Eú Pwáraatá Ngeni Jon 11:1-19
11 Iwe, emén a ngeniei efóch wok ussun efóch wokun aúkúk me apasa: “Kopwe feiló me aúkú ewe imwenfelin Kot me ewe róngen asor me chókkewe mi fel lón.
2 Nge kopwe likiti ewe kinikin lúkún ewe imwenfel, kosap pwal aúkú, pún Kot a fen ngeni aramasen ekkewe ekkóch mwú, me repwe puratiw ewe telinimw mi pin lón úkúúkún 42 maram.
3 Úpwe tiinaaló nei kewe rúúemén chón pwáraatá fán úfer seni tuuk pwe repwe osuni lón úkúúkún 1,260 rán.”
4 Ekkena rúúemén chón pwáraatá, iir ekkewe ruuofóch irá olif me ekkewe ruu leenien lamp me ra útá mwen mesen ewe Samolun fénúfan.
5 Iká emén a mochen efeiengawer, ekkei epwe ngetewu me lón awer me nieló chón koputer kewe. Iká emén a mochen efeiengawer, iwe epwe ina ussun ninniilóón.
6 A wor ar manaman le pinei láng pwe esap púngútiw rán fansoun ar osuni, me a wor ar manaman le ewili konik ngeni chcha. A pwal wor ar manaman le aworato wóón fénúfan sókkopaten feiengaw ineet chék ra mochen.
7 Lupwen a wes ar angangen pwáraatá, ewe manmwacho mi towu seni lón ewe apis epwe maun ngeniir me okkufuur me nireló.
8 Iwe, somáár kewe repwe itiló wóón alelapen ewe telinimw mi lap, ikewe aramas ra nieló ar we Samol ie wóón ewe iráán ninni, nge Sotom me Isip ra liosuetá ena telinimw.
9 Ekkewe aramas seni sókkopaten einang, kapas, me mwú repwe katol somáár kana lón úkúúkún úlúngát esopw rán, me resap mut ngeni somáár kana ar repwe peiás.
10 Nge chókkewe mi nóm wóón fénúfan repwe pwapwa me féri apwapwa pokiten ar máló. Repwe pwal tiinaaló liffang ngeni emén me emén lefiler, pokiten ekkeei rúúemén soufós ra eriáfféwú chókkewe mi nóm wóón fénúfan.
11 Mwirin ekkewe úlúngát esopw rán, Kot a eliwini ngeniir ngasangaser me ra útá. Iwe, chókkewe mi kúner ra fókkun niwokkus.
12 Mwirin ra rong eú méngúngú mi léúwommóng seni láng a apasa: “Oupwe feito ikeei.” Iwe, ra feitá láng lón ewe kuchu, nge ekkewe chón oputer ra kúner.
13 Lón ena kulók, a fis eú watteen chechchechin fénú. Iwe, eú na engolun ewe telinimw a turutiw, me 7,000 aramas ra máló ren ena chechchechin fénú, nge ekkewe lusun ra niwokkus me ra mwareiti ewe Koten láng.
14 Ewe oruuen feiengaw, a wes. Nge nengeni, ewe aúlúngátin feiengaw epwele mwittir waroto.
15 Ewe afúménún chónláng a ettiki néún we rappwa. Me a wor chómmóng méngúngú mi léúwommóng mi feito seni láng, ra apasa: “Ach we Kot me ewe emén I a filaatá an epwe Kraist ra poputá le nemenem wóón meinisin chón fénúfan. I epwe king tori feilfeiló chék.”
16 Iwe, ekkewe 24 souakkomw* iir mi mómmóót mwen mesen Kot wóón ar kewe leenien móótun king ra chapetiw me fel ngeni,
17 ra apasa: “Áúa kilisou ngonuk Jiowa* Kot, ewe mi Unusen Manaman, ewe emén mi nónnóm iei, ewe mi nónnóm me mwan, pún en ka áeá óm manaman mi lap me ka poputá le nemenem lón ewe wis king.
18 Nge ekkewe mwú ra song, me ka pwáári óm song. A war ewe fansoun mi kefililó fán iten án ekkewe mi máló repwe kapwúng me kopwe efeiéchú noum kewe chón angang ekkewe soufós, me ekkewe chón pin, me chókkewe mi niwokkusiti itom, iir mi kis me iir mi lap, me kopwe nieló ekkewe chón atai* fénúfan.”
19 Iwe, ewe imwenfelin Kot lón láng a suukuló me úa kúna ewe pwórófel me lón ena imwenfel. A pwal fi inefi me wor méngúngú, púng chopulap, fis chechchechin fénú, me watteen útten faw.
Footnote
^ Are “ataieló ekkewe chón ataieló.”
