichefel: Ewe mi pworacho, ngang úpwe ngeni och ewe mana mi koopoló, me úpwe ngeni eféú faw mi pwech mi mak wóón eú it minefé ese wor emén a silei chilóón chék ewe mi angei.’
18 “Kopwe mak ngeni ewe chón kúné lón ewe mwichefel lón Taiataira: Ikkeei ekkewe mettóch ewe Néún Kot a apasa, ewe emén mesan a ussun pulopulen ekkei me pechen ra ussun piras mi meriweriw:
19 ‘Úa silei óm kewe féffér, me óm tong me óm lúkú me óm angang ngeni Kot me óm likiitú, me óm kewe féffér iei ra lap seni óm kewe féffér me akkomwan.
20 “ ‘Nge iei ewe mettóch úse tipeeú ngonuk wóón, ka mut ngeni ena fefin mi ussun chék Jesepel, ewe mi eita ngeni pwisin i emén soufós fefin, me asukula me otupu nei kewe chón angang ar repwe féri féfférún lisowumwáál me áni ekkewe mwéngé mi piin asor ngeni uluulun.
21 Me úa mut ngeni fansoun an epwe áier, nge ese mochen áier seni an tipisin lisowumwáál.*
22 Nengeni, úpwele oturaatá neminna wóón eú kiekien samaw, nge chókkewe mi lisowumwáál ngeni repwe nóm lón watteen riáfféú, chilóón chék iká repwe áier seni ekkewe féffér mi ussun án neminna kewe féffér.
23 Me úpwe nieló néún neminna kewe ren eú semmwen mi chou, pwe meinisin ekkewe mwichefel repwe silei pwe ngang ewe úa etittina alóllóólun ekiek me letip, me úpwe ngeni emén me emén leimi liwinin an féffér.
24 “ ‘Nge úa erenikemi ekkewe mi nóm lón Taiataira, ámi meinisin ekkewe ouse fitaaló áitien Jesepel, me ouse silei ekkewe asukul mi chofona mi feito seni Setan: Ngang úsapw onómu wóómi eú sókkun chou.
25 Iwe nge, oupwe kémwéchúnúk met mi wor remi tori ái úpwe war.
26 Me ewe mi pworacho me álleasochisi minne úa eáni allúk tori lesópwólóón, ngang úpwe ngeni nemenem wóón aramasen fénúfan,
27 ussun chék ewe nemenem úa angei seni Semei. Me i epwe nemenem wóón ekkewe aramas fán efóch wokumechá pwe repwe ninniiló ussun chék eú sepi pwúl mi mékkúkis.
28 Úpwe pwal ngeni ewe fúú rán.
29 Emén mi wor selingan, epwe aúseling met ewe ngún mi fel a apasa ngeni ekkewe mwichefel.’
