En Mi Pwapwaiti “Ewe Allukun Jiowa”?

“Pwapwa ewe mwan . . . a pwapwaiti ewe allukun Jiowa.”​—KÖLFEL 1:1, 2, New World Translation.

1. Met popun sia pwapwa lupwen kich noun Jiowa chon angang?

 JIOWA a alisikich me efeiochukich pokiten kich noun kewe chon angang mi tuppwol. Pwungun pwe sia kuna chommong sossot. Iwe nge, a pwal nonnom rech pwapwa mi enlet. Sise mairu ren ena pokiten sia angang ngeni “ewe Kot mi pwapwa,” me an we ngun mi fel a efisata chengel lon letipach. (1 Timoti 1:11, NW; Kalesia 5:22) Chengel a wewe ngeni pwapwa mi enlet a fisita pokiten an emon apilukuluk ngeni are ekiekin angei mettoch mi murinno. Pwungun pwe Semach lon lang a ngenikich chommong liffang mi murinno. (Jemes 1:17) Sisap pwal mairu pwe sia pwapwa!

2. Menni kol mi fel sipwe kaeo ussun?

² Ewe puken Kol Fel a menlapei pwapwa, ussun chok sia kuna lon Kol Fel 1 me 2. Noun Jises Kraist kewe chon kaeo ra luku pwe King Tafit lon Israel a makkei ewe oruuen kol mi fel. (Fofor 4:25, 26) Ewe emon mi makkei ewe aewin kol mi fel nge sise silei itan a poputaani an we kol seni Kot ren ekkeei kapas: “Pwapwa ewe mwan ese fetal lon pwungupwungun aramas mi ngau.” (Kol Fel 1:1, NW) Lon ei lesen me lon ewe lesen mwirin ei, sipwe ppii ifa ussun Kol Fel 1 me 2 a ngenikich popun ach sipwe pwapwa.

Ewe Ki Ngeni Pwapwa

3. Me ren Kol Fel 1:1, ikkefa ekkoch popun emon a alleasochisi allukun Kot a pwapwa?

³ Kol Fel 1 a aiti ngenikich ewe popun emon mi alleasochisi ekkewe allukun Kot a pwapwa. Ewe sou mak kol mi fel a apasa ekkewe popun a pwapwa lupwen a koluwu: “Pwapwa ewe mwan ese fetal lon pwungupwungun aramas mi ngau, me ese uta lon alen aramas mi tipis, are mommot won leenien motun aramas mi turunufas.”​—Kol Fel 1:1, NW.

4. Met sokkun manau mi murinno Sekaraia me Elisapet ra manaueni?

⁴ Pwe sipwe enletin pwapwa, a lamot ach sipwe alleasochisi allukun Jiowa kewe mi pwung. Sekaraia me Elisapet, semen me inen Jon Papatais, “ir me ruemon mi pung mwen mesen Kot; ra fefetal lon ekkewe alluk meinisin, o pwal lon pungun ewe Samol, o rese mo mwalilo.” (Luk 1:5, 6) Sipwe tongeni pwapwa ika sia appiruur me ika sise “fetal lon pungupungun aramas mi ngau” are auseling ngeni ar kewe emmwen mi ngau.

5. Met epwe tongeni alisikich le su seni “alen aramas mi tipis”?

⁵ Ika sia u ngeni ekiekin ekkewe mi ngau, sisap “uta lon alen aramas mi tipis.” Ren enletin, sisap feilo ia ra kan nonnom ie​—lon ekkewe leenien kulou mi ngau are ekkewe leeni mi itengau pokiten ar kewe foffor mi sikepwach. Nge epwe ifa ussun ika sia mochen fiti aramas mi tipis lon ar fofforingau mi u ngeni ewe Paipel? Iwe, sipwe tingor an Kot alillis fan iten ach sipwe alleasochisi alon Paul: “Ousap iokfengen  me ekkewe aramas mi lukulukumang. Pun meeta pung o mwal repwe tongeni angangfengen won? Are meeta saram epwe tongeni chiechi ngeni rochopwak?” (2 Korint 6:14) Ika sia eani lukuluk won Kot me a ‘limelimoch letipach,’ sipwe u ngeni ekiekin me lapalapen manauen aramas mi tipis me ach minen mwokutukut me mochenich repwe limelimoch, me epwe wor “ach luku mi enlet.”​—Mattu 5:8; 1 Timoti 1:5.

6. Met popun sipwe tumunukich seni ekkewe aramas mi turunufas?

⁶ Ren ach sipwe apwapwai Jiowa, a lamot ach sisap “momot won leenien motun aramas mi turunufas.” Ekkoch ra turunufasei aramas mi alleasochisi allukun Kot, nge lon ekkeei “ran le sopolon,” fan chommong a fokkun watte ewe esiit seni ekkewe chon Kraist mi rikilo. Ewe aposel Piter a ouroura chienan kewe chon luku: “Mi achengicheng kena, . . . Aeuin seni meinisin, oupwe fakkun wewe ren ei mettoch, pwe lon ekkewe ranin le sopolon chon esiit repwe feito ren ar esiit, repwe tapwelo mwirin pwisin ar mochenia ingau, o repwe apasa, ‘Ia pwonen an epwe feito? Pun seni chok fansoun semach kewe ra mourelo, mettoch meinisin ra usun we chok seni popun lom.’” (2 Piter 3:1-4) Ika sise “momot lon leenien motun aramas mi turunufas,” sipwe ti senikich ewe feiengau epwe toriir.​—An Salomon Fos 1:22-27.

