PWÓRÓUS LÚKÚNPÉÉN: PWÓRÓUS MI CHOFONA MI EFISI ÁN ARAMAS RESAP TONGEI KOT
Pwóróus mi Chofona pwe Pwóróusen Kot A Monomonoló
MINNE CHÓMMÓNG RA LÚKÚ:
Iei alon The New Encyclopædia Britannica: Ekkewe úlúngát lamalamen Chón Kraist mi watte, “choweán Katolik, Orthodox me Pirostan, ra lúkú pwe a wor Úlúmén lón emén Kot: Kot Sam, Kot Nau me Kot Ngún mi Fel. Ena sókkun lúkú me ren áitien lamalamen Chón Kraist, ra lúkú pwe a wor úlúmén lón chék emén kot nge esap weween pwe a wor úlúmén kot.”
EWE ENLET SENI PAIPEL:
Jesus Néún Kot we, ese apasa fán eú pwe a léllé ngeni Seman we are iir emén chék me Seman we. Nge a apasa: “Üpwe feila ren Semei, pun Semei a tekia seniei.” (Johannes 14:28) Pwal iei alon ngeni emén me lein néún kewe chón áppirú: “Üpwe feitä ren Semei pwal Semer, ren ai Kot pwal ar Kot.”—Johannes 20:17.
Ewe ngún mi fel esap emén kot. Ekkewe Chón Kraist lóóm ra “urelo ren ewe Ngun mi Fel,” me Jiowa a apasa: “Upwe niinatiu Nguni won sokkun fituk meinisin.” (Föför 2:1-4, 17, TF) Ewe ngún mi fel esap éúlúménún ewe úlúmén lón emén kot, nge ina án Kot we manaman.
POPUN A LAMOT:
Iei met ekkewe soukáé lón Katolik iter Karl Rahner me Herbert Vorgrimler ra erá usun ewe afalafalen úlúmén lón emén kot: “Sise tongeni weweiti [ewe afalafalen úlúmén lón emén kot] ika pwe ese wor áweween, nge inaamwo ika a wor áweween nge sap minne sipwe unusen weweiti.” Itá kopwe wesewesen tongei emén kese fókkun tongeni silei me weweiti? Ina popun ewe afalafal pwe a wor úlúmén lón emén kot, a pinei aramas le silei me tongei Kot.
Marco ewe sia fen fós usun, a kúna pwe ewe afalafal usun úlúmén lón emén kot, ina eú minen eppet ngeni. Iei alon: “Ua ekieki pwe Kot a amonomonaló pwisin i seniei. Ina met a efisi ai ekieki pwe Kot a monomonoló, ese áteneki aramas me use tongeni arap ngeni.” Iwe nge, “Kot, esap i emon Koten fitikoko.” (1 Korint 14:33, TF) Ese amonomonaló pwisin i senikich. A mochen sipwe silei i. Iei met Jesus a apasa: “Aia fel ngeni iö aia silei.”—Johannes 4:22.
Pwal iei met Marco a erá: “Atun ua silei pwe Kot ese kapachelong lón ewe afalafal usun úlúmén lón emén kot, iwe a fókkun atufichiei le poputááni ai riri ngeni.” Ika sia ekieki pwe Jiowa wesewesen Emén nge esap emén mi monomonoló, iwe epwe fókkun mecheres ngenikich ach sipwe tongei. Iei alon Paipel: “Are emon ese meefi tong, iwe, ese mo sinei Kot, pwe Kot mi tong.”—1 Johannes 4:8, TF.
