Minne Ekkewe Aposel Ra Féri 23:1-35
23 Paul a newenewen ngeni ewe mwichen soukapwúng mi tekia án chón Jus, a apasa: “Pwii kaan, úa tongeni apasa mwen mesen Kot pwe mwelien letipei a ámmeef ngeniei pwe úse féri och mi mwáál tori ei rán.”
2 Iwe, ewe souasor mi lapalap, Ananaias, a allúkú ngeni chókkewe mi útá únúkkún ar repwe pisiri awan.
3 Mwirin, Paul a ereni: “Kot epwe pisiruk, en mi likótuputup.* Ka móót pwe kopwe apwúngúei me ren ewe Allúk, nge ka pwal atai ewe Allúk ren óm allúkú ar repwe pisiriei?”
4 Chókkewe mi útá ikena ra apasa: “Ka turunufasa néún Kot we souasor mi lapalap?”
5 Iwe, Paul a apasa: “Pwii kaan, úse silei pwe i emén souasor mi lapalap. Pún a makketiw, ‘Kosap eáni kapas mi ésúfélúngaw fán iten emén sounemenemen noum aramas.’ ”
6 Iwe, pokiten Paul a silei pwe eú pekin iir Satusi nge ewe pwal eú iir Farisi, iwe a kékkéwu fán léúwommóng lón án chón Jus we mwichen soukapwúng mi tekia: “Ámi pwii kana, ngang emén Farisi, néún ekkewe Farisi. Úa kúna kapwúng pokiten ewe ápilúkúlúkún manawsefálin ekkewe mi máló.”
7 Pokiten a apasa ei, a fis tipefesen lefilen ekkewe Farisi me Satusi, iwe ewe mwiich a kinikinfesen.
8 Pún ekkewe Satusi ra erá pwe ese wor manawsefál are ekkewe chónláng,* nge ekkewe Farisi ra erá pwe meinisin ekkena mettóch mi wor.
9 Iwe, a fis eú watteen akúrang, me ekkóch me lein ekkewe soumak lón ewe mwichen Farisi ra útá me poputá le ánini chou, ra apasa: “Áúse kúna och mwáállin ei mwán, nge iká ekkewe chónláng* ra kapas ngeni—.”
10 Iwe, lupwen a lapóló ewe tipefesen, ewe meilapen mwichen soufiu a niwokkus iká repwe nieló* Paul. Iwe, a allúkú ngeni ekkewe soufiu ar repwe feitiw me weitawu seni me leir me uwealó lón ewe imwen soufiu.
11 Nge lón ewe pwinin mwirin, ewe Samol a útá únúkkún me apasa: “Kopwe tipepwora! Pún ussun chék óm unusen pwáraatá ussui lón Jerusalem, iwe, kopwe pwal pwáraatá me lón Rom.”
12 Lupwen a rániló, ekkewe chón Jus ra ffératá eú raw me atolonger lón eú pwon fán ékképél, ra apasa pwe resap mwéngé are ún tori ar repwe nieló Paul.
13 A wor lap seni 40 mwán ra féri ei pwon fán ékképél.
14 Ekkeei mwán ra feiló ren ekkewe souasor mi lap me ekkewe néúwisin Jus me apasa: “Ám áúa atolongakem lón eú pwon fán ékképél pwe áúsapw fókkun áni och mettóch tori ám áúpwe nieló Paul.
15 Ina minne, ámi me án chón Jus we mwichen soukapwúng mi tekia oupwe esile ngeni ewe meilapen mwichen soufiu pwe epwe uweatiw ngenikemi pwe ussun itá oua pwal mochen eisini ekkóch kapas eis. Nge iká a arapakkanoto, ám áúpwe mmólnetá le nieló i.”
16 Iwe nge, néún fefinen Paul we a rong ewe raw ra akkóta, iwe, a tolong lón ewe imwen soufiu me apwóróusa ngeni Paul.
17 Iwe, Paul a kérato ren emén meilapen soufiu me apasa: “Kopwe uwealó ei alúwél ren ewe meilapen mwichen soufiu pún mi wor mettóch epwe apwóróusa ngeni.”
