Lükülük woon Jiowa Atun Sia Arap ngeni ewe Sopwoloon
Lükülük woon Jiowa Atun Sia Arap ngeni ewe Sopwoloon
“Oupwe lükü ewe Samol mi Lapalap [Jiowa] fansoun meinisin.”—AIS. 26:4.
1. Ifa sokkofesenin nöün Kot aramas me chon ei fönüfan?
SIA nonnom lon ei fönüfan chommong aramas rese chüen silei iö are met repwe lükülük woon pokiten ra fen lichippüng fän chommong. A ifa me sokkoloon nöün Jiowa kewe chon angang! Fän emmwenien än Kot tipatchem, ra silei lamotongawen ar repwe lükülük woon “ekewe samol ika won eman aramas.” (Kölf. 146:3) Nge ra anomu manauer me ar äpilükülük woon Jiowa, pun ra silei pwe a tonger me a apwönüetä an Kapas fansoun meinisin.—Rom 3:4; 8:38, 39.
2. Ifa usun Josua a pwäratä pwe sia tongeni lükülük woon Kot?
2 Josua a pwäratä pwe sia tongeni lükülük woon Kot. Le sopwoloon manauan, a ereni chon Israel: “Ämi meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi mürina meinisin a pwon ngenikemi. Iteiten ekewe pwon a eäni ngenikemi ra pwönüetä, nge esap wor eu me leir esap pwönüetä.”—Jos. 23:14.
3. Met iten Kot a pwäralo usun i?
3 Jiowa a akkapwönüetä an kewe pwon, esap chök fän iten an tongei nöün kewe chon angang, nge äkkäeüin, fän iten pwisin itan we. (Eks. 3:14, NW; 1 Sam. 12:22) Iei ewe kapas le poputään lon The Emphasized Bible, makkeien J. B. Rotherham, usun ewe iten Kot: ‘Ei it a usun eü pwon mi fiti ümöümöch, a wewe ngeni än Kot tufichin wiliti met chök a lamot ngeni an epwe wiliti pwe epwe ataweei sokkun osukosuk me fitikoko meinisin are osupwang mi piitä. Ena it a eü pwon, a äiti ngenikich usun Kot, me älisikich le chechchemeni i. Kot esap säü ren Itan we, a tuppwöl tori feilfeilo.’
4. (a) Met Aisea 26:4 a pese ngenikich? (b) Met sipwe pworaus woon lon ei lesen?
4 Pwisin eisinuk: ‘Mi naf ai silei Jiowa pwe upwe unusen lükülük woon? Ua äpilükülüköch usun mwach kkan pun ua silei pwe Kot a nemeni mettoch meinisin?’ Iei alon Aisea 26:4: “Oupwe lükü ewe Samol mi Lapalap fansoun meinisin, pun Kot ewe Samol mi Lapalap eu achau tori feilfeilachök.” Pwüngün, ikenäi Kot ese mwittir föri manaman an epwe älisi aramas, usun chök met a föri lon fansoun Paipel loom. Iwe nge, pokiten i “achau tori feilfeilachök,” sia tongeni lükülük woon “fansoun meinisin.” Ifa usun ewe Kot sia lükülük woon a älisi nöün kewe chon angang ikenäi? Sipwe nengeni ekkeei ülüngät pworaus ifa usun Kot a apöchökkülakich lupwen sia kütta an älillis ren ach sipwe ü ngeni sossot, pworacho ngeni än aramas koput are tenechepwak me lupwen sia choutiw ren aürek.
Lükülük woon Kot Atun a Toruk Sossot
5. Met epwe wesewesen sotuni ach lükülük woon Jiowa?
5 A mecheres ach sipwe lükülük woon än Jiowa pwon usun Paratis are manausefäl, ekkewe mettoch sia äneänei. Nge a weires ach sipwe lükülük woon an kewe allük usun minne mi pwüng me mwääl me wesewesen lükü pwe ach älleasochisiir epwe emmwen ngenikich pwapwa wachemwuk. Iei än King Salomon fön: “Kopwe lükü ewe Samol mi Lapalap ren unusen lelukom, nge kosap lükülükü püsin om sile. Kopwe chechemeni i won meinisin mine ka föri, nge i epwe aiti ngonuk ewe al mi pwüng.” (SalF. 3:5, 6) Ekkeei kapas lon ei wokisin “mine ka föri” me “al,” ra pwäratä pwe meinisin minne sia föri lon manauach ikenäi itä repwe pwäralo pwe sia lükülük woon Kot, nge sisap chök äpilükülükü an kewe pwon lon mwach. Ifa usun sipwe pwäratä ach lükülük atun sia küna sossot?
