Minne Ekkewe Aposel Ra Féri 15:1-41
-
Tipefesen lón Antiok ussun sirikomsais (1, 2)
-
Kapas eis a ló ngeni Jerusalem (3-5)
-
Ekkewe mwán mi ásimaw me ekkewe aposel ra mwichfengen (6-21)
-
Taropwe seni ewe mwichen soupwúngúpwúng (22-29)
-
Ttiisenikemi chcha (28, 29)
-
-
Ekkewe mwichefel ra péchékkúletá ren ewe taropwe (30-35)
-
Paul me Parnapas ra káimufesen (36-41)
15 Iwe, ekkóch mwán ra feitiw seni Jutia me poputá le asukula pwiir kewe: “Iká pwe ouse sirikomsais ussun minne a mak lón ewe Allúkún Moses, ousap tongeni kúna manaw.”
2 Nge lupwen a wor eú watteen tipefesen me wippinfengen lefiler me Paul me Parnapas, a kkótoló pwe Paul, Parnapas, me pwal ekkóch repwe feitá ren ekkewe aposel me ekkewe mwán mi ásimaw lón Jerusalem fán iten ei osukosuk.
3 Chón ewe mwichefel ra emmweniireló, mwirin ra liwin. Iwe, Paul me Parnapas me ekkewe ekkóch chón lúkú ra sópweeló ar sái ngeni Finisia me Sameria, ra apwóróusa ngeniir tichikin pwóróusen án aramasen ekkewe ekkóch mwú kul ngeni Kot, iwe, a atoto watteen pwapwa ngeni meinisin pwiir kewe.
4 Atun ra tikeri Jerusalem, ewe mwichefel me ekkewe aposel me ekkewe mwán mi ásimaw ra etiwer fán kirekiréch, iwe ra apwóróusa ngeniir chómmóng mettóch Kot a néúnéú iir le féri.
5 Iwe, ekkóch me lein chókkewe mi lúkú nge iir ra akkomw fiti ewe lamalam án ewe mwichen Farisi, ra útá seni leenier me apasa: “A lamot repwe sirikomsais me sipwe ereniir ar repwe álleasochisi ewe Allúkún Moses.”
6 Iwe, ekkewe aposel me ekkewe mwán mi ásimaw ra mwichfengen pwe repwe pwóróusfengen wóón ei mettóch.
7 Mwirin ar fókkun wippinfengen, Piter a útá me apasa ngeniir: “Ámi pwii kana, oua fókkun silei pwe me lóóm Kot a féri ewe kefil me leimi pwe seni awei aramasen ekkewe ekkóch mwú repwe rong pwóróusen ewe kapas allim me lúkú.
8 Me Kot, ewe mi silei ewe letip, a pwáraatá pwe a etiwer ren an ngeniir ngún mi fel, ussun chék pwal an ngenikich.
9 Me i ese fókkun asókkafeseni lefilach me iir, nge a eliméchú letiper ren lúkú.
10 Ina minne, pwata oua sótuni Kot ren ámi isettá wóón afaren ekkewe chón káé efóch waas semelapach kewe are pwal kich sise tongeni mwárei?
11 Nge kich, a wor ach lúkú pwe sia kúna manaw ren ewe kirekiréch mi somwoló án ewe Samol Jises, iwe, pwal ina chék ussun ren iir.”
12 Iwe, iir meinisin ra fanafaneló, me ra poputá le aúseling ngeni án Parnapas me Paul apwóróusa ekkewe chómmóng esissil me manaman Kot a néúnéú iir le féri lein aramasen ekkewe ekkóch mwú.
13 Mwirin ar ra wes le kapas, Jemes a apasa: “Ámi pwii kana, oupwe aúseling ngeniei.
14 Simion a kerán apwóróusa ngenikich pwe iei Kot a etiwa ekkewe ekkóch mwú, pwe epwe tongeni pwal filaatá aramas seniir fán ásengesin itan we.
15 Iwe, ekkena kapas ra tipeeú ngeni makkeien ekkewe Soufós, a apasa:
16 ‘Mwirin ekkeei mettóch, úpwe liwin me aútáái imwen Tafit we tento* mi turuló. Ngang úpwe aúsefálietá me férsefáli,
17 pwe ekkewe lusun aramas repwe kútta ngang, Jiowa,* seni letiper, iir me meinisin aramasen ekkewe ekkóch mwú, ekkewe aramas mi iteit ren itei we, ngang Jiowa* úa apasa ei, úa féri ekkeei mettóch,
18 úa fen apwúngaló le fériir seni me lóóm lóóm.’
