NOA me an we famili ra pachapachfengen atun ewe rán a púngúchoutiw. Anchangei ununur mi pwáló ren ttinen néúr we lamp, ra niwokkus atun ra rongorong púngúmóngun ewe út wóón osun ewe waimw me an púngúpúngúri lepekin. Ese mwáál ra fókkun choróng ren.

Atun Noa a nennengeni pwúlúwan we mi tuppwél, néún kewe úlúmén mwán mi anúkúnúk me pwúlúwer kewe, ese mwáál letipan a ur ren kilisou ngeni Kot. Lón ena fansoun mi kon áweires, neman Noa a meefi aururun letipan pokiten a nóm ren chókkewe a fókkun tongei. Iir meinisin ra núkúnúkéch me kinamwe. Ese mwáál Noa a emmweniir le apasa ar iótekin kilisou, nge a leúwommongetá pwe repwe rongorong an iótek fán akúrangen ewe rán.

Noa i emén mwán mi watte an lúkú. An we Kot, Jiowa, a túmúnú i me an we famili pokiten an lúkú. (Ipru 11:7) Nge lupwen a poputá púngútiw ewe rán mi chúen lamot ar repwe eáni lúkú? Ewer, a fókkun lamot ngeniir ena fán iten ekkewe rán mi áweires epwele feito. A pwal lamot ngenikich lón ach ei fansoun mi áweires. Ina minne, sipwe ppii met sia tongeni káé seni án Noa lúkú.

Me lúkún ewe waimw, a púngúfochofochetiw út úkúkún “faik rän me faik pwin.” (Keneses 7:4, 11, 12) Ewe konik a feffeitá feffeitá feffeitá. Iwe, lón ena atun Noa a kúna pwe an we Kot, Jiowa, a túmúnú ekkewe aramas mi pwúng me a apwúngú ekkewe mi ngaw.

Ewe Noter a aúkaló ewe féfférún ú ngeni a fis lein ekkewe chónláng. Chómmóng ekkewe chónláng ra tipetipeló ren án Satan ekieki chék pwisin i, iwe ra likitaló “wesewesen lenier” lón láng pwe repwe pwúlúweni ekkewe fin fénúfan me ra néúni me wóór ekkewe mwán mi mwánemmong iter Nefilim. (Jutas 6; Keneses 6:4) Ese mwáál Satan a fókkun pwapwa ren ei féfférún ú ngeni, pokiten a angawaló aramas, férien Jiowa kewe wóón fénúfan mi fókkun aúchea seni meinisin.

Iwe nge, atun ewe konik a kinetá, ekkewe chónláng mi ngaw ra amarukaló inisiir kewe, inisin aramas me liwiniti láng. Iwe seni ena fansoun resap chúen tongeni inisini inisin aramas. Ra péútaaló pwúlúwer me néúr kewe ar repwe fiti meinisin ekkewe aramas le máló lón ewe Noter.

Seni lón fansoun Enok, arapakkan fúpúkú ier lóóm, Jiowa a fen éúréúra ekkewe aramas pwe epwe nieló ekkewe mi ngaw. (Keneses 5:24; Jutas 14, 15) Seni ena atun, aramas ra pwal ngangawóló, iwe ra angawaló ei fénúfan me aúraló ren féfférún akkachofesá. Iwe iei, repwele ninniiló. Noa me an we famili ra itá pwapwa ren málóón ekkewe aramas?

Aapw! Pwal mwo ewe Kot mi úméúméch ese pwapwa. (Isikiel 33:11) Jiowa a fen féri mettóch meinisin pwe epwe suuki alen án aramas kúna manaw. A tinaló Enok an epwe éúréúra aramas, me a ewisa ngeni Noa an epwe falei ewe waimw. Ren fite fite ier, mwen mesen aramas Noa me an we famili ra angang weires le féri ewe watteen waimw. Jiowa a pwal akúnéú Noa an epwe emén “chon afalafala usun pwüng.” (2 Petrus 2:5) Noa a usun chék Enok, a éúréúra aramas usun ewe ránin kapwúng epwele  tori ewe fénúfan. Nge met ekkewe aramas ra féri? Seni láng, Jesus a kúna met a fis, nge atun a nóm fénúfan iei met a apasa usun ekkewe aramas lón fansoun Noa we: “Rese mo tepereni met a fis tori ewe nóter a feito o a sónireno meinisin.”​—Mateus 24:39, Kapasen God.

