Künaen Chon Tuppwöl Usun Chokkewe Aramas Rese Tongeni Küner

MI WESEWESEN wor chokkewe aramas rese tongeni küner. Ra fokkun tipatchem me pöchökkül, mi wor pwisin iter me napanaper. Ekkoch ra älisikich, nge ekkoch ra mochen efeiengawakich. Iir meinisin ra nennengenikich.

Sise tongeni küna ewe Kot mi enlet. (Jon 4:24) Itan we Jiowa a sokkolo aüchea, iwe, a asokkalo i seni ekkewe kot chofona. Ewe sou makken kölfel a makkeei: “Pun [Jiowa] a tekia. Sipwe alapala ach mwareiti i, sipwe pwal niuokusiti i lap seni ekewe kot meinisin. Pun än chon ekewe mwü kewe kot ra chök uluulun anümwäl. Nge [Jiowa] a föri ekewe läng. Iteüöch me manaman ra nonom mwan, pöchökül me ling ra nonom lon imwan mi pin.”—Kölfel 96:4-6.

Künaen Chon Tuppwöl Usun ewe Kot mi Enlet

Paipel a apasa: “Esap wor eman aramas a küna Kot fän eu.” (Jon 1:18) Sise tongeni weweiti nikinikin me lingan, usun chök än emön mi chun seni le uputiwan esap tongeni weweiti önüwen mettoch. Nge Jiowa a usun chök emön sense mi angöch le äweweei och pworaus mi weires ngeni nöün kewe chon sukul lon fos repwe weweelo ren, pun lon Paipel, a äweweei ekkewe mettoch sise tongeni küna ren ekkewe mettoch sia tongeni küna. Me ren künaen chon tuppwöl loom, Jiowa a älisikich le anchangei läng me weweiti usun ach riri ngeni chokkewe mi nonnom ikena ie.

Äwewe chök, ewe soufos Isikiel a alöllööü lingen Jiowa ngeni ekkei, saram, lingen eföü faü aüchea, me resim. Lon künaen ewe aposel Jon, Jiowa a mot woon an we leenien motun king. Iwe, Jon a erä pwe Kot “a saramaram usun ekewe fau aüchea mi arauarau fetil me par iter jasper.” A pwal erä pwe “pwelin ünükün ewe lenien motun king a wor eu resim mi wewe ngeni anüen eföü fau aüchea itan emeralt.” Ei sokkun äwewe a erenikich ükükün amwararen me mürinnöön Jiowa.—Pwarata 4:2, 3; Isikiel 1:26-28.

Ewe soufos Taniel a pwal küna pwe “ngeröün chon angang ra angang ngeni [Jiowa], nge eu mwichen millionun aramas ra ütä mwan.” (Taniel 7:10) A fokkun amwarar  minne a küna! Sipwe ingemwar ika sipwe küna emön chonläng, nge sotun anchangei mwo amwararen ach küna ngeröün chonläng mi unusöch!

Pworausen ekkewe chonläng, kapachelong ekkewe serafim me keropim, ra mak arapakkan fän 400 lon Paipel. Lon fosun Krik me Ipru ra afföwü ewe kapas “chonläng” ngeni “chon uwei pworaus.” Ekkewe chonläng ra tongeni pwoppworausfengen me ra pwal foffos ngeni aramas me loom. Ekkewe chonläng esap iir aramas mi manau woon fönüfan me loom. Jiowa a fen föriir akkomw me mwen an a föratä aramas.—Hiop 38:4-7.

Lon künaen Taniel, chommongun chonläng ra chufengen pwe repwe küna och mettoch mi amwarar. Iwe mwirin, Taniel a küna emön “a usun chök lapalapen eman nöün aramas” a arap ngeni än Jiowa we leenien motun King pwe epwe angei an “nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni.” (Taniel 7:13, 14) Ewe “nöün aramas” a aüchea seni meinisin, ina i ewe mi manausefäl Jises Kraist, ewe a seikitä pwe epwe nemeni unusen fönüfan. Ekiselo chök mwuun epwe siwili meinisin mwuun aramas me asopwalo semwen, letipeta, nemenemengaw, wöüngaw, pwal mwo nge mälo.—Taniel 2:44.

Chommong chonläng ra pwapwaiti poputään än Jises nemenem pun ra mochen aramas repwe feiöch. Iwe nge, a alolilen pwe ese ina usun meefien ekkewe chonläng meinisin.

