LON ewe säingoon pwinin manauen Jises woon fönüfan, Jises a ereni nöün kewe aposel mi tuppwöl: “Iei üpwe ngenikemi eu allük mi fö: Oupwe echenifengenikemi lefilemi. Usun ngang üa echenikemi, iei usun pwal ämi oupwe echenifengenikemi. Are oupwe echenifengenikemi, aramas meinisin repwe silei, pwe ämi nei chon kaiö.” (Jon 13:34, 35) Pwüngün pwe chon Kraist meinisin repwe tongfengen lefiler.

Ewe aposel Paul a äkkäeüin mak ngeni ekkewe mwän mi pwüpwülü: “Ämi mwän kana oupwe echeni pwülüemi usun Kraist a echeni mwichefel o fangala manauan fän itan.” (Ef. 5:25) Ifa ussun emön mwän Chon Kraist mi pwüpwülü epwe apwönüetä ei fön, äkkäeüin ika pwülüwan we emön chon angang ngeni Jiowa?

Kraist a Echeni ewe Mwichefel

“Ina usun ekewe mwän repwe echeni pwülüer usun chök ar püsin echeni inisiir. Eman mwän mi echeni pwülüan a echeni püsin i. Esap fokun wor eman a oput püsin inisin, nge a fokun amongöni o tümwünü usun chök met Kraist a föri ngeni mwichefel.” (Ef. 5:28, 29) Jises a kon tongei me echeni nöün kewe chon künö. Inaamwo ika rese unusöch, a tipepwetete me kirekiröch ngeniir. Pokiten a mochen epwe “aütai [ewe] mwichefel fän püsin itan lon unusen lingöchün,” a nengeni met chök napanap mi öch ren nöün kewe chon künö.​—Ef. 5:27.

Ussun Kraist a pwäratä an tong fän iten ewe mwichefel, mi lamot ewe mwän mi pwüpwülü epwe pwal pwäratä an tong ngeni pwülüwan we lon an kapas me föfför. Ika fansoun meinisin ewe mwän epwe pwäratä pwe a tongei pwülüwan, iwe ewe fefin epwe pwapwa me epwe meefi pwe i mi aüchea. Inaamwo ika ewe fefin a kinamwe ren chommong pisekin me imwan a öch, a tongeni chüen meefi letipechou ika pwülüwan we esap eteneki me äfänni.

Ifa ussun ewe mwän mi pwüpwülü epwe pwäratä pwe a aücheani pwülüwan we? Lein aramas ewe mwän epwe pwäratä süföl lupwen a apworausa ngeniir ussun pwülüwan we me pwal apünga älillisöchün lon famili. Ika ewe fefin a föri och mettoch epwe fokkun efisöchü kokkotun ewe famili, mwittir chök ewe mwän epwe apworausa ngeni ekkoch aramas. Ika ra chök iir, ewe fefin epwe fokkun meefi pwe pwülüwan we a tongei, ren chök än ewe mwän attapa pöün, emelimel ngeni, foropachei me pwäratä ngeni an kilisou me mwareiti. Ekkeei mettoch ra ussun itä lamot kisikis nge ra fokkun apwapwaai letipen ewe fefin.

“Esap Säwäsini an Aita Ngeniir Pwiin”

Jises Kraist esap “säwäsini an aita ngeniir pwiin [chon tapwelo mwirin mi kepit].” (Ipru 2:11, 12, 17) Ika en emön mwän mi pwüpwülü, chechemeni pwe pwülüwom we pwal i fefinom lon Kraist. Än we pwon le angang ngeni Jiowa epwe akkomw mwen an pwonen pwüpwülü, ese lifilifil ika i a fen papatais me mwen are mwirin ämi pwüpwülü. Lupwen pwülüwan ewe brother mi emmweni ewe mwich epwe uwawu meefian, a fich epwe kör ngeni “Sister ____ (iten pwülüwom).” Pwülüwom we, pwal i fefinom lon Kraist esap chök lon ewe Kingdom Hall nge pwal lon imwemi. A pwal lamot om kopwe kirekiröch me pwäratä süföl ngeni lon imwemi ussun chök föfförum ngeni lon ewe Kingdom Hall.

