Ka kan iótek iteitan? Chómmóng aramas ra iótek, pwal mwo nge chókkewe rese lúkú pwe mi wor Kot. Nge met popun aramas ra kan iótek? Me ren eú survey mi kapas eis ngeni ekkewe chón France, a erá pwe esopwun chóchóón chón France ra iótek are ekilon fán ekkóch pwe “repwe meefi kinamwe.” Usun chék chómmóng chón Iurop, rese iótek ren ar repwe fel ngeni Kot nge ra chék mochen meefi “kinamweelóón letiper mi feito seni ar eáni iótek.” Nge ren ekkóch chón lúkú Kot ra chék iótek lupwen ra nóm lón osukosuk me ra ekieki pwe Kot epwe mwittir pélúweni ar tingor.​—Aisea 26:16.

Nge en, met meefiom? Ka meefi pwe iótek a chék álisuk ren an epwe ffatoló óm ekiek? Ika ka lúkú Kot, ka meefi álilliséchún iótek lón manawom? Are ka meefi pwe usun itá ese pélú óm kewe iótek? Ewe Paipel a tongeni álisuk le kúna pwe iótek esap chék eú mettóch epwe ekinamweeló letipom, nge ina ewe al mi aúchea ren óm kopwe arap ngeni Kot.