Minne Ekkewe Aposel Ra Féri 17:1-34
17 Iei ra fetáleló lón Amfipolis me Apolonia tori lón Tesalonika, ikewe a wor eú sinakok án ekkewe chón Jus.
2 Iwe, ussun met éérenien Paul, a tolong lón ewe sinakok, iwe lón úlúngát ránin sapat a sótun álisiir ar repwe weweiti ekkewe Taropwe mi Pin,
3 a áweweei me pwáári seni ekkewe Taropwe mi Pin pwe a lamot ngeni ewe Kraist an epwe kúna riáfféú me epwe manawetá seni máló, a apasa: “Iei i ewe Kraist, i Jises ewe úa esile ngenikemi.”
4 Ina minne, ekkóch me leir ra wiliiti chón lúkú me ra chiechi ngeni Paul me Sailas, me pwal eú mwichemmóngun chón Krik mi fel ngeni Kot, pwal fiti chómmóng fefin mi aúchea.
5 Nge ekkewe chón Jus ra lólówó, iwe ra emwichafengeni ekkóch mwán mi fókkun ngaw iir mi chék nómofetál ren ewe leenien amémé me féraatá eú mwichen aramas, me efisi án ewe telinimw epwe osukosuk. Ra ataelong imwen Jason we pwe repwe kútta Paul me Sailas me uweiirewu ren ewe mwichen aramas.
6 Lupwen rese kúner, ra átekinaló Jason me ekkóch chón lúkú ngeni ekkewe meilapen telinimw, ra kékké fán léúwommóng: “Ekkeei mwán mi efitikokooi unusen fénúfan ra pwal nóm ikeei,
7 me Jason a etiwer pwe néún waséla. Meinisin ekkeei mwán ra ú ngeni allúkún Sisar ren ar apasa pwe a pwal wor emén king, itan Jises.”
8 Lupwen ewe mwichen aramas me ekkewe meilapen telinimw ra rong ekkeei mettóch, ra fókkun lólilen,
9 me mwirin ar angei seni Jason me ekkewe ekkóch ar pakking, iwe, ra omuserewu.
10 Atun chék a pwiniló, chiener kewe chón lúkú ra tiinaaló Paul me Sailas ngeni Perea. Lupwen ra tour, ra tolong lón ewe sinakok án chón Jus.
11 Iwe, chón Perea ra kon tipemecheres le káé lap seni chón Tesalonika, pún ra fókkun mwasangasang le etiwa ewe kapas. Iteiten rán ra etittinaéchú ekkewe Taropwe mi Pin ren ar repwe kúna iká ekkeei mettóch mi pwúng.
12 Iei minne, chómmóng leir ra wiliiti chón lúkú, me a pwal wor chómmóng fin Krik mi iteféúló me pwal ekkóch mwán.
13 Nge atun ekkewe chón Jus seni Tesalonika ra rong pwe Paul a pwal esilefeili ewe kapasen Kot lón Perea, ra feiló ikenan me asongaatá me efitikokooi ewe mwichen aramas.
14 Iwe, chiener kewe chón lúkú ra mwittir tiinaaló Paul órosset, nge Sailas me Timoty ra nómotiw.
15 Iwe nge, chókkewe mi eti Paul ra uwealó i tori Aten. Nge mwirin án Paul ereniir pwe repwe ereni Sailas me Timoty repwe mwittir feito ren, iwe ra feiló.
16 Iwe, atun Paul a wikkitiir lón Aten, a fókkun mángaw ren an kúna pwe ewe telinimw a ur ren uluulun.
17 Ina minne, me lón ewe sinakok a poputá le asukula ekkewe chón Jus me ekkewe ekkóch aramas mi fel ngeni Kot ren an álisiir le weweiti ekkewe Taropwe mi Pin. Me iteiten rán, a pwal féri ena ngeni chókkewe mi nóm lón ewe leenien amémé.
18 Nge ekkóch ekkewe Epikurean* me ekkewe Stoik* iir souáák, ra poputá le wippin ngeni, me ekkóch ra apasa: “Met ei mi sou fós* a mochen apasa?” Nge ekkóch ra erá: “Ussun i néún ekkewe koten ekis chón aronga.” Ra apasa ei pokiten i a esilefeili ewe kapas allim ussun Jises me ewe manawsefál.
19 Iwe, ra uwei ngeni ewe Ariapakus,* ra apasa: “Áúa tongeni silei met ei mineféén afalafal ka kan fóffós ussun?
20 Pún ka áwewe ngenikem mettóch ám áúsaamwo rongorong, me ám áúa mochen silei met weween ekkeei mettóch.”
21 Ren enletin, meinisin chón Aten me ekkewe chón ekis mi nónnóm ikenan ra ollusaaló ar fansoun asésé ren ar apwóróus are aúseling ngeni ekkewe mettóch mi minefé.
22 Paul a útá lukanapen ewe Ariapakus me apasa:
“Ámi re Aten, úa kúna pwe lón mettóch meinisin ussun oua kon niwokkusiti ekkewe kot* lap seni ekkewe ekkóch.
23 Áwewe chék, atun úa fetálfeil me nengeniéchú minne oua fel ngeni, úa pwal mwo nge kúna eú róóng mi wor makkan wóón ‘Ngeni Emén Kot Áúse Sissilei.’ Iei minne, met oua kan fel ngeni nge ouse silei, iei úpwe esile ngenikemi.
24 Ewe Kot mi féri fénúfan me mettóch meinisin mi nóm lón, pokiten i Samolun láng me fénúfan, i esap nónnóm lón imwenfel férien péún aramas,
25 ese pwal lamot ngeni án aramas repwe angang fán itan pokiten ese wor och mettóch a osupwangan, pún pwisin i a awora ngeni meinisin aramas manaw, me ngasangas me mettóch meinisin.
26 Me a féri seni emén mwán iteiten einangen aramas pwe repwe nónnóm wóón unusen fénúfan, me a apwúngaló ewe fansoun mi kefililó me féri aúkúkún ia ekkewe aramas repwe nónnóm ie,
27 pwe repwe kútta Kot, iká repwe kúkkútta i, ra tongeni kúna i, pún ren enletin i ese towaw seni emén me emén leich.
28 Pún ren i, sia manaw me mwékútúkút, me nónnóm, pwal mwo ekkóch néúmi soumak ra apasa, ‘Pún kich pwal néún.’
29 “Iei minne, pokiten kich néún Kot, sisap ekieki pwe Kot mi ussun kolt are silifer are faw, ussun och mettóch aramas ra féri ren péúr me ren ekiekiir.
30 Pwúngún, me lóóm Kot a engiló lupwen aramas rese silei i, nge iei a esilei ngeni meinisin aramas ekis meinisin pwe a lamot repwe áier.
31 Pún i a filaatá eú rán an epwe apwúngú fénúfan fán pwúng, ren emén aramas i a seikaatá, me i a awora eú minen alúkúlúk ngeni aramas meinisin ren an amanawaatá i seni máló.”
32 Iwe, atun ra rong ussun ewe manawsefál án ekkewe mi máló, ekkóch ra poputá le esiit, nge pwal ekkóch ra apasa: “Áúpwe pwal aúselingoksefál ussun ei.”
33 Iwe, Paul a ló seniir,
34 nge ekkóch aramas ra fiti i me wiliiti chón lúkú. Ekkóch me leir Tionisius, i emén chón ewe mwichen soukapwúng lón ewe Ariapakus, me emén fefin itan Tamaris, me pwal ekkóch me lúkúúr.
