Chiechi ra kan pwóppwóróusfengen lefiler, ese lifilifil ika wóón pwisin inisiir, wóón phone, e-mail, video are taropwe. Ina popun ren ach sipwe chiechi ngeni Kot a pwal lamot sipwe pwóppwóróus ngeni i iteitan. Nge epwe ifa usun ach sipwe féri ena?

Sia tongeni fós ngeni Jiowa lón iótek. Iwe nge, ach iótek ngeni Kot esap usun ach pwóppwóróusfengen me emén chienach. A lamot sipwe mirititi pwe atun sia iótek sia fós ngeni ewe Chón Férikich ewe mi Unusen Tekia seni meinisin. Ena mettóch epwe amwékútúkich le iótek seni eú letip mi meefi watteen súfél. Ren án Kot epwe aúselinga ach iótek, a pwal lamot sipwe apwénúetá ekkewe mettóch a mochen sipwe féri. Ikkeei úlúngát me leir.

Áeúin, ach kewe iótek epwe chék weneiti Jiowa Kot weween esap pwal weneiti Jesus, emén aramasepin are ululun. (Ekistos 20:4, 5) Iei alon ewe Paipel: “Lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou.” (Filipi 4:6) Oruuan, a lamot sipwe iótek me ren iten Néún Kot we Jesus Kraist. Jesus a pwisin áweweei: “Esap wor eman epwe tongeni feila ren Semei me lüki.” (Johannes 14:6) Aúlúngátin, a lamot ach kewe iótek epwe tipeeú ngeni minne Kot a tipeni. Ewe Paipel a erá: “Are sia tüngor och mine a fich ngeni letipan, a aüselingakich.” *​—1 Johannes 5:14.

Pwúngún, eú riri mi núkúchar esap tongeni nómottam ika pwe emén chék a wisen fóffós. Sipwe mut ngeni Kot epwe fós ngenikich me sipwe aúseling usun chék chiechi mi pwapwaiti ar pwóppwóróusfengen. En mi silei ifa usun Kot a fós ngenikich?

Lón ei fansoun, Jiowa Kot a fós ngenikich me ren minne a makketiw lón ewe Paipel. (2 Timoty 3:16, 17) Pwata sia erá ena? Áwewe chék: Sipwe erá pwe ka angei eché taropwe seni emén chiechiom. Mwirin óm álleani, eli ka mwasangasang le apwóróusa ngeni ekkewe ekkóch, “Ua kerán rongorong pwóróus seni chienei we!” Nge ewe pwóróusfengen sanne a fis lón fós nge lón mak. Pwal ina chék usun, ach ákkálleani ewe Paipel, a usun nge sia mut ngeni Jiowa pwe epwe fós ngenikich. Ina minne, lón alon Gina we me lepoputáán ei lesen a apasa: “Ai lúkú pwe ika ua mochen Kot epwe ekieki pwe ngang chiechian, a lamot upwe etittina néún we taropwe ngenikich, weween ewe Paipel.” A pwal erá: “Ai ákkálleani ewe Paipel iteitan a akkanaei ngeni Kot.” Ka mut ngeni Jiowa pwe epwe fós ngonuk iteiten rán ren óm ákkálleani an we Kapas? Óm féri ena epwe álisuk le arap ngeni Kot.