7. Met popun sipwe lefareni ekkewe kapas lon Kol Fel 1:1?

⁷ Ika sise lefareni ekkewe kapasen akkom lon Kol Fel 1, epwe tongeni pout senikich ewe pochokkul lon pekin ngun sia fen angei seni ach kaeo Paipel. Ren enletin, manauach epwe tongeni ngangngauolo. Epwe tongeni poputa ika sia auseling ngeni ekkewe emmwen seni aramas mi ngau. Mwirin eli sipwe chiechi ngeniir iteitan. Lo, lo, lo, eli sipwe pwal wiliiti chon rikilo mi lukulukummang me turunufas. A ffat pwe chiechi ngeni ekkewe aramas mi ngau epwe tongeni efisata ach lapalapeni lapalap mi ngau me epwe tongeni ataielo ach chiechi me Jiowa Kot. (1 Korint 15:33; Jemes 4:4) Amwo sisap mut ngeni ena an epwe fis ngenikich!

8. Met epwe alisikich le anefota ekkewe mettoch lon pekin ngun?

⁸ Iotek epwe alisikich le anefota ekkewe mettochun ngun me tumunukich seni chiechi ngeni aramas mi ngau. Paul a makkei: “Ousap aurek ren och mettoch, pwe ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou. Iwe, an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek lon Kraist Jises.” Ewe aposel a peseikich  ach sipwe ekieki ussun minne mi enlet, mosonoson, pwung, limelimoch, tipemecheres, iteuoch, murinno, are ekkewe mi och mi fich ngeni ach sipwe mwareiti. (Filipai 4:6-8) Sipwe atipeeufengenni ach kewe foffor ren an Paul we emmwen me sisap fiti ekkewe aramas mi ngau.

9. Inaamwo ika sia su seni ekkewe foffor mi ngau nge, ifa ussun sia sotun alisi sokkun aramas meinisin?

⁹ Inaamwo ika sia tunalo fofforingau, sia kapas pwotete lupwen sia afalafala aramas, ussun chok ewe aposel Paul a fori lupwen a fos ngeni ewe Kepinan Rom itan Feliks “usun minne mi pung, me ononoto, pwal usun ewe apung epwe feito.” (Fofor 24:24, 25; Kolose 4:6) Sia afalafala ewe kapas allim ussun ewe Muu ngeni sokkun aramas meinisin, me sia kirokiroch ngeniir. Sia eani lukuluk pwe “ir meinisin mi fil ngeni manau esemuch” repwe wiliiti chon luku me pwapwaiti allukun Kot.​—Fofor 13:48.

A Pwapwaiti Ewe Allukun Jiowa

10. Lupwen sia pwisin kaeo, ifa ussun met sia kaeo epwe fotolong lon ekiekich me letipach?

¹⁰ Ewe sou mak kol mi fel a pwal apasa ussun ewe mwan mi pwapwa: “A fakkun pwapwaiti allukun ewe SAMOL, o a fakkun ekieki usun an we alluk [a alleaani an we alluk ren mongunungun, NW], le ran me lepwin.” (Kol Fel 1:2) Pokiten kich noun Kot kewe chon angang, sia ‘pwapwaiti allukun Jiowa.’ Lupwen sia tufichin fori, atun fansoun sia pwisin kaeo me ekkekieki met sia kaeo, eli sipwe alleaani ewe lesen ren mongunungun. Ach fori ena lupwen sia alleaani ese lifilifil menni kinikinin ewe Paipel epwe alisata ach amwochu ewe poraus lon ekiekich me letipach.

11. Met popun sipwe alleaani ewe Paipel “le ran me lepwin”?

¹¹ “Ewe chon angang mi tuppwel o tipatchem” a fen peseikich le alleaani ewe Paipel iteiten ran. (Mattu 24:45) Pokiten sia fokkun mochen silei an Jiowa poraus fan iten aramas, a lamot ach sipwe alleaani ewe Paipel “le ran me lepwin”​—ewer, pwal mwo nge lupwen sise tongeni onnut pokiten och popun. Piter a peseikich: “Usun chok monukol mi a koran uputiu, oupwe fakkun mochen ewe chonun oup mi enlet o mi fich ngeni ngunumi, pwe oupwe mammarita ren ngeni manau.” (1 Piter 2:1, 2) Ka pwapwaiti om alleaani ewe Paipel iteiten ran me ekkekieki an Kot Kapas me an kewe kokkot le pwin? Ewe sou mak kol mi fel a saani an fori ena mettoch.​—Kol Fel 63:6.

