Néún Piter Áeúin Taropwe 1:1-25
1 Ngang Piter, emén néún Jises Kraist aposel, úa mak ngenikemi chókkewe mi toropasfeil lón Pontus, Kalesia, Kapatosia, Eisia, me Pitinia, ewer ngeni ámi kewe chón ekis me chókkewe Kot a filikemiitá.
2 I ewe Sam lón láng me a filikemiitá me ren met a fen eáni akkót. A ngenikemi ewe ngún mi fel pwe oupwe pin. A féri ena pwe oupwe álleasochisi I me eliméchúkemi ren chchaan Jises Kraist.
Úa iótek pwe Kot epwe pwáári ngenikemi an kirekiréch mi somwoló me álisikemi le eáni kinamwe.
3 Mwareiti Semen ach Samol Jises Kraist me an we Kot, pún ren watteen an úméúméch, a efisi ach sipwe upsefál pwe ach ápilúkúlúk epwe nómoffóch. Sia eáni ena ápilúkúlúk pokiten Jises Kraist a manawsefál.
4 A efisi ach sipwe upsefál ngeni eú manaw mi wor feiéchún, ewe a pwonei pwe epwe fang ngenikich. Ena feiéch esap tongeni taló, a pin, me epwe nómoffóchóló. A fen mmólnetá fán itemi lón láng,
5 ámi chókkewe Kot a túmúnúkemi ren an we manaman pokiten a wor ámi lúkú. Kot a túmúnúkemi ren eú amanaw mi mmólnetá, ewe epwe pwááló lesópwólóón ewe fansoun.
6 Pokiten ena, oua kúna watteen pwapwa inaamwo iká lón ei atun a lamot ámi oupwe letipeta ren sókkopaten sóssót ren ekis chék fansoun.
7 Pún ámi lúkú mi fen kúna sóssót a tongeni efisi ámi oupwe angei ling, ingemwar, me ésúúfél atun Jises Kraist epwe pwáraaló pwisin i. Ámi lúkú a aúchea lap seni kolt, ewe mi tongeni móróló inaamwo iká a fen keten wóón ekkei.
8 Inaamwo iká ouse kúna Kraist fán eú, nge oua tongei. Inaamwo iká ouse kúna i iei, nge oua lúkú lón i me oua fókkun pwapwa me chengel chapur.
9 Me ren ámi pwapwa, oupwe kúna amanaw pokiten ámi lúkú.
10 Ekkewe soufós mi esilei ussun án Kot we kirekiréch mi somwoló mi fen kawor ngenikemi, ra tinikken le eisfichi me kúttaéchú ussun ena amanaw.
11 Me mwan, Kot a áeá an we ngún mi fel le ereniir pwe Kraist epwe kúna riáfféú, me mwirin epwe tekiatá. Ina popun ra sópweeló le sótun kútta met epwe fis ngeni ewe Kraist me ineet epwe fis.
12 Kot a pwáraaló ngeni ekkewe soufós pwe rese angang ngeni pwisin iir, nge ra angang ngenikemi. Ekkewe soufós ra makkeei met ra fen esile ngenikemi me oua rong ekkeei mettóch seni chókkewe mi afalafala ewe kapas allim ngenikemi ren álillisin ewe ngún mi fel, ewe mi tiitiito seni láng. Ikkena ekkewe mettóch ekkewe chónláng ra fókkun mochen silei.
13 Ina minne oupwe ammólnatáéchú ekiekimi ngeni angang mi weires, áeá ámi tufichin ekiek, onómu ámi ápilúkúlúk wóón ewe kirekiréch mi somwoló, ewe epwe torikemi atun pwálóón Jises Kraist.
14 Iei oua néún Kot mi álleasochisi i. Ina minne oupwe úkútiw le eáni ekkewe mochen mi ngaw oua eáni atun ouse mwo silei i.
15 Nge oupwe ussun ewe Emén mi Pin, ewe mi kérikemi. Oupwe pin lón meinisin féfférúmi,
16 pún a makketiw: “Oupwe pin, pún ngang úa pin.”
17 Iwe, iká oua iótek ngeni ewe Sam, ewe ese aapaap lón an kapwúng wóón án emén me emén féffér, oupwe eáni féffér mi pwáári pwe oua niwokkusiti I atun oua siamú wóón ei fénúfan.
18 Pún oua silei pwe esap silifer me kolt, ekkewe mettóch mi tongeni móróló, ra angasakemiiló seni ewe manaw mi lamotongaw oua angei seni semelapemi kewe,
19 nge oua ngaseló ren chchaan Kraist we mi aúchea, ewe mi ussun chchaan emén nieniféén siip ese wor tikitikipwúlún me limengawan.
20 Kot a filaatá Kraist me mwen ewe atun aramas ra uputiw wóón fénúfan, nge a pwááló lesópwólóón ekkewe fansoun fán ásengesimi.
21 Ren i, oua chón lúkú Kot, ewe emén mi amanawaatá seni máló me fang ngeni ling pwe epwe wor ámi lúkú me ápilúkúlúk lón Kot.
22 Pokiten oua álleasochisi ewe káit mi enlet, oua pwisin limetikemi, ina minne oua eáni ewe tongen pwipwi ese wor likótuputupun, iwe iei oupwe fókkun tongfengen seni letipemi.
23 Pún oua upsefál. Oua uputiw seni ewe pwikil mi tongeni awora manaw, nge ese tongeni máló. Oua uputiw pokiten ewe kapas, án ewe Kot mi manaw me nómoffóch.
24 Pún “aramas meinisin ra ussun fetil, nge linger a ussun pééniráán lemal, ewe fetil a pwáseló, nge ewe péénirá a mworetiw,
25 nge án Jiowa* kapas a nóm tori feilfeiló.” Ei “kapas,” iei ewe kapas allim a esilesil ngenikemi.
