1, 2. Ren ach sipwe apwapwaai Kot, met sókkun aramas sipwe usuni?

 SIA kan ekieki met meefien aramas usuch. Iwe nge, ren kich Chón Kraist itá sipwe fen kon ekieki meefien Jiowa usuch, pún i ewe Emén mi lapalap seni meinisin wóón unuselapen láng me fénúfan, me i ewe popun manaw.​—Kölf. 36:9.

² Ewe aposel Petrus a makkeei: “Pokiten ekkeei mettóch meinisin repwe móróló, oupwe usuni sókkun aramas mi féfféri féffér mi fel o féri féfférún tuppwél ngeni Kot!” (2 Pet. 3:11, NW) Ren ach sipwe apwapwaai Kot, a lamot sipwe eáni “féffér mi fel,” weween manawach, ekiekich me ach fel ngeni Kot repwe limeliméch. Pwal och, mi lamot sipwe féri ekkewe “féfférún tuppwél ngeni Kot” fán watteen ach tongei me súféliti. Ina minne, Kot a áfánni esap chék ach kewe féffér nge pwal masouen letipach. Pokiten Jiowa, i ewe a “sotuni leluken aramas,” a silei ika ach féffér ra limeliméch me ika sia fel ngeni i chék.​—1 Kron. 29:17.

3. Menni kapas eis mi weneiti ach riri ngeni Kot sipwe ekieki?

³ Satan ewe Tefil ese mochen ach sipwe nóm fán án Kot chen. Iwe a achocho úkúkún an tufich pwe epwe etipetipakich ach sipwe péútaaló ach riri ngeni Jiowa. A kan ákkáeá kapas chofona le otupukich pwe sipwe kul seni ewe Kot sia fel ngeni. (Joh. 8:44; 2 Kor. 11:13-15) Ina minne, sipwe tipachem le pwisin eisinikich: ‘Ifa usun Satan a kan otupu aramas? Met upwe tongeni féri pwe upwe túmúnú ai riri ngeni Jiowa?’

4. Ren án Satan epwe atai ach riri ngeni Kot, met a achocho le etipetipa, iwe pwata?

⁴ Ewe chón káé James a makkeei: “Eman me eman aramas a tori sosotun ren püsin an mochenia mi atekini  o pani letipan. Iwe, are än eman mochenia a liapeni letipan, a fis an tipis, nge are an tipis a unusela, a fis an mäla.” (Jas. 1:14, 15) Ren án Satan epwe atai ach riri ngeni Kot a achocho le etipetipa letipach, ewe populapen mochenich.

5, 6. (a) Ifa usun Satan a achocho le etipetipakich? (b) Ikkefa ekkewe minen otuputup Satan a áeá pwe epwe angawaló mochenin letipach? Ifa úkúkún angéchún Satan le áeá ekkeei minen otuputup?

⁵ Ifa usun Satan a etipetipa letipach? Paipel a apasa: “Unusen fanüfan a nom fän nemenien Ewe mi Ngau.” (1 Joh. 5:19) Ekkewe “mettochun lon fanüfan” ra kapachelong lón án Satan kewe minen otuputup. (Álleani 1 Johannes 2:15, 16.) Ren fite fite ngeréú ier, ewe Tefil a fen anapanapaéchú ei fénúfan pwe epwe eú minen otuputup ngeni aramas. Iwe, pokiten sia nónnóm lón ei fénúfan, mi lamot sipwe túmúnúkich seni an kewe minen otuputup.​—Joh. 17:15.

⁶ Satan a áeá ekkewe mettóch repwe angawaló mochenin letipach. Ewe aposel Johannes a fós usun úlúngát minen otuputup Satan a áeá: (1) “mochenian fituk,” (2) “mochenian lemas,” me (3) “lamalamtekian manauen aramas.” Satan a fen áeá ekkeei mettóch le otupu Jesus me lón ewe fénúpéén. Pokiten Satan a fen pin ákkáeá ekkena minen ssár ren fite fite ier, iwe a fókkun angéch le ákkáeá ikenái, a silei menni leir epwe áeá pwe epwe ssárei emén me emén aramas. Me mwen ach sipwe káé ifa usun sipwe túmúnúkich seni án Satan kewe minen ssár, sipwe akkomw nengeni ifa usun Satan a sópwéch le otupu Efa, nge ese sópwéch le otupu Néún Kot we.