19 Ina minne, meefiei pwe sisap aosukosuka chókkewe seni me lón ekkewe ekkóch mwú mi kul ngeni Kot,
20 nge sipwe mak ngeniir ar repwe ttii seniir ekkewe mettóch mi riri ngeni uluulun, seni lisowumwáál,* seni ekkewe man mi máán ffór,* me seni chcha.
21 Pún seni fansoun lóóm a kan wokkor chókkewe mi afalafala ussun Moses lón iteiten telinimw, pokiten iteiten Sapat lón ekkewe sinakok a wor chókkewe ra álleanawu ekkewe mettóch a makkeei.”
22 Iwe, ekkewe aposel me ekkewe mwán mi ásimaw, fitifengen me unusen ewe mwichefel, ra apwúngaló ar repwe tiinaaló ekkewe mwán ra filaatá seni me leir ngeni Antiok, eti Paul me Parnapas. Ra tiinaaló Jutas ewe mi iteni Parsapas me Sailas, iir kewe mi wisen emmwen me lein pwiir kewe.
23 Ra makkeei ei me ngeniir repwe uwealó:
“Ekkewe aposel me ekkewe mwán mi ásimaw ra tiinaaló ar kapwong ngeni pwiir kana lón Antiok, Siria me Silisia iir kewe seni ekkewe ekkóch mwú.
24 Pokiten áúa rong pwe ekkóch aramas seni ikeei ra feiló me aosukosukakemi ren met ra apasa, ra sótun otupukemi, inaamwo iká áúse ngeniir och emmwen,
25 iwe, áúa tipeeúfengen le filaatá ekkewe mwán repwe tiitiiló remi eti áchengicheng Parnapas me Paul,
26 ekkewe mwán mi pennúkúóló manawer fán ásengesin iten ach Samol Jises Kraist.
27 Ina minne, áúa tiinaaló Jutas me Sailas pwe repwe pwal apwóróusa ngenikemi ekkeei mettóch.
28 Iwe, ren ewe ngún mi fel me ren ám, ese lamot ám áúpwe apachaatá pwal och chou ngenikemi, nge ekkeei chék mettóch mi lamot:
29 Oupwe sópweeló le ttii senikemi ekkewe mettóch mi piin asor ngeni uluulun, chcha, ekkewe man mi máán ffór,* me lisowumwáál.* Iká oupwe túmúnúéchúkemi seni ekkeei mettóch, iwe manawemi epwe múrinné. Oune nónnóm!”
30 Ekkeei mwán ra feiló pwe repwe feitiw ngeni Antiok, iwe, ra ochufengenni ewe mwichemmóngun chón káé me ngeniir ewe taropwe.
31 Mwirin ar álleani, ra pwapwa ren ekkewe kapasen pesepes.
32 Nge pokiten Jutas me Sailas iir pwal soufós, ra pesei pwiir kewe ren chómmóng afalafal me apéchékkúler.
33 Mwirin ar nónnóm ikena ie ekis fansoun, pwiir kewe ra tiiniireló fán kinamwe ngeni chókkewe mi tiiniireto.
34 * ——
35 Nge Paul me Parnapas ra nómotiw Antiok me asukul. Iwe, iir me chómmóng pwiir kewe ra esilefeili ewe kapas allim ussun án Jiowa* kapas.
36 Fitu rán mwirin, Paul a ereni Parnapas: “Sipwele liwinsefál me chuuri pwiich kewe lón meinisin ekkewe telinimw ikewe sia arongafeili ie án Jiowa* we kapas, me ppii iká ifa ussur.”
37 Parnapas a fókkun mochen uwei Jon, ewe mi iteni Mark.
38 Nge Paul ese sani ar repwe uwei, pún a kúna an ló seniir me lón Pamfilia me ese etiir lón ewe angang.
39 Ren ena, a fis eú watteen songfengen lefiler, iwe ra káimufesen. Parnapas a uwei Mark me sáiló ngeni Saipros.
40 Nge Paul a filaatá Sailas, me a ló mwirin án pwiin kewe ra iótek pwe Jiowa* epwe pwáár ngeni an kirekiréch mi somwoló.
41 A feiló ngeni Siria me Silisia, me apéchékkúla ekkewe mwichefel.
Footnote
^ Are “likachoch.”
^ Are “met mi ninniiló nge ese késúrúló chchaan.”
^ Are “met mi ninniiló nge ese késúrúló chchaan.”
