Kot a kan aúseling ngeni aramas seni fénú meinisin. (Kölfel 145:18, 19) An we Kapas ewe Paipel a pesekich pwe sipwe ekkereni ekkewe mettóch mi lamot ngenikich. (Filipi 4:6, 7) Iwe nge, sap iótek meinisin ra apwapwaai Kot. Áwewe chék, ese pwapwaiti án emén amwéchúlúkú me epiepini iótek.​—Álleani Mateus 6:7, Testament Mi Fö.

Pwal eú, Jiowa a oput án emén iótek nge i mi wesewesen álleasolap ngeni an kewe allúk. (Än Salomon Fos 28:9) Áwewe chék me lóóm, Kot ese mochen aúseling ngeni ekkewe chón Israel pún iir ra tipisin ni manaw. A ffat pwe mi lamot sipwe féri met Kot epwe aúselingakich ren.​—Álleani Aisea 1:15.

Ika ese wor lúkú, sise tongeni arap ngeni Kot lón iótek. (James 1:5, 6) A lamot sipwe wesewesen lúkú pwe mei wor Kot me a tongekich. Sia tongeni apéchékkúlaló ach lúkú ren ach kákkáé ewe Paipel pún lúkú mi enlet a lóngólóng wóón ekkewe pisekin ánnet me anúkúnúk mi nóm lón án Kot we Kapas.​—Álleani Ipru 11:1, 6.

Sipwe iótek seni enletin letipach me fán tipetekison. Pwal mwo nge ewe Néún Kot, Jesus, a iótek fán tipetekison. (Lukas 22:41, 42) Ina minne, sisap fen ereni Kot met epwe féri nge sipwe fen achocho le weweiti minne a mochen ren ach ákkálleani ewe Paipel. Iwe, sia tongeni etipeeúfengeni ach iótek me ewe letipen Kot.​—Álleani 1 Johannes 5:14.