“ION ese sinei tong, ese sinei God, pun God mi tong,” iei met Paipel a apasa. (1 Jon 4:8, Ewe Kapasen God) Lamalam mi mürinnö, a apöchökkülatä ewe tongen pwipwi.

Chommong lamalam ra föri föfför mürinnö ngeni ekkewe mi semwen, ekkewe mi chinnap me ekkewe mi osupwang. Ra apöchökküla chon fiti ar lamalam ar repwe apwönüetä än ewe aposel Jon kapasen fön. Iei met a makkeei: “Ika emon aramas mi pisekisek a kuna pwe pwiin we mi osupwang, nge ese mochen anisi, iwe epwe ifa usun an epwe tongeni apasa pwe a tongei God? Ami nei kana! Ach tong esap ren kapas chok. Ach tong epwe ennet o  epwe pwapwano non ach föfför.”​—1 Jon 3:17, 18, KG.

Met a fis fansoun ekkewe mwuun fönüfan ra maunfengen? Nge än Kot we allük usun om “kopwe echeni chon arum usun chök püsin om echenuk” epwe chök pwönüetä lon fansoun kinamwe? Nge ifa usun lupwen ekkewe mwu ra maunfengen, repwe tunalo ena allük?​—Mattu 22:39, Paipel are Testamentin Lom me Testament Söfö.

Jises a apasa: “Epwe iei usun pwe aramas meinisin repwe sinei pwe ami nei chon kaeo, are mi wor ewe tong lefilemi.” (Jon 13:35, Testament Mi Fö Pwal Kol Fel) Lupwen kopwe pölüweni ekkeei kapas eis, kopwe pwisin eisinuk, ‘Ekkewe ra fiti ei lamalam ra pwäratä tong ngeni aramas fansoun meinisin esap ren kapas chök nge pwal ren ar föfför?’

ITELAP: Maun.

MET EWE PAIPEL A WESEWESEN APASA: Jises a allükü ngeni nöün kewe chon käeö: “Nge ngang üpwe üreni kemi pwe öupwe tongei ekkena chon opwut ami, . . . öüpwe föför mwirinnö ngeni chokana mi opwut ämi.”​—Mattu 5:44, Paipel: Än Kot Kapas Testament Söfö.

Lupwen ekkewe sounfiu ra feito pwe repwe aresini Jises, ewe aposel Piter a weitawu nöün we ketilas pwe epwe eppetiir seni ar turufi Jises. Nge Jises a apasa: “Kopwe isenong noum na ketinas non neenian, pun ir meinisin mi nounou ketinas repwe mano ren ketinas.”​—Mattu 26:52, KG.

Ewe aposel Jon a makkeei: “Iei fatöchün sokofesenin lefilen nöün Kot me nöün Tefil: Eman esap föri mine a pwüng, ika esap echeni pwiin we, i esap nöün Kot. Iei ewe pworaus oua rongorong seni lepopun: Sipwe echenifengenikich lefilach. Sisap wewe ngeni Kain, i nöün Ewe mi Ngau, a püsin niela pwiin we Epel.”​—1 Jon 3:10-12, PT.

KAPAS EIS: Ei lamalam a kan apöchökküla ngeni nöün kewe aramas ar repwe fiti maun?

ITELAP: Mwökütükütün Mwuun Fönüfan.

MET EWE PAIPEL A WESEWESEN APASA: Lupwen ekkewe aramas ra küna än Jises tufichin föri ekkewe manaman, ekkoch ra mochen seikatä pwe epwe wiliti nöür sou nemenem. Nge iei met a föri: “Jesus a silei pwe ra ekiekin feito o seikätä fän pöchökül pwe epwe ar king, iei mine a sü seniir o liwinsefälitä won ewe chuk.”​—Jon 6:15, PT.

Fansoun än Jises ares aramas ra tipimwääl ngeni pwe i chon efisatä osukosuk lefilen mwu me aramas. Nge Jises a pölüweni: “Muui we esap seni ei fonufan. Are muui seni fonufan, iwe, nei kewe chon angang repwe fiu, pwe emon esap afangemaei ngeni re Jus. Nge iei, muui esap seni fonufan.”​—Jon 18:36, TF.

Iei alon Jises lupwen a iotek ngeni Kot usun nöün kewe chon käeö: “Ngang üwa fen ngeniir om kapas, iwe, fönüfan a opwut iir pokiten iir resap peekini fönüfan usun chök Ngang üsap pwal peekini fönüfan.”​—Jon 17:14, PK.

 KAPAS EIS: Ei lamalam a kan äppirü än Jises leenien äppirü, me ti seni ar repwe fiti mwökütükütün mwuun fönüfan inaamwo ika repwe küna koput me ren ekkewe sou nemenem?

ITELAP: Lifilifil are aapap.

MET EWE PAIPEL A WESEWESEN APASA: Mwirin än ekkewe äkkäeüin aramas esap ir chon Jus ra wiliti chon Kraist, ewe aposel Piter a apasa: “Enlet, ua koran wewe pwe Kot ese lifilifil aramas, nge lon ekkewe mu meinisin, eka e niuokusiti i o fori minne mi pung, iwe, Kot epwe etiwa i.”​—Fofor 10:34, 35, TF.

Iei alon Jemes ngeni chienan kewe chon Kraist: “Ami pwii kana, ami chon nuku ach Samol Jesus Christ, ewe Samolun ning, ousap nifinifin aramas pokiten chok ren napanaper. Epwe ifa usun ika emon aramas mi pisekisek mi nounou ring mi gold pwan ufouf mangaku mi chif a feito fiti ami mwich o pwan emon aramas mi woungaw mi ufouf mangaku mi ngaw a pwan feito fiti ami mwich? Ika oupwe suföniti ewe aramas mi ufouf mi chif o apasa ngeni, ‘Kose mochen mottiw won ei neenien mot mi murinno ikei?’ nge oupwe apasa ngeni ewe aramas mi woungaw, ‘Kopwe chok uta are mottiw ikei unukun pechei,’ iwe, oua tipisin nifinifin aramas o oua anongonong ami apungu emon won ekkewe ekiek mi ngaw.”​—Jemes 2:1-4, KG.

KAPAS EIS: Ei lamalam a kan asukula chon an we mwichefel pwe Kot ese lifilifil aramas me resap lifilifil ngeni emön pokiten an newo are nonnomun manauan?

[Ekis Pworous lon pekin taropwe 7]

Menni lamalam a kan asukula ekkewe chon fiti ar repwe pwäkini ekkewe mettoch mi äimufeseni aramas pokiten mwökütükütün nemenemen mwuun fönüfan, sokkofesenin ar newo me nonnomun manauer?