18 Iwe, a angei i me uwealó ren ewe meilapen mwichen soufiu me apasa: “Ewe chón kalapus Paul a kériei me tingoreei ái úpwe uweato reom ei alúwél pún mi wor met epwe erenuk.”
19 Ewe meilapen mwichen soufiu a kamwéchúló péún me ra feiló ekis pwe repwe chék iir, me a eisini: “Met ena ka mochen apwóróusa ngeniei?”
20 A apasa: “Ekkewe chón Jus ra tipeeúfengen ar repwe tingoreek óm kopwe uweatiw Paul lesor ngeni án chón Jus we mwichen soukapwúng mi tekia, pwe ussun itá ra pwal mochen eisini ekkóch kapas eis.
21 Nge kosap tipeeú ngeniir, pún lap seni 40 néúr kewe mwán ra witiwiti ar repwe rawei i, me ra atolonger lón eú pwon fán ékképél ar resap mwéngé are ún tori ar repwe nieló i, me iei ra fen mmólnetá, ra chék witiwiti ewe pwon sonuk.”
22 Iwe, ewe meilapen mwichen soufiu a mut ngeni ewe alúwél an epwe feiló mwirin an allúkú ngeni: “Kosap ereni emén pwe ka apwóróusa ngeniei ei.”
23 Iwe, a kérato rúúemén me lein ekkewe meilapen soufiu me apasa: “Oupwe ammólnatá 200 soufiu, pwal 70 chón wawa oris, me 200 soufiu mi wor wokur siles pwe repwe karis ngeni Seseria lón ewe aúlúngátin kulók lepwin.*
24 Pwal och, oupwe awora ekkóch oris fán iten Paul pwe epwe sái ngeni Feliks ewe governor lón núkúnúkéch.”
25 Me a makkeei eché taropwe, iei masouan:
26 “Klautius Lisias ngeni Ámmáfel Governor Feliks: Úa tiinaaló ái kapwong ngonuk.
27 Ekkewe chón Jus ra turufi ei mwán me arap ngeni repwele nieló i, nge úa mwittir feiló fán nei kewe soufiu me seláni i, pún úa rong pwe i emén chón Rom.
28 Iwe, ren ái mochen silei ewe popun ra etipisi i, úa uweatiw ngeni ar we mwichen soukapwúng mi tekia, án chón Jus.
29 Úa kúna pwe ra etipisi i wóón ekkewe mettóch mi riri ngeni ar we Allúk, nge rese etipisi wóón och mi fich ngeni máló are an epwe kalapus.
30 Nge pokiten ewe rawangaw ngeni ei mwán a fen esilesil ngeniei, úa mwittir tiinaaló reom me úa ereni ekkewe chón etipisi ar repwe uwealó ei osukosuk me mwom.”
31 Iwe, ekkeei soufiu ra angei Paul fán ar allúk ngeniir me uwealó i ngeni Antipatris lepwin.
32 Lón ewe rán mwirin, ra mut ngeni ekkewe mwán mi wawa oris ar repwe fitaaló i, nge iir ra liwiniti ewe imwen soufiu.
33 Ekkewe mwán mi wawa oris ra tolong lón Seseria me ngeni ewe governor ewe taropwe me pwal atolonga Paul lepéún.
34 Iwe, a álleani ewe taropwe me eisini iká i seni menni fénú, iwe a silei pwe i seni Silisia.
35 A apasa, “Úpwe aúselingéch ngonuk atun ekkewe chón etipisuk ra war.” Me a allúkú pwe epwe chék lokoló lón imwen Erot we.
Footnote
^ Are “eú etiip mi peinitipwech.”
^ Krik, “are chónláng are pneu′ma.”
^ Krik, “are chónláng are pneu′ma.”
^ Krik, “kinifeseni.”
^ Ina epwe 9:00 p.m.