Anchangei met Noa me an we famili ra féri atun a púngútiw ewe rán lón ekkewe 40 rán mwirin án Jiowa appúngaló asamen ewe waimw. Iteiten rán an a púpúngutiw ewe út, ekkewe walimén aramas ra pwal féri ar angang me lón ewe waimw, ra túmúnúfengeniir, túmúnú imwer me ekkewe man. Iwe nge lón eú rán ewe watteen waimw a chúngúchúng me mwittir már. A poputá mwékút ewe waimw! Lupwen ewe konik a feffeitá, ewe waimw a pwal feitá tori a “tekia seni fanü.” (Keneses 7:17) A ifa me amwararen met Jiowa a féri, ewe Kot mi Unusen Manaman!

Ese mwáál Noa a kilisou ren ewe túmún i me an famili ra kúna me pwal án Jiowa úméúméch ngeniir me an néúnéú iir le éúréúra ekkewe aramas mi ninniiló lúkún ewe waimw. Eli ra meefi pwe ekkewe ier ra angang weires lón mi chék solap pún ekkewe aramas rese aúseling ngeniir. Ese mwáál a wor pwiin Noa, fefinan, tettelin néún me mwen ewe Noter, nge ese wor emén me lúkún an famili a aúseling ngeni. (Keneses 5:30) Nge iei, ekkewe walimén ra núkúnúkéch lón ewe waimw, ra meefi aururun letiper ren ar lesékúriiti minne ra fen féri lupwen ra áeá ar fansoun le afalafala ekkewe aramas pwe repwe kúna manaw.

Seni lón fansoun Noa we Jiowa ese siwil. (Malakai 3:6) Jesus Kraist a áweweei pwe ach ei fansoun a usun chék “fansoun Noa” we. (Mateus 24:37) Ach ei fansoun mi kkóló, pún a eú fansoun watteen weires nge epwele kataló ei ótót mi pworoingaw. Ikenái néún Kot aramas ra pwal esilefeili ewe kapasen éúréúr ngeni aramas mi mochen aúseling. Kopwe etiwa ena pwóróus? Ika ka fen etiwa ena pwóróusen amanaw, kopwe fiti ei angangen afalafala ei pwóróus ngeni ekkewe ekkóch? Noa me an famili ra isetiw eú leenien áppirú fán itach.

Atun ewe waimw a mammaan wóón ewe konik, ese mwáál chón Noa ra rongorong terekkikin iráán  ewe waimw. Itá Noa a lólilen ren watteen ekkewe lóó are ren péchékkúlen ewe waimw? Aapw. Eli ekkewe chón tipemwaramwar lón ei fansoun repwe lólilen, nge Noa ese tipemwaramwareiti Kot. Ewe Paipel a erá: “Ren än Noa lükü, a . . . föri efoch waimw.” (Ipru 11:7) Met Noa a lúkú? Jiowa a fen féri eú pwonen etipeeú an epwe amanawa Noa me chókkewe mi nóm ren seni lón ewe Noter. (Keneses 6:18, 19) Itá ewe Chón Fératá unuselapen láng me fénúfan me ménúmanaw meinisin esap tongeni féri pwe ewe waimw epwe péchékkúl? A fókkun tongeni! Noa a lúkúlúk wóón Jiowa an epwe apwénúetá An pwon. Iwe, Noa me an we famili ra “küna manau seni ewe koluk.”​—1 Petrus 3:20.

