PWÓRÓUS LÚKÚNPÉÉN | SATAN I WESEWESEN EMÉN?
Mi Wor Satan?
Iei alon ROGELIO seni El Salvador: “Atun ua mááritá me lúkúmach ngeni inei we, a kan erá, ‘Ewe Satan epwele eto ocheek!’ Ú kan pélúweni, ‘Epwe etto!’ Úa lúkú Kot nge use lúkú pwe mei wor Satan.”
Ka tipeeú ngeni Rogelio? Menni lein ekkeei pwóróus a pwúng me reom?
-
Satan esap wesewesan, a chék wewe ngeni minne mi ngaw.
-
Mei wor Satan nge ese kon alamota an fansoun ngeni aramas.
-
Satan i emén ngún mi péchékkúl manamanan me a fókkun etipetipa aramas.
Eú me eú ekkena pwóróus a chómmóng chón tipeeú ngeniir, eli chókkana ra tori million. Nge mei wor lamotan ika menni leir mi enlet? Iwe, ika Satan esap wesewesan, chókkewe mi lúkú pwe mei wor Satan ra tupuló. Ika Satan wesewesan nge ese kon alamota an fansoun ngeni aramas, ese wor lamoten án chómmóng túmúnúéch seni are pwal mwo nge niwokkusiti i. Iwe nge, ika Satan emén chón otuputup, iwe i mi fókkun efeiengaw lap seni met chómmóng ra lúkú.
Sipwe ppii met Paipel a pélúweni ngeni ekkeei kapas eis: Met are ié Satan, itá a wewe ngeni minne mi ngaw are emén ngún? Ika i wesewesen emén, iwe epwe tongeni efeiengawok? Ika ina, ifa usun kopwe túmúnuk seni?