6. Ifa usun kopwe tongeni apposa letipom le ti sonuk ekiek mi ngaw?
6 Ach kul seni minne mi ngaw a poputä ren met sia ekieki. (Älleani Rom 8:5; Efisus 2:3.) Iwe nge, ifa usun kopwe tongeni apposa letipom le ti sonuk ekkewe ekiek mi ngaw? Nengeni ekkeei nimu mettoch: 1. Kütta än Jiowa älillis lon iotek. (Mt. 6:9, 13) 2. Ekilonei pworausen chokkewe lon Paipel rese aüseling ngeni Jiowa me iir kewe mi aüseling ngeni me met a fis ngeniir. (1 Kor. 10:8-11) 3. Ekieki ifa usun ewe tipis epwe eriäfföü letipom me ekiekum me pwal chokkewe ka tonger. 4. Ekieki ifa meefien Kot atun emön noun chon angang a tipis watte. (Älleani Kölfel 78:40, 41.) 5. Ekieki pwapwaan letipen Jiowa atun a küna tuppwölün emön nöün le ü ngeni sossot me föri minne mi pwüng, atun a nom lein aramas are le monomonolo. (Kölf. 15:1, 2; SalF. 27:11) Ka tongeni pwal pwäratä pwe ka lükülük woon Jiowa.
Lükülük Woon Jiowa Atun Ka Küna Koput me Tanechepwak
7. Ikkefa ekkewe sossot Jeremaia a küna, iwe, fän ekkoch ifa meefian?
7 Mi lamot likiitü ngeni chommong pwich kewe ra afalafal lon ekkewe leeni mi fokkun weires. Usun ewe soufos Jeremaia a afalafal atun ekkewe ränin le sopwoloon ewe mwuun Juta mi äweires. Iteiten rän a küna sossotun an lükü pokiten an esilefeili än Kot kewe kapwüng. Lon eü atun, pwal mwo ngeni Paruk ewe seketeri mi tuppwöl a pwal mölülü. (Jer. 45:2, 3) Pokiten Jeremaia a lichippüng a fangetä? Pwüngün fän ekkoch a meefi letipechou, iwe a erä: “Epwe anümamau ewe rän üa uputiu lon. . . . Pwota üa towu seni letipen inei, pwe üpwe chök riaföü me letipeta o asopwala ränin manauei fän säw?”—Jer. 20:14, 15, 18.
8, 9. Me ren Jeremaia 17:7, 8 me Kölfel 1:1-3, met mi lamot sipwe föri pwe sipwe ukuwaöch?
8 Nge, Jeremaia ese fangetä. A kan lükülük woon Jiowa. Mwiriloon ei soufos mi tuppwöl a küna pwönüetään alon Jiowa lon Jeremaia 17:7, 8: “A feiöch eman aramas mi lükü ewe Samol mi Lapalap o anomu an apilükülük won. A wewe ngeni efoch irä mi fot unupen eu chanpupu a apwükawu waran ngeni ewe koluk, nge esap niuokus lupwen pwichikar a tori, pun chön kana ra chök arauarau. Esap öürek lon fansoun pwasapwas, pun esap ükütiu le ua.”
9 Jeremaia a usun efoch irä mi arauarau mi “fot unupen eu chanpupu,” are lon ewe atake mi pupu konik ünükün, ‘ese ükütiu le ua.’ Ese mut ngeni chon esiit mi ngaw ar repwe etipetipa i. A chök fitipacheiti ewe Populapen konikin manau Jiowa me lefareni meinisin alon ngeni. (Älleani Kölfel 1:1-3; Jer. 20:9) A ifa me öchün än Jeremaia leenien äppirü fän itach, äkkäeüin ngeni chokkewe mi angang ngeni Kot ikewe ie mi weires! Ika ina usun nonnomum, sopwelo le unusen lükülük woon Jiowa, ewe epwe elikiitük lupwen ka “mwareiti itan” lein aramas.—Ipru 13:15, TF.
10. Ikkefa ekkewe feiöch a nom rech me met sipwe pwisin eisinikich?
10 Jiowa a awora chommong minen älillis ren an epwe älisikich le likiitü lon ekkeei ränin le sopwoloon. Eü me leir, an we Kapas mi unus, me a akkota afföün mi fataffatöch lon sokkopaten fos. A pwal kawor chommong minen älillis seni Paipel lon fansoun fich me ren ewe mwichen chon angang mi alükülük o tipatchem. A pwal awora ewe mwicheichen pwipwi mi apöchökkülakich lon ekkewe mwich me mwichelap. Ka unusen alamota ekkeei minen älillis? Meinisin mi föri ei “repwe köl fän pwapwan letiper.” Iwe nge, iir kewe rese aüseling ngeni Kot repwe ‘kechü fän weires o ngüngüres fän riaföün leluker.’—Ais. 65:13, 14.