 Chon Oput Kot me Aramas

Seni lepoputään uruwoon aramas, emön chonläng a mochen pwe aramas repwe fel ngeni, a ü ngeni Jiowa me wiliti Setan, weween, “chon ü ngeni” lon fosun Ipru. Setan a fokkun ngaw, ina popun, a wesewesen ü ngeni Jiowa, ewe Kot mi tong. Ekkoch chonläng mi ngaw ra pwal fiti Setan le ü ngeni Kot me oput aramas. Lape ngeni ekkewe riäfföü woon fönüfan, usun choweän pwüngüngaw, semwen, wöüngaw, me maun ra fis pokiten etipetipaer.

Inaamwo ika chommong lamalam rese chüen foffosun Setan, nge ewe puken Jop a apworausa föfförün me napanapen ena chonläng mi appölüwa Kot. A apasa: “Iwe, a tori eu rän, lupwen ekewe chon läng ra feito o ütä fän mesen ewe Samol mi Lapalap, Satan a pwal nonom lefiler.” Lon än Setan me Kot pworausfengen, Setan a mwakenetä pwe Jop a angang ngeni Kot pokiten chök än Kot efeiöchü. Setan a sotun ännetatä ena pworaus ren an atoto watteen riäfföü woon Jop, a nielo nöün kewe man me nöün kewe engol. Mwirin ena, a esemweni Jop ren an a mmach unusen inisin. Meinisin än Setan kana sossot rese akkufu Jop.—Hiop 1:6-19; 2:7.

Mi wor popun än Jiowa ese nielo Setan seni chök me loom, nge esap weween pwe esap nielo. Ekiselo chök, ewe Tefil epwele ninniilo. Minne a fen äwewetiw lon ewe puken Pwäratä a pwäri met a fis lon läng, ikewe ie itä ürürün sise tongeni küna. Sia älleani: “A fis maun lon läng. Mikael [Jises Kraist ewe a manausefäl] me nöün kewe chon läng ra fiu ngeni ewe trakon [Setan], nge ewe trakon me nöün kewe chon läng ra pwal fiu ngeniir. Iwe, ewe trakon a kuf, nge i me nöün kewe chon läng resap chüen mwümwütä ar repwe nonom lon läng. Ewe trakon mi watte a koturuwu lükün, ewe serepenitin lom mi iteni Tefil are Satan, a atupu unusen chon fanüfan. A koturutiu won fanüfan, i me nöün kewe chon läng.”—Pwarata 12:7-9.

Nengeni ena wokisin a erä pwe Setan a “atupu unusen chon fanüfan” ren an achöüfetälei än ekkewe lamalam afalafal chofona pwe epwe okullur seni Jiowa me an we Kapas. Eü me lein ekkena chofona a erä pwe atun aramas meinisin ra mälo, a towu seniir och ngün ese tongeni mälo. Chommong sokkopaten afalafal ra pop seni ena ekiek. Äwewe chök, lon Afrika me Eisia, chommong ra lükü pwe atun mälo, a wor ngünün aramas ra feilo ikewe ar kewe lewo ra nonnom ie. Ekkewe afalafalen purkatorio me ekkein ell ra pwal longolong woon ewe ekiek pwe mwirin mälo, a wor ngünün aramas mi chüen manau.

Itä Aramas Ra Feitä Läng Mwirin Ar Mälo?

Mi pwüng än aramas lükü pwe meinisin mi öch repwe feitä läng? Iwe, ekkoch aramas mi mürinnö repwe feitä läng, nge ra chokükkün seni ekkewe fite billion ra fen mälo. Ewe Paipel a pwäri pwe 144,000 aramas repwe “kamoto seni fonufan,” pwe repwe wisen “samol-fel” me “samoluni fonufan.” (Pwarata 5:9, 10; 14:1, 3, TF) Repwe eti Jises Kraist, ewe Nöün Aramas, le nemenem lon än Kot we mwu lon läng. Ena mwu epwe asopwalo Setan me nöün kewe chonläng mi ngaw me ewili fönüfan ngeni eü paratis. Lape ngeni chokkewe mi fen mälo repwe manausefäl me äpilükülükün manau tori feilfeilo chök lon ena Paratis woon fönüfan.—Luk 23:43.

Iwe, sia fen käeö pwe a wor chommong chokkewe sise tongeni küner. Jiowa Kot, ewe mi tekia seniir meinisin, i ewe Chon Föratä mönümanau meinisin. Fitu million chonläng ra angang ngeni fän tuppwöl. Nge pwal ekkoch chonläng ra eti Setan le ü ngeni Jiowa me otupu aramas. Pwal eü, ekkoch aramas mi aükük chochoor ra “kamoto” are kefilitä seni fönüfan pwe repwe wiseni wis mi aüchea lon läng. Ekieki ekkena pworaus atun sipwele käeö ika iön leir sipwe tongeni fos ngeni, me ifa usun.