“Inaamwo ika emön chök sou sakau lon ewe famili nge unusen ewe famili ra meefi riäfföü fän nemenien sakau.”​−Dr. Vernon E. Johnson.

ALICE, nimu ierin, a kokkoon woon pet nge pechen a weiwei ren metek. Ruu rän mwan a simen efoch pechen pokiten a feiengaü. Nge ewe simen ra pachetä woon a kon ffor, iwe pechen we a ngütutä. Alice a tingorei inan kewe me seman ar repwe uwalo ren tokter nge seman na mi chüen chök mwirimwirin sakau. Inan we a osukosuk pwe ese fen chüen silei ika iö leir a kon lamot ngeni älillis.

Lon ekkoch rän, pechen Alice a ünüün. Lupwen noot a surutiu seni autün pechen, seman me inan ra kerän atapwala le uwei ngeni pioing. Iwe, chon pioing ra etti simenin pechen we, nge emön lein ekkewe kangof a pelo lupwen a küna pechen pun a fen motukotukolo. Iwe, ra tunuolo.

Unusen ewe Famili A Weires Fän Nemenien Sakau

Esap chök ina met mi alolilen ren an tüttünülo pechen Alice. Nge a kon alolilen pwe seman we emön sou sakau, esap tongeni tümünü Alice me apöchökküla letipan, nge Alice a fokkun osupwang ren an älillis. Emön sou-fön Toby Rice Drews a erä: “Emön sou sakau mi nom fän nemenien sakau epwe akukumwiri an famili nge fen akkomwa an epwe küna ewe sakau.”

Nge ifa ussun inen Alice? Manauan a fen longolong woon pwülüwan we sou sakau. Lap ngeni fansoun meinisin, an angang epwe chök ekkekieki ifa ussun epwe aükalo än pwülüwan we ükkün sakau are ifa ussun epwe likiitü fän wiliwilikkisin pwülüwan we. Än ewe sou sakau osukosuk a unusen nemenalo än pwülüwan we ekiek, iwe ese chüen tongeni älisi chon an famili. Ren ei popun, aramas ussun chök inen Alice ussun itä ra pwal nom fän nemenien ewe sakau.

Ewe sou sakau me pwülüwan we rese mirititi me rese wesewesen lükü pwe sakau a fen nemeniir. Iir me rüüemön ra fokkun osukosuk rese tufichin älisi nöür kewe. Ussun itä repwele koketiu pwe manauer a chök ur ren lichippüng pun ewe sou sakau ese tongeni nemeni ünüman sakau, nge ewe fefin ese pwal tongeni nemeni än pwülüwan we ükkün sakau. Iwe, iir me rüüemön rese tongeni akaüloi efeiengaüen nemenien sakau woon nöür kewe.

Nge a kawor älillis fän iten ewe sou sakau me an we famili. Sipwe nengeni ei mettoch lon ewe lesen mwirin. a

[Footnote]