EÚ PWÓRÓUS mi ámmeseik a katowu lón néún chón Korea we simpung itelapan “‘Shim Cheong mi Áchengicheng,’ I Ese Silei och Usun Jesus, Iwe A Kóturulong lón Ell?”

Ena pwóróus a asonga ekkóch chón Korea pokiten me ren ar na tutulap, ena fépwúl itan Shim Cheong a pennúkú pwisin mochenin ren an epwe álisi seman we mi chun. Iwe, seni lóóm tori ikenái, aramas ra mmen tongei me ingeiti. Ina popun lón Korea, “Shim Cheong” a eú leenien áppirú usun emén nau mi tuppwél.

Chómmóng aramas ra meefi pwe ese pwúng are pwal mwo nge oput ena ekiek pwe emén epwe kapwúng lón ell pokiten chék esap i emén Chón Kraist mi papatais. Ewe tutulap a pwal mwo nge fis lón ewe fansoun ewe pwóróus usun Kraist esaamwo tori sópwun na.

Lón ena simpung, ra pwal fós ngeni emén néúwisin lamalam. Ra eisini ika ekkewe ra máló nge ese fen suuk ngeniir ar repwe káé usun Jesus ra kóturulong lón ell. Iei met ewe néúwis a erá: “Sise silei. Sia chék ekieki pwe mei wor án Kot kókkót fán iten [ekkena esin aramas].”

Ewe New Catholic Encyclopedia a erá: “A lamot pwe emén epwe papatais ren an epwe kúna manaw. Kraist pwisin a erá pwe ika emén ese upsefál ren konik me Ngún mi Fel, iwe esap tongeni tolong lón Mwúún Kot. (Jn. 3:5)” Pokiten ei afalafal, ekkóch ra lúkú pwe chókkewe ra máló nge rese papatais ra kóturulong lón ekkein ell are kúna riáfféú lón pwal och napanap mwirin ar máló.

Iwe nge, chómmóng aramas ra meefi pwe ese fókkun pwúng ena esin lúkú. Fite million aramas ra fen máló nge rese silei ewe Paipel. Itá mi fich ngeniir ar repwe kúna riáfféú fóchófóch? Met ewe Paipel a apasa usun ei mettóch?

Ewe Paipel a affata pwe Kot a áfánni ekkewe aramas ese wor ar sile usun letipan. Föför 17:30 (Kapasen God) a alúkúlúkú pwe “God a nikitano ekkewe fansoun nupwen aramas rese sinei i.” Iwe, ifa ewe ápilúkúlúk lón Paipel fán iten chókkewe ra fen máló nge ese fen suuk ngeniir ar repwe silei me káé usun Kot atun ra chúen manaw?

Sipwe silei pélúwan ena kapas eis ren ach nengeni met Jesus a ereni emén me lein ekkewe chón féfféringaw mi nóm ren nge a pwal eti le máló. Ewe mwán a ereni Jesus: “Chechchemeniei lupwen óm kopwe tolong lón Mwúúm we.” Iwe, Jesus a pélúweni: “Enlet ua erenuk ikenái, pwe kopwe etiei lón Paratis.”​—Lukas 23:39-43, NW.

Itá Jesus a pwon ngeni ewe mwán pwe i epwe feitá láng? Aapw. Ewe mwán ese “upsefäl” ren konik me án Kot we manaman mi fel, nge mi lamot an epwe fis ena me mwen án emén tolong lón Mwúún Kot lón láng. (Johannes 3:3-6) Nge Jesus a pwon ngeni ewe chón féfféringaw pwe i epwe manawsefál lón Paratis. Pokiten ena mwán emén chón Jus, ese mwáál a silei minne ewe áeúin puk lón Paipel a áweweei usun ewe tánipiin Eten, ewe Paratis mi nóm wóón fénúfan. (Keneses 2:8) Minne Jesus a pwonei a ngeni ewe chón féfféringaw ewe ápilúkúlúkún manawsefál lón ewe Paratis Kot epwe férsefáli wóón fénúfan.