7. Ifa usun Satan a áeá “mochenian fituk” pwe epwe otupu Efa?

⁷ Ren an epwe sópwósópwóló manawen aramas, a lamot ngeniir ewe mettóch mwéngé. Ewe Chón Fératá mettóch meinisin a fen anapanapa fénúfan pwe epwe uwaani chómmóng mwéngé. Satan a tongeni áeángawa ewe memmeefin mochen mwéngé mi pwúkún nóm rech pwe epwe okullukich seni ach féri letipen Kot. Nengeni ifa usun a áeá ei le otupu Efa. (Álleani Keneses 3:1-6.) Satan a ereni Efa pwe a tongeni mwéngé seni ewe “irän silei öch me ngau,” nge esap máló. A erá pwe lón ewe ránin epwe mwéngé, i epwe usun chék Kot. (Ken. 2:9) Ewe Tefil a erá pwe ese lamot án Efa epwe álleasochisi Kot ren an epwe manaw. A ifa me watte chofonan ena pwóróus! Atun a fótolong lón ekiekin Efa ena pwóróus, iwe a wor an kefil: A tongeni péútaaló ena ekiek are a tongeni ekkekieki tori a péchékkúleló an mocheniaiti ewe féún irá. Inaamwo ika Efa a tongeni mwéngé seni ekkewe ekkóch irá lón ewe tánipi, nge a filatá an epwe ekkekieki alon Satan we usun ewe irá lukanapen ewe  tánipi, iwe a “angei uän ewe irä o mongö.” Ina minne, Satan a efisi me lón letipen Efa an epwe mocheniaiti ewe mettóch mi pinepin me ren ewe Chón Fératá i.

8. Ifa usun Satan a áeá “mochenian fituk” le etipetipa Jesus, iwe, pwata Satan ese sópwéch?

⁸ Satan a pwal áeá ena minen otuputup le etipetipa Jesus me lón ewe fénúpéén. Mwirin án Jesus echikefel úkúkún 40 rán me 40 pwiin, Satan a áeá án Jesus mochen mwéngé le sótuni i. Iei alon Satan, “Are en Nöün Kot, kopwe üreni ei fau pwe epwe wiliti pilawa.” (Luk. 4:1-3) A nóm ren Jesus eú kefil: A tongeni filatá an epwe áeá an manaman le féri anan mwéngé pwe epwe wesiló an echik are esap. Jesus a silei pwe ese pwúng an epwe áeá an manaman fán iten pwisin chék feiéchún. Inaamwo ika a echik, nge a lamot ngeni an epwe akkamwéchú an riri ngeni Jiowa lap seni an epwe áwesaaló an echik. Jesus a pélúweni Satan ren an apasa: “A fen mak, ‘Aramas resap manaw ren mwöngö chök, pwe pwal ren iteiten än Kot kapas.’”​—Luk. 4:4, Agapé.

9. Met ena “mochenian lemas,” me ifa usun Satan a áeá le otupu Efa?

⁹ Johannes a pwal fós usun och minen otuputup, ina “mochenian lemas.” Ena kapas a pwáraatá pwe emén a tongeni poputá le mocheniaiti och mettóch ren an chék nennengeni. Satan a sótuni Efa ren “mochenian lemas” lupwen a apasa: “Mesemi epwe nela.” Ren án Efa nennengeni ewe féún irá mi pinepin seni, iwe, a péchékkúleló an mochen angei. Efa a kúna pwe ewe irá a “apwapwai aramas le katol.”

