Mei Wor Emén mi Aúselinga Iótek?

Iei alón Patricia * seni Ireland: “Me lóóm ua tipemwaramwar ika mei wor Kot. Iwe nge, fán ekkóch ua chék iótek. Ua tipemwaramwar ika mi wor emén mi aúseling, nge ua áneán pwe mei wor emén a aúseling. Ua letipechou me meefi pwe esor popun manawei. Use mochen lúkú pwe mi wor Kot pun ua ekieki pwe chókkewe chék mi apwangapwang ra lúkú Kot.”

KA TONGENI meefi meefien Patricia? En mi kan iótek inaamwo ika ka tipemwaramwar ika mei wor Kot? Ika ina, esap chék en. Ekieki mwo ekkeei pwóróus fan.

◼ Eú repotun 2,200 chón Britain a pwári pwe órun 500 aramas chék ra lúkú pwe mei wor Kot mi fératá ewe fénúfan me aúseling ngeni ekkewe iótek. Nge 1,200 aramas me lein ekkena 2,200 ra mwaren iótek fán ekkóch.

◼ Eú repotun 10,000 aramas seni sókkópaten fénú, a pwári pwe chómmóng lein chókkewe rese lúkú Kot, ra iótek.

Pwata Ekkóch Ra Tipemwaramwar?

Emén chón Britain itan Alan a apasa: “Me lóóm use lúkú Kot pokiten ua ekieki pwe lamalam a fis pokiten an epwe nemeni aramas me kútta moni. Pwal eú, ua ekieki pwe ika mei wor Kot, esap kon chómmóng pwúngúngaw epwe fis. Nge fán ekkóch, ua mómmót me fós ngeni ‘och mettóch.’ Ua pwal pwisin eisiniei, ‘Met popun ua fis?’”

Emén me emén mi eáni ena esin memmeef, a pwisin wor popun an tipemwaramwar ika ekkewe iótek ra kan pélú. Lape ngeni ekkena esin tipemwaramwar ra lapoló pun ese pélú ekkewe kapas eis, usun chék ekkeei kapas eis fan:

◼ Mei wor emén Chón Fératá?

◼ Pwata fán chómmóng, lamalam ra apéchékkúla minne mi ngaw?

◼ Pwata Kot a mutatá riáfféú?

Itá kopwe meefi lúkúlúk le iótek, ika kopwe silei pélúwen ekkena kapas eis?