Jiowa Kot a mochen pwe sipwe pwóppwóróus ngeni iteitan usun ach kewe aúrek. (Lukas 18:1-7) I mi aúseling ngenikich pún a tongekich. Pokiten Semach we lón láng a etiwakich le iótek ngeni, itá pwata sisap pwóróus ngeni lón iótek?​—Álleani Filipi 4:6.

Iótek esap chék eú alen ach sipwe tingor álillis. Nge a álisikich ach sipwe arap ngeni Kot. (Kölfel 8:3, 4) Lupwen sia kan ukkuwawu meefiach ngeni Kot lón iótek, sia akkapéchékkúlaló ach chiechiéch ngeni.​—Álleani James 4:8.

Kot ese mochen ach sipwe néúnéú ekkewe kapas mi eingeing are epiepini ach kewe iótek lupwen sia iótek. Ese pwal lamot eú sókkun pwomwen inis atun sia iótek. Jiowa a etiwakich le iótek seni letipach. (Mateus 6:7, Testament Mi Fö) Áwewe chék, lón fansoun lóóm lón Israel, Hana a iótek ngeni Kot usun och osukosuk lón an famili mi fókkun eriáfféw. Iwe mwirin, lupwen an riáfféú a siwil ngeni pwapwa, a kilisou ngeni Kot lón iótek seni letipan.​—Álleani 1 Samuel 1:10, 12, 13, 26, 27; 2:1.

A ifan me aúchean ach ena liffang! Sia tongeni pwóróus ngeni ewe Chón Fératá usun ach kewe aúrek. Sia pwal tongeni mwareiti me kilisou ngeni ren met i a féfféri. Enlet, sipwe fókkun alamota ena liffang mi aúchea.​—Álleani Kölfel 145:14-16.