10. Ifa usun Satan a áeá “mochenian lemas” pwe epwe otupu Jesus? Ifa usun Jesus a pélúweni?

¹⁰ Ifa usun ren Jesus? Satan a “aküna ngeni [Jesus] mwün fanüfan meinisin lon ekis chök mochomochen fansoun. Iwe, a üreni, ‘Ngang üpwe ngonuk ar kewe nemenem meinisin pwal wöür kewe.’” (Luk. 4:5, 6) Lón ena atun Jesus ese wesewesen kúna meinisin ekkewe mwú, nge ese mwáál Satan a ékúna ngeni lingen ekkena mwú pwe a ekieki pwe Jesus epwe tup ren linger. Satan a erá: “Are kopwe fel ngeniei, üpwe mwüt ngonuk pwe kopwe eäniir meinisin.” (Luk. 4:7) Jesus ese fókkun mochen usuni ewe sókkun aramas Satan a mochen an epwe usuni. A mwittir pélúweni: “A mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’”​—Luk. 4:8.

11. Ifa usun Satan a otupu Efa?

¹¹ “Lamalamtekian manauen aramas” ren minne a nóm rer, ina eú me lein ekkewe  mettóchun fénúfan Johannes a fós usun. Lón ewe fansoun Atam me Efa chék ra nóm wóón fénúfan, rese tongeni esika ngeni ekkóch minne a nóm rer. Nge ra pwáraatá pwe iir mi lamalam tekia. Lupwen Satan a sótuni Efa, a erá pwe Kot a amwéchú seni i och mettóch mi éch. A ereni pwe lón ránin epwe mwéngé seni ewe “irän silei öch me ngau,” iwe epwe “wewe ngeni Kot o silei mine a öch pwal mine a ngau.” (Ken. 2:17; 3:5) Ina minne, Satan a ámmeef ngeni Efa pwe a tongeni pwisin imuló seni Jiowa. Eli án Efa lamalam tekia ina eú popun an a lúkú án Satan kapas chofona. A ocheei ewe féún irá, me a wesewesen lúkú pwe esap máló. A ifa me mwáállin!

12. Ifa pwal och mettóch Satan a sótuni Jesus ren, me met Jesus a pélúwen ngeni?

¹² Jesus a sókkóló seni Efa pún a isetiw eú leenien áppirú mi múrinné ren an tipetekison. Satan a sótuni i an epwe féri och mettóch aramas repwe mwaar ren nge epwe sótuni Kot ren. Nge Jesus ese fókkun mochen féri pún ina eú féfférún lamalam tekia! A ffat met Jesus a pélúweni, a erá: “A mak lon ekewe Toropwe mi Pin, ‘Kosap sotuni ewe Samol om Kot.’”​—Álleani Lukas 4:9-12.

13, 14. Áweweei ifa usun Satan a áeá ekkóch minen otuputup lón ei fansoun.

¹³ Ikenái, Satan a áeá ekkewe esin minen otuputup a fen áeá ngeni Efa me Jesus. A otupu aramas ren “mochenian fituk,” me a áeá ei fénúfan le achéúfetálei féffér mi limengaw, mwéngémmong me únnúmmong. A tongeni luki letipen ekkewe mi túmúnúngaw me otupuur ren “mochenian lemas” pwe repwe katol sasingin me kachitoon kapasingaw ákkáeúin lón Internet. Me ren chókkewe mi lamalam tekia me sikesik ren minne a nóm rer, ra kan tupuló ren mochenian pisek, watteen nemenem, me ar kútta iteúéchúúr.

¹⁴ Ekkewe “mettochun lon fanüfan” ra usun chék néún ewe chón attau kewe pake. Ra ámeseikatá ekkewe iik nge a wor éé mi pacheetá wóón eféú me eféú pake. Satan a áeá minne aramas ra ekieki pwe mi lamot ngeni manawer an epwe otupuur le féri ekkewe mettóch epwe atai án Kot kewe allúk. Nge ekkena minen otuputup ra tongeni eingawaló mochenich kewe me letipach. Ra otupukich ach sipwe lúkú pwe a kon lamot  ach sipwe túmúnú osupwangach lón pekin aion me kútta pwisin kinamween manawach lap seni ach féri letipen Kot. Sipwe tupuló ren ekkeei minen otuputup?

