Eú Pwáraatá Ngeni Jon 16:1-21
16 Iwe, úa rong eú méngúngú mi léúwommóng seni lón ewe imwenfel a ereni ekkewe fúmén chónláng: “Oupwe feiló me ninatiw wóón fénúfan ekkewe fisu sepien án Kot song.”
2 Ewe áeménún chónláng a feiló me ninatiw masouen sepian we wóón fénúfan. Iwe, och rup mi fókkun ngaw me ámmetek a tori ekkewe aramas mi eáni esissillen ewe manmwacho me fel ngeni uluulun we.
3 Ewe arúúeménún chónláng a ninatiw masouen sepian we lón ewe mataw. Iwe, a wiliiti chcha ussun chchaan emén mi máló, me meinisin ménúmanaw lón ewe mataw ra máló.
4 Ewe aúlúménún chónláng a ninatiw masouen sepian we lón ekkewe chénúpupu me puwachen konik. Iwe, ra wiliiti chcha.
5 Me úa rong án ewe chónláng mi nemenem wóón ekkewe konik apasa: “En ewe Kot mi túppwél, ewe Emén mi nónnóm iei me ewe mi nónnóm me mwan. En mi pwúng, pún en ka wisen apwúngaló ekkena kapwúng,
6 pún iir ra ninatiw chchaan ekkewe mi pin me ekkewe soufós, me ka ngeniir chcha ar repwe únúmi. A fich ngeniir ena.”
7 Me úa rong eú méngúngú seni wóón ewe róóng, a apasa: “Ewer, Jiowa* Kot, en mi Unusen Manaman, óm kewe kapwúng ra enlet me pwúng.”
8 Ewe aféménún chónláng a ninatiw masouen sepian we wóón ewe akkar, me a mumu ngeni ewe akkar an epwe keni ekkewe aramas ren ekkei.
9 Iwe, aramas ra kkar ren watteen pwichikkaran. Iir rese áier nge ra turunufasa iten Kot we. Rese elingaaló Kot ewe mi wor an nemenem wóón ekkeei feiengaw.
10 Ewe enimménún chónláng a ninatiw masouen sepian we wóón án ewe manmwacho we leenien móótun king. Iwe, an we mwú a rocholó, me ekkewe aramas ra poputá le kkúú chénawer pokiten ewe metek ra meefi.
11 Ra turunufasa ewe Koten láng pokiten ewe metek ra meefi me rupuur kewe, me rese áier seni ar kewe féffér.
12 Ewe awonoménún chónláng a ninatiw masouen sepian we wóón ewe chénúpupu mi watte Iufretis, iwe, konikin lón a mwórótá pwe epwe ammólnatá alen ekkewe king seni ewe leenien tétáán akkar.*
13 Iwe, úa kúna úlúngát pwóróus mi limengaw* mi ussun káirú mi towu seni lón awen ewe trakon, seni awen ewe manmwacho, me seni awen ewe soufós chofona.
14 Ren enletin, ekkena pwóróus ra feito seni ekkewe timon me ra féri esissil, me ló ngeni ekkewe kingen unusen fénúfan pwe repwe emwichafengeniir lón ewe rán mi lap án ewe Kot mi Unusen Manaman.
15 “Nengeni, úa feito ussun emén chón solá. A pwapwa átewe mi chék nenneló me úféúf úfan kewe* pwe esap fetál fán an seleló me aramas resap kúna ássáwan.”
16 Me ra emwichafengeniir lón ewe leeni itan Armaketon* lón kapasen Ipru.
17 Ewe afúménún chónláng a ninatiw masouen sepian we lón ásepwál. Iwe eú méngúngú mi léúwommóng a towu seni wóón ewe leenien móótun king lón ewe imwenfel, me apasa: “A wesiló!”
18 Iwe, a fi inefi me wor méngúngú me púng chopulap, me a fis eú watteen chechchechin fénú esaamwo fis seni ewe atun aramas ra nóm wóón fénúfan. A fókkun watte ena chechchechin fénú.
19 Ewe telinimw mi lapalap a kinikinitiw lón úlúngát kinikin, me ekkewe telinimw lón unusen fénúfan ra turutiw. Kot a chemeni Papilon mi Lapalap me a ngeni neminna kapen wainen an we song mi lap.
20 Pwal meinisin ekkewe fénú* ra sú, me ekkewe chuuk ra móróló.
21 Iwe, útten faw mi fókkun féúmmóng úkúúkún choun eféú me eféú ina epwe eú talent,* ra turutiw seni láng wóón ekkewe aramas, nge ekkena aramas ra turunufasa Kot pokiten ewe feiengawen útten faw, pún ena feiengaw a fókkun watte.
Footnote
^ Are “seni éétiw.”
^ Krik, “ngún mi limengaw.”
^ Krik, “onómu ngeni úfan úféúfen lúkún.”
^ Krik, Har Ma·ge·don′, seni eú kapasen Ipru mi wewe ngeni “Chukun Mekito.”
^ Are “fénú lukanapen mataw.”