Lükülük woon Kot Atun Sia Aürek
11, 12. Ifa ewe alen tipatchem mi enlet lon ei fönüfan mi ur ren osukosuk?
11 A lallapolo osukosuken aramas usun met a fen oesini. (Mt. 24:6-8; Pwar. 12:12) Lupwen a fis noter, aramas ra mwittir sütä woon met chök mi tekia, ren ekkewe chukuchukutä are woon osun ekkewe imw. Pwal ina chök usun, lon ei fönüfan mi lallapolo osukosukan, chommong ra lükülük woon moni, mwuun aramas, lamalam, pekin science me computer pwe ina ar leenien tümün. Nge meinisin rese tongeni wesewesen tümünüür. (Jer. 17:5, 6) Iwe nge, nöün Jiowa chon angang a wor ar leenien op mi nükünüköch, ina i ewe ‘Achau tori feilfeilachök.’ (Ais. 26:4) Ewe sou mak köl a apasa: “[Jiowa] chök a tümwünüei o amanauaei, i a peniei pwe üsap fokun kuf.” (Älleani Kölfel 62:6-9.) Ifa usun sipwe eäni leenien tümün ei Achaw?
12 Sia pache ngeni Jiowa ika sia älleasochisi an we Kapas, nge fän chommong mi ü ngeni tipatchemen aramas. (Kölf. 73:23, 24) Ren chök äwewe, iei ekiekin fönüfan: ‘Äeäöchü unusen manauom pun iei chök atun ke chüen manau.’ ‘Achocho ngeni eü angang mi öch.’ ‘Alapalo nöüm moni.’ ‘Mööni en, mööni ena.’ ‘Kunou fetäl lon sokkopaten fönü.’ Nge iei än Kot öüröür mi tipatchem: “Chokewe mi aea mettochun fanüfan repwe usun itä nge resap aea. Pun lapalapen ei fanüfanen ikenai epwe morola.” (1 Kor. 7:31) Pwal ina chök usun Jises, a öüröürakich ach sipwe akkomwa ach angang ngeni Kot, iwe sia iseis ‘wöüch lon läng,’ ikewe ie resap tongeni talo.—Mt. 6:19, 20.
13. Met sipwe pwisin eisinikich atun sia ekilonei 1 Jon 2:15-17?
13 Om ekiek usun “fanüfan” me “mettochun lon fanüfan” a pwäratä om unusen lükülükü Kot? (1 Jon 2:15-17) Ka fen aücheani woum me ren Jiowa me wisom kewe lon om angang ngeni Kot lap seni met ei fönüfan a mochen kopwe eäni? (Fil. 3:8) Ka achocho pwe ‘mesom epwe fat’? (Mt. 6:22) Pwüngün, Kot ese mochen kopwe tümününgaw ngeni wisom, äkkäeüin ika a wor om famili. (1 Tim. 5:8) Nge a kütta seni nöün kewe aramas ar repwe unusen lükülük woon i, nge esap woon än Setan ei fönüfan epwele morolo.—Ipru 13:5.
14-16. Ifa usun ekkoch ra feiöch ren ar tümünü pwe ‘meser epwe fat’ me akakkomwa ar angang ngeni Jiowa?
14 Nengeni pworausen Richard me Ruth mei wor ülümön nöür kükkün. Richard a erä: “Ua silei pwe ua tongeni alapalo ai angang ngeni Jiowa. Mi kinamwe manauei nge usun ua chök ngeni Jiowa lusun ai tufich. Äm me Ruth aua iotek usun, ekieki nonnomum, iwe aua tipeeüfengen pwe upwe tingorei nei we pos ai upwe le chök angang rüänü rän lon eü wiik, inaamwo ika lon ena atun a wor watteen osukosuken moni lon fönüem. Mwittir chök nei we pos a tipeeü ngeni, iwe ua poputä le angang lon ai we mineföön schedule.” Met meefien Richard iei?