Mwirin ekkewe 40 rán me 40 pwiin, a mu ewe rán. Lón néúch calendar a fis ena órun December, 2,370 ier mwen Kraist. Nge a chúen watte án ewe famili angang. Ewe chék waimw a pappas wóón ewe konik, a pwal mwo nge fókkun tekia seni chuuk meinisin, me a ur ren chómmóng man. (Keneses 7:19, 20) Sia tongeni anchangei án Noa akkóta ekkewe angang mi chou pwe iir me néún kewe Säm, Ham me Jafet repwe túmúnú liméchún, péchékkúlen me enen ekkewe man meinisin. Pwúngún pwe ewe Kot mi efesira ekkewe manmwacho pwe repwe tipemecheres le tolong lón ewe waimw a pwal tongeni efesirer atun ewe Noter. *

A ffat pwe Noa a makkeei pwóróusen met a fis. A mak ineet a poputá púngútiw ewe rán, me ineet a kouló. A pwal apasa pwe ewe Noter a pwélúoló fénúfan lón 150 rán. Mwirin, ewe konik a poputá le mworetiw. Iwe, lón eú rán a mmen amwarar pún ewe waimw a fanetá wóón ewe “chukun Ararat,” ewe a nóm lón ewe fénú itan Turkey ikenái. A fis ena órun April, 2,369 ier mwen Kraist. Mwirin 73 rán lón ewe maram June, ungen ekkewe chuuk ra pwá. Mwirin úlúngát maram lón September, Noa a filatá an epwe sárisatá ekkóch osun ewe waimw, iwe a feiéch pwe saram a sarametiw me ewe ásepwál a enilong lón me ekinamwer. Me mwen ena, Noa a poputá le cheki fénúfan ika a fen éch án aramas repwe nónnóm wóón. A ássaaló emén machchang, iwe a ákkáás fetál, eli a kan liwinto pwe epwe asésé me a kan pwal changeló. Mwirin Noa a pwal ássaaló emén lisom, iwe a kan liwinto ren Noa, me pwal changesefaliló tori an a kúnékún leenian.​—Keneses 7:24–8:13.

Ese mwáál Noa a chúen akkomwa ar angangen fel ngeni Kot lap seni ar kewe angang lón ewe waimw. Sia tongeni anchangei án ewe famili chufengen iteitan pwe repwe iótekfengen me pwóróusfengen usun Semer we lón láng, ewe chón túmúnúúr. Iteiten án Noa epwe féri eú kefil mi lamot a kan kútta án Jiowa emmwen. Inaamwo ika a kúna pwe a “wesewesen pwas” ewe fénú mwirin ar nónnóm lón ewe waimw lap seni eú ier, nge ese suuki ewe asam me emmwenawu meinisin mi nóm lón. (Keneses 8:14) A chék witiwiti Jiowa!

Mékúren ekkewe famili lón ach ei fansoun ra tongeni káé seni ei mwán mi tuppwél. Noa a kókkótéch, tinikken lón an angang, mosonottam me a túmúnúéchú meinisin mi nóm fán an túmún. Nge lap seni ekkena, a kan akkomw ekieki letipen Jiowa Kot lón mettóch meinisin. Ika sia áppirú án Noa na lúkú, sipwe atoto feiéch ngeni meinisin sia tongei.

Jiowa a ereni Noa: “Oupwe towu me lon ewe waimw, en me pwülüom, pwal noum me pwülüer kewe.” Iwe, ewe famili a akkomw towu me ekkewe man meinisin ra tapweló mwirin. Ifa usun ra towu? Mi efitikoko? Aapw! Ewe Paipel a erá pwe ra towu me lón ewe waimw “lon en me sokun.” (Keneses 8:15-19) Lúkún ewe waimw, Noa me an we famili ra ngasangaseri ásepwál, ra nennetiw me wóón ewe chukuchukutan Ararat me kúna fénúfan mi limeliméch. Ese chúen wor Nefilim, féfférún akkachofesá, ekkewe chónláng mi ú ngeni Kot me unusen ewe ótóten aramas mi ngaw! * Iwe, a suuk ngeni aramas ar repwe poputá le manaweni manawer lón eú fénúfan mi fé.