Ren enletin, ewe Paipel a pwonei pwe “ekewe chon pwüng me ekewe aramas mi ngau, repwe manausefäl seni mäla.” (Föför 24:15) “Ekewe aramas mi ngau” a wewe ngeni iir kewe rese apwénúetá án Kot kewe allúk pokiten rese silei letipen Kot. Jesus epwe amanawasefáli ena chón féfféringaw ewe mi fós ngeni, pwal ekkewe fite million are fen billion aramas ra máló, nge ese fen suuk ngeniir ar repwe silei usun Kot lupwen ra chúen manaw. Iwe, lón ewe Paratis wóón fénúfan, repwe káit usun án Kot kewe allúk me epwe suuk ngeniir pwe repwe ánnetatá ar tongei Kot ren ar álleasochisi an kewe allúk.

Lupwen ekkewe aramas mi ngaw ra manawsefál, itá repwe kúna kapwúng wóón minne ra féri lón manawer me lóóm? Aapw. Rom 6:7 a erá: “Pun lupwen eman aramas a mäla, a ngasala seni fän nemenien tipis.” Án ekkewe aramas mi ngaw tipis meinisin a fen musoló lupwen ra máló. Ina minne, repwe kúna kapwúng wóón minne ra féri mwirin ar manawsefál, esap ren minne ra fen féri lón manawer me lóóm lupwen resaamwo silei letipen Kot. Iwe, ifa usun repwe kúna álillis?

Mwirin ar manawsefál, epwe suuk ngeni ekkewe aramas mi ngaw ar repwe silei án Kot kewe allúk ekkewe repwe pwáló lupwen ekkewe puk lón kapas áwewe repwe suukuló. Iwe, repwe kúna kapwúng “won mine ra föri,” weween ika ra álleasochisi án Kot kewe allúk are resap. (Pwärätä 20:12, 13) Ren ekkena chómmóng aramas mi ngaw, ina ewe áeúin fansoun a suuk ngeniir ewe tufichin kúna manaw esemuch ren ar káé me féri letipen Kot.

Ei afalafal seni Paipel a álisi chómmóng aramas an epwe wor sefál ar lúkú Kot. Áwewe chék, ren ewe emén itan Yeong Sug. A mááritá lón ewe lamalamen Katolik me a fókkun achocho. Ekkóch lón an famili iir patere. Yeong Sug a ekiekin an epwe emén nienkatek, iwe a tolong me nónnóm lón imwen nienkatek. Nge mwirin och fansoun, a towu seni pokiten a lichippúng ren minne a kan fiffis lón ena leeni. Pwal eú, ese tongeni lúkú ewe afalafal usun ekkein ell pún me ren, án aramas kúna riáfféú lón ekkein ell ina eú mettóch mi kirikiringaw me pwúngúngaw.

Mwirin, emén Chón Pwáraatá Jiowa a áiti ngeni Yeong Sug ekkeei kapas lón ewe Paipel: “Pun ekewe chon manau ra silei pwe repwe mäla. Nge ekewe sotup resap silei och mettoch, resap pwal chüen angei liwinin ar angang.” (Än Salomon Afalafal 9:5) Ena Chón Pwáraatá Jiowa a álisi le mirititi pwe an kewe lewo rese nóm lón ekkein ell me kúna riáfféú ikena ie. Nge iir ra annut lón máló me wikkitiwiti ewe fansoun repwe manawsefál.

Yeong Sug a silei pwe chómmóng aramas rese fen rongorong ewe pwóróus mi enlet lón Paipel, iwe, a lefareni alon Jesus we lón Mateus 24:14, a erá: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.” Iwe iei, Yeong Sug a emén chón afalafala ewe kapas allim me a kan ekkesile ngeni aramas ei ápilúkúlúk mi amwarar seni Paipel.

Ewe Paipel a apasa pwe “Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.” (Föför 10:34, 35) Ina ewe napanap mi unusen pwúng sia ekiekin kúna seni emén Kot mi “sani pwüng me let.”​—Kölfel 33:5.