Fän ekkoch epwe weires om kopwe itepök me rüüepek ika a wor wisom lon ewe mwichefel pwal ngeni om famili. Ika oupwe angangfengen me ekkewe elter me ministerial servant me äiti  ngeniir ekkoch angang repwe tongeni föri, iwe epwe tongeni ppän om angang, epwe wor fansoun ngeni pwülüwom, ewe a kon aücheani om kopwe nom ren iteitan fansoun. Chechemeni pwe mi wor pwal ekkoch brother mi tongeni eäni om angang lon ewe mwichefel, nge en chök ewe brother ka tongeni föri ewe angang fän iten pwülüwom, ewe emön oua ririfengen lon pwüpwülü.

Pwal och, en möküren pwülüwom. Ewe Paipel a apasa: “Kraist möküren mwän meinisin, nge mwän möküren fefin.” (1 Kor. 11:3) Ifa ussun kopwe apwönüetä wisom ussun möküren ewe famili? Ren om kopwe pwäratä tong, nge esap ren om ekkepini ena wokisin lon Paipel me aumwesi pwülüwom pwe epwe süfölituk. Iei ewe kii ren om kopwe apwönüetäöchü wisom, kopwe äppirü Jises lon napanapen om föfför ngeni pwülüwom.​—1 Pit. 2:21.

“Ämi Chiechiei Kana”

Jises a kör ngeni nöün kewe chon künö pwe chiechian. A ereniir: “Üsap chüen aita ngenikemi nei chon angang, pun eman chon angang esap silei mine an samol a föri. Nge üa aita ngenikemi chiechiei, pun üa asile ngenikemi meinisin mine üa rongorong me ren Semei.” (Jon 15:14, 15) A mmen mürinnö än Jises me nöün kewe chon käeö pworausfengen pun mi chök sussuuk. Ra pwal förfengeni mettoch. “Jesus me nöün kewe chon kaiö” ra ketiü lon ewe apwüpwülü lon Kana. (Jon 2:2) Ra sani ekkoch leeni ussun chök ewe tänipi lon Ketsemane. Ewe Paipel a erä pwe “Jesus me nöün kewe chon kaiö ra soun chufengen ikenan.”​—Jon 18:2.

Mi lamot ngeni ewe fin pwüpwülü an epwe meefi pwe i chiechian pwülüwan we mi fokkun ächengicheng ngeni. Iei ewe mettoch mi lamot pwe ekkewe pean pwüpwülü repwe pwapwafengen le föri mettoch meinisin. Oupwe angangfengen fän iten Jiowa! Oupwe pwapwaiti ämi käeöfengen ewe Paipel, kukkunoufengen, akkaasoosfengen me mömmöngöfengen. Esap chök ämi eü pean pwüpwülü nge oupwe chiechiöchfengen lefilemi fansoun meinisin.

A “Echeniir Tori Sopolan Manauan”

Jises “a echeniir [nöün kewe chon käeö] tori sopolan manauan.” (Jon 13:1) Ekkoch mwän mi pwüpwülü rese äppirü Kraist. Eli, ra pwal mwo nge pöütalo ‘pwülüwer kewe, lupwen ra alüwöl’ fän iten pwal emön föpwül.​—Mal. 2:14, 15.

Nge ekkoch ra äppirü Kraist ussun chök emön mwän itan Willi. Pwülüwan we, a apwangapwangalo nge ren fite fite ier mi lamot än emön epwe tümünü iteiten fansoun. Met meefien Willi ussun wisan we? A apasa: “Ua fokkun echeni pwülüwei we, i liffangei me ren Kot. Pwal och, 60 ier loom ua pwon ngeni ai upwe tümünü i lon fansoun kinamwe me fansoun weires. Use fokkun mönükalo ena pwon.”

Ämi kana mwän chon Kraist mi pwüpwülü, äppirü än Jises tong. Aücheani pwülüwom mi niuokkusiti Kot, i pwal fefinom lon Kraist me chiechiom.

[Sasing lon pekin taropwe 20]

Pwülüwom we ina i chienom mi kon aüchea seni meinisin?

[Sasing lon pekin taropwe 20]

‘Kopwe echeni pwülüwom’