 Noa a silei met epwe féri. A akkomw poputá ren an fel ngeni Kot. A ssenatá eú rongen asor, mwirin a eáni asoren kek ngeni Jiowa ekkóch ekkewe man mi limeliméch me ren Kot, ekkewe ra uwealong lón ewe waimw ákkáfúmén. (Keneses 7:2; 8:20, NW) Itá ei mettóch mi apwapwaai Jiowa?

Iei alon ewe Paipel: “Ewe Samol mi Lapalap a tini pwoöchün ewe asor.” Letipen Kot a meefi weires lupwen aramas ra aúraló fénúfan ren angangen akkachofesá, nge iei Kot a meefi pwapwa me kinamwe an a kúna eú famili mi tuppwél mi fel ngeni I me tipeppós le apwénúetá letipan. Jiowa ese ekieki pwe repwe unuséch. Sópwósópwun ena wokisin a erá: “Ekiekin leluken aramas a ngau seni lekisikisin.” (Keneses 8:21) Nengeni ifa usun Jiowa a pwal pwáraatá an tongei aramas fán mosonottam.

Kot a féri pwe esap chúen anúmamaú pwúlún ewe fénú. Lón ewe fansoun Atam me Efa ra ú ngeni Kot, i a anúmamaúwa ewe pwúl pwe epwe fókkun weires ar atakeni. Lamek, semen Noa we a fen eita ngeni néún we Noa, neman ena it a wewe ngeni “asésé,” are “ourur,” me a oesini pwe néún we epwe emmweni aramas ngeni eú fansoun asésé pún resap chúen nóm fán ena anúmamaú. Ese mwáál Noa a pwapwa an a mirititi pwe iei epwele kúna pwénúetáán ena oesini me epwele mecheres angangen atakeni pwúlún ewe fénú. Ina popun sise máirú án Noa a wiliti emén chón atake!​—Keneses 3:17, 18; 5:28, 29; 9:20.

Lón pwal ena atun, Jiowa a ngeni meinisin mwirimwirin Noa kewe ekkóch allúk mi ffat repwe emmweni manawer, a kapachelong leir án aramas resap nimanaw me resap áeámwáálli chcha. Kot a pwal fératiw eú pwonen etipeeú, a pwonei pwe esap chúen nieló ménúmanaw meinisin wóón fénúfan ren eú noter. A anómu ewe resim fán láng pwe esissillen núkúcharen an we pwon nge epwe kerán ina án aramas repwe kúna. Tori ei fansoun, iteiten ach sia kúna ewe resim a áchema ngenikich án Jiowa na pwon mi tong.​—Keneses 9:1-17.

Ika pwóróusen Noa eú chék tutulap, iwe, neman ewe chón tutulap epwe amuchaaló me wóón pwóróusen ewe resim mi apwapwa. Nge Noa, i wesewesen emén aramas mi kúna chómmóng weires lón manawan. Lón an we fansoun aramas ra kan manawattam, iwe a pwal sópwósópwóló manawen ena mwán mi tuppwél lón úkúkún 350 ier mwirin ewe Noter, me ekkena ier ra mmen ámmetek ngeni letipan. Noa a fókkun mwáálliló lón eú atun a puchuló, nge a pwal sópwósópwóló ena féfférmwáál lupwen néún néún we itan Kanaan a tipis watte, eú tipis mi atoto anúmamaú ngeni mwirimwirin Kanaan kewe! Noa a chúen manaw lupwen mwirimwirin kewe ra ttur lón tipisin fel ngeni ululun me féfférún akkachofesá lón fansoun Nimrot we. Iwe nge, a apwapwa ngeni Noa an kúna án néún we Säm isetiw leenien áppirú mi múrinné fán iten an we famili usun an lúkú.​—Keneses 9:21-28; 10:8-11; 11:1-11.

Mi lamot sipwe usun chék Noa, sipwe akkamwéchú ach lúkú. Lupwen aramas ra tunaló ewe Kot mi enlet are pwal mwo nge úkútiw le angang ngeni, mi lamot sipwe usun chék Noa sisap úkútiw. Jiowa a fókkun aúcheani ach likiitú fán tuppwél. Usun met Jesus Kraist a erá: “Iö epwe likitü tori lesopolan epwe küna manau.”​—Mateus 24:13.