Käeö Seni än Kot we Kapas

Pwata a Wor Eü Än Kot Mwicheich?

Ei pworaus a eppiietä ekkoch kapas eis eli ka fen ekkeis, me a pwal äiti ngonuk ia kopwe tongeni älleani me ie pölüwan seni noum we Paipel. Chon Pwäraatä Jiowa ra pwapwa le äiti ngonuk pölüwen ekkeei kapas eis.

1. Pwata Kot a akkota ekkewe Chon Israel?

Kot a akkota mwirimwirin ewe semelap Eperiam kewe pwe epwe eü mwu me a ngeniir eü pinükün allük. A eita ngeni ena mwu, mwuun Israel me a ewisa ngeni le tümünü ewe fel mi enlet me an we Kapas ewe Paipel. (Kölfel 147:19, 20) Ina popun ra feiöch aramasen mwu meinisin.​—Älleani Keneses 22:18.

Kot a filatä ekkewe Chon Israel pwe repwe nöün chon pwäraatä. Atun ra älleasochisi Kot, ra feiöch seni an kewe allük. (Tuteronomi 4:6) Sia tongeni sileöchü ewe Kot mi enlet ren ach käkkäeö uruwoon ekkewe chon Israel.​—Älleani Aisea 43:10, 12.

2. Pwata ekkewe Chon Kraist mi enlet ra kokkotöch?

Mwirin fitu, fitu ier a pöüt seni ekkewe chon Israel än Kot chen, me Jiowa a filatä ewe mwichefelin Chon Kraist pwe epwe siwilin. (Mattu 21:43; 23:37, 38) Me loom ekkewe Chon Israel iir nöün Kot chon pwäraatä. Ikenäi, Chon Kraist mi enlet ra wisen Chon Pwäraatä Jiowa.​—Älleani Fofor 15:14, 17.

Jises a akkota pwe nöün kewe chon käeö repwe wisen pwäraatä usun Jiowa me föraalo chon käeö seni mwu meinisin. (Mattu 10:7, 11; 24:14; 28:19, 20) Arapakkan epwele much ei angang. Iei ewe äkkäeüin fansoun Jiowa a ochufengeni million aramas lon ewe fel mi enlet seni mwu meinisin. (Pwarata 7:9, 10) Ekkewe Chon Kraist mi enlet ra pwal kokkotöch pwe repwe apöchökkülafengeniir me älillisfengen. Ra pwapwa le eänifengeni eü sokkun prokram seni Paipel lon ar kewe mwich woon unusen fönüfan.​—Älleani Ipru 10:24, 25.

 3. Lon ach ei fansoun, ifa usun Chon Pwäraatä Jiowa ra poputä?

Ewe mwicheichen Chon Pwäraatä Jiowa ikenäi a poputä orun ewe ier 1870. Eü kükkün kümiin chon käeö Paipel ra künasefäli pworaus mi enlet seni Paipel mi fen pöütülo ren langattam fansoun. Ra silei pwe Jises a akkota ewe mwichefelin Chon Kraist ar repwe afalafal. Iwe, ekkena chon käeö Paipel ra poputä le afalafala pworausen Mwuun Kot woon unusen fönüfan. Ra iteni ewe it Chon Pwäraatä Jiowa lon ewe ier 1931.​—Älleani Fofor 1:8; 2:1, 4; 5:42.

4. Ifa usun Chon Pwäraatä Jiowa ra kokkotöch ikenäi?

Lon fansoun ekkewe aposel, ekkewe mwichefelin Chon Kraist lon chommong fönü ra feiöch seni eü mwichen sou pwüngüpwüng. Ekkewe aposel me ekkoch elter ra choni ena mwichen sou pwüngüpwüng. Ra mirititi pwe Jises i ewe Möküren ewe mwichefel. (Fofor 16:4, 5) Pwal ina usun ekkewe Chon Pwäraatä Jiowa ikenäi, ra mirititi pwe Jises i nöür Sou Emmwen. (Mattu 23:9, 10) Ra pwal feiöch seni emmwenien ekkewe elter mi lipwäköch, iir mi choni ewe mwichen Sou Pwüngüpwüng mi akkawora apöchökkül seni Paipel me ekkemmweni lap seni 100,000 mwichefel. Lon eü me eü mwichefel a wor ekkewe mwän mi lipwäköch mi wisen elter are sou emmwen. Ekkeei mwän ra tümünüöchü nöün Kot kewe sip.​—Älleani 1 Piter 5:2, 3.

Chon Pwäraatä Jiowa ra kokkotöch le afalafala ewe kapas allim me föraalo chon käeö. Ren ar repwe älisi aramas meinisin, ra afföüni, peresei me anöünöü ekkewe puken me taropween äweween Paipel lon lap seni 500 fosun fönüfan. Ra usun chök ekkewe aposel le afalafala aramas lon imwer. (Fofor 5:42) Ra mochen repwe pwisin käeö ngeni chokkewe mi tongei ewe enlet. Pokiten nöün Jiowa kewe aramas ra akkomwa ar repwe apwapwa Kot me älisi aramas, iwe, iir ra eü mwichen aramas mi pwapwa.​—Älleani Kölfel 33:12; Fofor 20:35.

Ren pwal ekkoch pworaus, ppii sopwun 19 lon ei puk, Met ewe Paipel A Wesewesen Apasa?, förien Chon Pwäraatä Jiowa.