Ewe Áeúin Taropwe Ngeni Chón Korint 12:1-31
12 Iwe, ámi pwii kana, úa mochen ámi oupwe silei ussun ekkewe liffang seni Kot.
2 Oua silei pwe mwen ámi wiliiti chón lúkú,* oua tipetipeló me mworukoló ngeni ekkewe uluulun ese wor méngúngúúr, oua tapweló mwiriir ia ra emmwenikemiiló ie.
3 Iei úa mochen oupwe silei pwe ese wor emén a kapas fán emmwenien ewe ngún mi fel epwe apasa: “Jises a anúmamaw!” me ese wor emén epwe tongeni apasa: “Jises i Samol!” me lúkún emmwenien ewe ngún mi fel.
4 Iwe, a wor sókkopaten liffang, nge eú chék ngún.
5 A wor sókkopaten angang, nge emén chék Samol.
6 Ewe ngún mi fel a amwékútú aramas lón sókkopaten napanap ar repwe féri chómmóng mettóch. Iwe nge, mi wor emén chék Kot mi féri meinisin ekkeei mettóch ren aramas meinisin.
7 Nge a pwááló ewe álillis ewe ngún mi fel a awora ngeni emén me emén fán iten feiéchún ekkewe ekkóch.
8 Pún ewe ngún mi fel a atufichi emén le kapas fán tipáchem, nge pwal ena chék ngún, a pwal atufichi emén le kapas fán sile,
9 nge pwal emén, pwal ena chék ngún a atufichi an epwe wor an lúkú, nge pwal emén, pwal ena chék ngún a ngeni ewe tufichin* echikara aramas,
10 a ngeni pwal emén tufichin an epwe féri manaman, nge pwal emén an epwe osuni, nge pwal emén an epwe mirititi iká eú pwóróus a feito seni Kot are ese, nge pwal emén an epwe kapas lón sókkopaten fós, me pwal emén an epwe afféúni sókkopaten kapasen ekis.
11 Meinisin ekkeei tufich ewe chék pwal ngún mi fel a awora, ewer, a einet ngeni emén me emén me ren letipen Kot.*
12 Ikáámwo a wor eú chék inis, nge a chómmóng kifetin kewe, me ikáámwo a chómmóng kifetin, nge a chék wor eú inis, pwal ina chék ussun ren ewe Kraist.
13 Pún ren eú ngún kich meinisin sia papatais lón eú inis, ese lifilifil iká kich chón Jus are chón Krik, ese lifilifil iká kich slave are chón ngas, me kich meinisin sia angei ena ngún.
14 Ren enletin, ewe inis a fférútá ren chómmóng kifet nge esap chék eú.
15 Iká ewe peche epwe apasa, “Pokiten esap ngang efóch paw, iwe esap ngang kifetin ewe inis,” itá epwe wewe ngeni pwe ena peche esap kifetin ewe inis?
16 Iká ewe seling epwe apasa, “Pokiten esap ngang eféú maas, iwe esap ngang kifetin ewe inis,” itá epwe wewe ngeni pwe ena seling esap kifetin ewe inis?
17 Iká unusen ewe inis epwe chék féún maas, ifa ussun sipwe rongorong? Iká unusen ewe inis epwe chék seling, ifa ussun sipwe fáreni och?
18 Nge Kot a eleenia eú me eú ekkewe kifetin inis lón en me leenian ussun met mochenin.
19 Iká unusen ewe inis a ffér seni eú chék kifet, epwe ifa ussun pwe epwe eú inis?
20 Nge a wor chómmóng kifet, nge eú chék inis.
21 Ewe maas ese tongeni ereni ewe paw, “Ese wor lamotom ngeniei,” are, ewe mékúr ese pwal tongeni ereni ewe peche, “Ese wor lamotom ngeniei.”
22 Nge ren enletin, ekkewe kifetin inis ussun itá ra apwangapwang, iir ra lamot,
23 me kifetin inisich kewe sia ekieki pwe rese kon napanapéch, sia pwélúéchúreló. Ina minne, kifetin inisich kewe sia meefi sáw rer repwele napanapéchúló.
24 Nge kifetin inisich kewe mi pwisin napanapéch, ese lamot ach sipwe féri och ngeniir. Iwe nge, a ina ussun án Kot ochufengenni kifetin ewe inis, a ésúúfélú ekkewe kifet ese kon wor súfélúr,
25 pwe esap wor kinikinfesen lón ewe inis, nge ekkewe kifet repwe túmúnúfengeniir.
26 Iká eú kifet a riáfféú, meinisin ekkewe kifet ra pwal riáfféú. Are, iká eú kifet a lingeló, meinisin ekkewe kifet ra pwal pwapwa.
27 Iei oua inisin Kraist, me emén me emén leimi kifetin.
28 Kot a filaatá chón lón ewe mwichefel, me ewisa ngeniir sókkopaten wis: áeúin, ekkewe aposel, oruuan, ekkewe soufós, aúlúngátin, ekkewe sense, mwirin, chókkewe mi féri manaman, chókkewe mi wor ar tufichin echikara aramas,* chókkewe mi álisi aramas, chókkewe mi wor ar tufichin emmwen, chókkewe mi fós lón sókkopaten fós.
29 Met, iir meinisin aposel? Met, iir meinisin soufós? Met, iir meinisin sense? Met, iir meinisin ra féri manaman?
30 Met, iir meinisin a wor ar tufichin* echikara aramas? Met, iir meinisin ra fós lón sókkopaten fós? Met, iir meinisin chón afféúni kapas?
31 Nge oupwe achocho le kúkkútta ekkewe liffang mi fókkun lamot. Iwe nge, úpwe áiti ngenikemi och mettóch mi echipwér seni meinisin.
Footnote
^ Krik, “aramasen ekkewe ekkóch mwú.”
^ Are “liffangen.”
^ Are “án Kot manaman.”
^ Are “ewe liffang le echikara aramas.”
^ Are “liffangen.”
