Ewe Enlet a Tongeni Siwili Manauom

ELI ka fen rongorong are käeö eü me lein ekkewe pworaus mi chofona usun Kot, ekkewe lesen mwen ei ra pwäraalo usur. Iwe nge, neman ka tipemwaramwar le siwili om lükü, äkkäeüin ika ina om lükü seni loom.

A pwal ina usun meefien chommong aramas. Ekkoch lamalam ra pinei än emön epwe apöpööi äitier kewe ngeni met ewe Paipel a apasa. Ekkoch ra penaatä ar kewe afalafal mi chofona ren ar apasa pwe a weires än aramas repwe weweiti ewe Paipel. Iwe nge, lap ngeni nöün Jises kewe chon käeö, iir aramas kisikis me rese fiti sukul tekia, nge ra mwittir weweiti met Jises a äiti ngeniir.​—Fofor 4:13.

Neman ka pwal pireir le etittina om lükü pokiten ka ekieki pwe om föri ena epwe pwäraalo pwe a nafangaw om lükü. Nge itä mi pwüng pwe Kot esap pwapwa ika kopwe etittina ewe Paipel, älleani met a apasa me weweiti met a kütta sonuk? Aapw. An we Kapas a peseok le pwisin etittina ewe Paipel, iei alon: ‘Kopwe pwarata minne letipen Kot, minne mi murinno o fich o unusoch.’​—Rom 12:2, TF.

A lamot kopwe käeö ewe enlet usun Kot pwe epwe tongeni amürinnölo manauom, nge esap chök ren om kopwe käeö mineföön mettoch. (Jon 8:32) Iei Deanne, ewe sia fen pworaus usun me lepoputään, a fen anüküchara an lükü woon än Kot we Kapas. A apasa: “Use kon ekieki pwe ewe Paipel a fokkun fataffatöch tori ai ua käeö. Iei ua silei pwe Jiowa, i wesewesen emön Kot me emön Sam mi tong lon läng. Ua küna pwe a wor popun manauei.”

Neman ka fen pin käeö ewe Paipel, nge kese chök pwapwaiti. Ika ina, kosap fangetä. Ika ka mochen weweiti ewe Paipel nge ekkoch ra fen äiti ngonuk ekkewe pworaus mi chofona usun Kot, iwe, a usun eü mwesin mi ta ka resin förisefäli nge ka nöünöü pukan mi mwääl. Neman ka tongeni föri ekkoch kinikinin ewe mwesin nge ekkewe ekkoch kese tongeni föri, iwe, ka fangetä. Nge ika kopwe nöünöü ewe puk mi pwüng fän iten ena mwesin, iwe, ka tongeni äwesöchüolo.

En mi mochen käeö ewe enlet usun Kot? Aua etiwok om kopwe chuuri Chon Pwäratä Jiowa lon leeniom we are mak ngeni eü me lein ekkewe address mi kkan ngonuk mi mak lon ei puk lon pekin taropwe 4 fän iten eü käeöön Paipel ese kamö.

[Ekis Pwóróus lón pekin taropwe 9]

‘Kopwe pwarata minne letipen Kot, minne mi murinno o fich o unusoch.’​—ROM 12:2, TF