“Resap Peekini Fönüfan”

“Fönüfan a opwut iir pokiten iir resap peekini fönüfan.”​—JON 17:14, PAIPEL: ÄN KOT KAPAS TESTAMENT SÖFÖ.

Met Weween ena Wokisin: Pokiten Jises ese pekini fönüfan, iwe, ese angolong lon mwökütükütün mwuun fönüfan me fitikoko lefilen aramas. A äweweei: “Are mwüi epwe pop seni ei fanüfan, nei kewe chon angang repwe fiu pwe repwe tümwünüei, pwe üsap oolong lepöün ekewe nöüwisen chon Juta. Nge mwüi esap pop seni ikei.” (Jon 18:36) A pwal pesei nöün kewe chon käeö ar repwe ti seniir ekkewe ekiek, kapas me föfför mi ü ngeni än Jiowa we Kapas.​—Mattu 20:25-27.

Ekkewe Chon Kraist Loom Rese Pekini Fönüfan: Emön sou mak usun lamalam a erä pwe ekkewe Chon Kraist loom “rese mochen fiti maun inaamwo ika repwe küna esiit, kalapus are mälo.” Ra filatä ar repwe küna riäfföü lap seni ar repwe fangetä ar resap fiti maun. Pwal limöchün manauer a asokerolo seni ekkewe ekkoch. Paipel a erä ei usun ekkewe Chon Kraist: “Nge iei ekewe chon lükün lamalam ra weitifengeniir pwe ousap chüen etiir lon ewe sokun föför mi anioput ra manau lon, iei mine ra turunufaseikemi.” (1 Piter 4:4) Iei alon emön sou uruwo Will Durant usun Chon Kraist: “Aramas mi ssenük föfföringawer ra umwesilo ren napanapen manauen Chon Kraist mi limöch me pwüng.”

Iö kewe Rese Pekini Fönüfan lon Ach Ei Fansoun? Iei alon New Catholic Encyclopedia usun än Chon Kraist rese fiti maun: “A fokkun ngaw ika emön esap fiti maun.” Nge, eü mwicheichen aramas mi tümünü än emön me emön pwüng lon Afrika a änneta pwe lamalam meinisin ra fiti ewe angangen arosaloon chon Rwanda lon 1994, “chilon chök Chon Pwäraatä Jiowa rese fiti.”

Emön senseen high school a lichippüng mwirin an etittina pworausen än chon Nazi nielo chommong aramas. A erä: “Ese fokkun wor aramas mi tekison mi pwäri chommongun än chon Nazi kapas chofona, arochongaw me angangen arosalo” lon ewe atun. Nge, mwirin an küttafichi pworausen ena mettoch, a küna pwe Chon Pwäraatä Jiowa chök rese fitaalo chon Nazi, nge ra tipeppos lon ar lükü inaamwo ika ra küna riäfföü seniir.

Ifa usun napanapen manauen chokkewe mi erä pwe iir Chon Kraist? Iei alon eü puk, U.S. Catholic: “Lap ngeni säräföön chon Katolik rese tipeeü ngeni än ewe lamalamen Katolik afalafal usun nomfengen mwen pwüpwülü me lisowu mwen pwüpwülü.” Ena puk a pwal apasa meefien emön deacon, mi erä: “Ai lükü lap ngeni ekkewe mi pwüpwülü iei ra fen nomfengen mwen pwüpwülü.” Nge, The New Encyclopædia Britannica a apasa pwe “Chon Pwäraatä Jiowa ra akkamwöchü eü manau mi pwüng me limöch.”