15. Ifa usun sipwe áppirú Jesus le ú ngeni án Satan kewe otuputup?

¹⁵ Inaamwo ika Efa a tupuló ren án Satan kewe minen otuputup, nge Jesus a ú ngeni. Iteiten fansoun án Satan sótuni i, Jesus a pélúweni seni ewe Kapasen Kot, me erá: “A fen mak,” are “A apasa.” Ika sia tinikken le káé Paipel, sipwe silefichi me sipwe tongeni chechchemeni ekkewe wokisin repwe tongeni álisikich lupwen sia kúna sóssót. (Kölf. 1:1, 2) Ach chechchemeni pwóróusen chókkewe mi tuppwél ngeni Kot lón Paipel epwe álisikich ach sipwe áppirúúr. (Rom 15:4) Ach enletin súféliti Kot, tongei minne a tongei me oput minne a oput epwe túmúnúkich.​—Kölf. 97:10.

16, 17. Pwata ewe “tufichin ekiek” a tongeni anapanapa ika met sókkun aramas sipwe usuni?

¹⁶ Aposel Paulus a pesekich ach sipwe áeá ach “tufichin ekiek” pwe sipwe wiliti ewe sókkun aramas mi eáni án Kot ekiek nge esap án ei fénúfan. (Rom 12:1, 2, NW) Paulus a menlapei lamoten ach sipwe nemeniéchú met sia ekieki ren an apasa: “Am oua ataieno sokkun namanam tekia meinisin mi eppeti minne am oua sinei ussun God. Am oua fötekini iteiten sokkun ekiek meinisin pwe repwe anneasosichi Christ.” (2 Kor. 10:5, Kapasen God) Minne sia eáni ekiek a fókkun tongeni anapanapakich ika met sókkun aramas sipwe usuni. Ina popun, a lamot sipwe ‘amwöchünükü lon ach ekiek’ ekkewe mettóch mi apéchékkúl.​—Fil. 4:8.

¹⁷ Sise tongeni emén mi pin ika sia akkamwéngééni ekiekich ren ekkewe sókkun ekiek are mochen ese pwúng. Mi lamot sipwe tongei Jiowa seni “eu leluk mi limöch.” (1 Tim. 1:5) Nge pokiten lelukach a otuputup, iwe eli sisap mwo nge tepereni pwe ekkewe “mettochun lon fanüfan” ra fen etipetipakich. (Jer. 17:9) Ina minne, mi lamot sipwe ‘püsin sotunikich o apwüngükich, pwe sipwe silei ika sia wesewesen lükü Kraist’ ren ach wenechar le etittinakich fán emmwenien minne sia káé seni Paipel.​—2 Kor. 13:5.

18, 19. Pwata a lamot sipwe tipeppós pwe sipwe usuni ewe sókkun aramas Jiowa a pwapwaiti?

¹⁸ Eú mettóch a pwal tongeni álisikich le ú ngeni ekkewe “mettochun lon fanüfan,” ina ach lefareni alon Johannes ei: “Fanüfan me mettochun lon aramas ra kon mochenia ngeni repwe morola, nge iö a föri letipen Kot epwe manau tori feilfeilachök.” (1 Joh. 2:17) Usun itá án Satan ei ótót epwe nómoffóchóló, iwe nge, epwe móróló. Ach chechchemeni ena epwe álisikich ach sisap tupuló ren Satan.

¹⁹ Aposel Petrus a éúréúrakich ach sipwe usuni ewe sókkun aramas Kot a pwapwa ren atun sia “witiwiti ewe Ränin Kot o achocho ngeni tori epwe müttirito. Iei ewe Rän lupwen ekewe läng repwe karala o tala o minen läng repwe telila ren pwichikar.” (2 Pet. 3:12) Ekiseló chék, epwe war ena rán, me Jiowa epwe amóeló meinisin kinikinin án Satan ei ótót. Nge iei mwo, Satan a achocho le áeá “mettochun lon fanüfan” pwe epwe otupukich usun an otupu Efa me Jesus. Mi lamot sisap usun Efa le féri pwisin mochenich. Ika sia féri ena, usun itá Satan a wiliti ach kot. Mi lamot sipwe áppirú Jesus me ú ngeni ekkena minen otuputup, inaamwo ika usun itá iir mi apwapwa are ámmeseik. Amwo kich meinisin sipwe tipeppós pwe sipwe usuni ewe sókkun aramas Jiowa a pwapwaiti.