15 A erä “A kükkünülo liwini seni me mwan pun ua chök angang rüanü rän, nge a lapolo ai fansoun le asukula me tümünü ai famili pun a wor rei 50 rän lon eü ier. Ua fen alapalo fän ruu awan ai afalafal, alapalo fän ülüngät chochoon nei chon käeö me alapalo ai fansoun le emmweni ewe mwichefel. Nge pokiten a wattelo ai fansoun le älisi nei kewe, fän ekkoch Ruth a tongeni auxiliary pioneer. Ua tipeppos le akkamwöchü ei schedule ükükün ai tongeni.”
16 Roy me Petina mi wor emön nöür nengngin mi chüen nom rer, ra akükkünalo ar fansoun angang pwe repwe tongeni pioneer full time. Iei alon Roy: “Ua angang ülüngät rän iteiten wiik, nge Petina a angang ruu rän. Pwal eü, aua mwöküt ngeni eü kükkün imw seni imwem akkomw me a mecheres ngenikem le tümünü. Atun ese mwo wor nöüm, aua pioneer, nge tori iei aua chüen mochen pioneer. Iwe, lupwen nöüm kewe ra wattetä aua pioneer sefan. Sise tongeni alöllö ngeni och watteen moni ewe pwapwa aua eäni.”
Mut ngeni “än Kot Kinamwe” epwe Tümünü Letipom
17. Pokiten sise silei met epwe fis ngeni manauach lesor, ifa usun ewe Paipel a aururukich?
17 Sise silei met epwe fis ngeni manauach lesor pokiten a tongeni fis mettoch ren sereseran. (SalAf. 9:11, NW) Iwe nge, ach sise silei met epwe fis esap aosukosuka ekiekich usun met a fis fän chommong ngeni iir kewe esor ar ririöch ngeni Kot. (Mt. 6:34) Aposel Paul a makkeei: “Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou. Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi.”—Fil. 4:6, 7.
18, 19. Ifa usun Kot a aururukich? Äweweei mwo.
18 Ewe kinamwe seni Jiowa a ekinamwei letipen chommong pwiich mi nom fän weires. Iei alon emön pwiich: “Emön tokterin reirei a eniuokkusuei ren an epin ngeniei pwe upwe angei IV chcha. Lupwen a tolong a erä: ‘A ifa me umwesin ei sokkun kefil, an esap angei IV chcha?’ Iwe, lon ekkena atun ua iotek le monomon ngeni Jiowa, iwe, an we kinamwe a nom woi. Ua meefi pöchökkül usun eü achaw. Inaamwo ika ua apwangapwang pokiten nafangawen chai, nge ua ännetaöchü seni Paipel ai lükü.”
19 Fän ekkoch Kot a tongeni aururukich ren älillisin emön pwiich are och pworaus seni Paipel lon fansoun fich. Ese mwääl ka fen rong än emön pwiich apasa: “Iei ewe lesen ua fokkun osupwangan. A fokkun weneitiei!” Pwüngün, ese lifilifil nonnomuch are osupwangach, Jiowa epwe ännetatä an tongekich ika sia lükülük woon. Pun kich nöün ‘siip’ me i a mochen sipwe iteit seni itan we.—Kölf. 100:3; Jon 10:16; Fof. 15:14, 17.
20. Pwata nöün Jiowa chon angang repwe manau fän kinamwe lupwen än Setan ei fönüfan epwe morolo?
20 Lon “ränin än ewe Samol mi Lapalap lingeringer” ewe epwele war, mettoch meinisin än Setan ei fönüfan a lükülük woon repwe talo. Kolt, silifer, me pwal ekkoch mettoch mi aüchea resap tongeni awora tümün. (Sef. 1:18; SalF. 11:4) Ewe chök leenien op, ina ach we ‘Achau tori feilfeilachök.’ (Ais. 26:4) Ina minne, sipwe pwäratä ach unusen lükülükü Jiowa ren ach älleasochisi an kewe allük mi pwüng, ach afalafala an we Mwu inaamwo ika sia küna koput me än aramas tenechepwak, me ach isetä ngeni ach kewe aürek meinisin. Lupwen sia föri ekkeei, sipwe wesewesen ‘manau fän kinamwe, sisap öürek, sisap pwal niueiti och feiengau.’—SalF. 1:33.
En Mi Tongeni Äweweei?
Ifa usun sipwe lükülük woon Kot
• atun a torikich sossot?
• atun sia küna koput me än aramas tanechepwak?
• atun sia aürek?
[Kapas Eis fán Iten ewe Lesen]
[Sasing lon pekin taropwe 15]
Akkamwöchü än Kot emmwen a atoto pwapwa
[Sasing lon pekin taropwe 16]
‘Jiowa eu achau tori feilfeilachök’