12. Met sipwe fori ika sia pwapwaiti ewe allukun Jiowa?

¹² Ach pwapwa esemuch a alongolong won ach pwapwaiti an Kot alluk. An we alluk mi unusoch me pwung, me liwinich mi watte ika sia alleasochisi. (Kol Fel 19:7-11) Ewe chon kaeo Jemes a makkei: “Nge emon epwe nennengeni ewe alluk mi unusoch, ewe allukun ngaselo, o epwe likiitu; pun esap i emon chon rong chok mi epwe monukalo, nge emon chon achocho le apwonueta. Iwe, ei sokkun aramas epwe feioch ren an kewe fofor.” (Jemes 1:25) Ika sia wesewesen pwapwaiti allukun Jiowa, sipwe achocho le pwungupwung won ekkewe mettochun ngun iteiten ran. Pwungun pwe epwe amwokutukich le kukkutta ‘ekkewe le olololun Kot’ me akkomwa Muun Kot lon manauach.​—1 Korint 2:10-13; Mattu 6:33.

 Atewe A Wewe Ngeni Efoch Ira

13-15. Ifa ussun sipwe ussun chok efoch ira mi fotutiu unukkun eu chanpupu?

¹³ Ewe sou mak kol mi fel a pwal apasa ussun ewe emon mi pwung: “Atewe a wewe ngeni efoch ira mi fotutiu unukkun chanpupu, mi uwa lon an fansoun ras, nge chon esap pwaselo. Iwe, mettoch meinisin minne a fori epwe sapoch.” (Kol Fel 1:3) Ussun chok aramas meinisin rese unusoch, oukich mi angang ngeni Jiowa a torikich osukosuk lon manauach. (Hiop 14:1) Eli epwe torikich riaffou mwaal me sokkopaten sossot ngeni ach luku. (Mattu 5:10-12) Iwe nge, ren an Kot alillis, sia tongeni likiitu fan ekkeei sossot, ussun chok efoch ira mi pochokkul epwe chuen uta lupwen a wor molumol.

¹⁴ Efoch ira mi fotutiu unukkun eu chanpupu esap pwaselo lupwen a pwichikkar are pwas. Ika sia niueiti Kot, ach pochokkul a feito seni eu Popun esap alichipwungukich​—Jiowa Kot. Paul a kutta alillis seni Kot me a tongeni apasa: “Ngang mi tufich ren mettoch meinisin lon ewe emon [Jiowa] mi apochokkulaei.” (Filipai 4:13) Lupwen Jiowa a emmweni me appochokkula kich ren an ngun mi fel, sisap apwangapwangelo, pwaselo are malo lon pekin ngun. Sia uwaoch lon an Kot angang me sia pwaralo uwan ngunun we.​—Jeremaia 17:7, 8; Kalesia 5:22, 23.

¹⁵ Lupwen ewe sou mak kol mi fel a nounou ekkewe kapas “a wewe ngeni” lon fosun Ipru, a alollofengenni ruu mettoch mi sokkofesen nge mi lollo chok lapalaper. Aramas me ekkewe ira mi sokkofesen nge, pochokkulen efoch ira mi fottutiu unukkun konik a achema ngeni ewe sou mak kol mi fel ussun pochokkulen chokkewe “mi pwapwaiti allukun Jiowa” lon pekin ngun. Ika sia pwapwaiti allukun Kot, sipwe tongeni manauattam ussun chok efoch ira. Ren enletin, sia tongeni manau esemuch.​—Jon 17:3.

16. Met popun me ifa ussun pwe ‘mettoch meinisin minne sia fori epwe sapoch’?

¹⁶ Lupwen sia feffetal lon ewe alen pwung, Jiowa a alisikich le likiitu fan ekkewe sossot me osukosuk. Sia pwapwa me uwaoch lon an Kot angang. (Mattu 13:23; Luk 8:15) ‘Mettoch meinisin sia fori a sopwoch’ pokiten sia akkomwa ach fori letipen Jiowa. Pokiten an kewe kokkot ra sopwoch fansoun meinisin me sia pwapwaiti an kewe alluk, sia feffeita lon pekin ngun. (Keneses 39:23; Josua 1:7, 8; Aisea 55:11) Mei pwung ena pwal mwo nge lupwen a torikich sossot.​—Kol Fel 112:1-3; 3 Jon 2.

A Ussun Ita Pwe Ekkewe Mi Ingau Ra Wouochulo

17, 18. (a) Ewe sou mak kol mi fel a alollo ekkewe mi ngau ngeni met? (b) Inaamwo ika ekkewe mi ngau ra wouochulo nge, met popun esap alisiir tori feilfeilo?

¹⁷ A ifa me sokkofesennin manauen ekkewe aramas mi ngau me ekkewe mi pwung! A ussun ita pwe ekkewe mi ngau ra wouochulo ren ekis fansoun, nge rese feffeita lon pekin ngun. Pwungun ena a pwalo seni alon ewe sou mak kol mi fel: “Ekkewe aramas mi ingau resap iei usun; pun ra wewe ngeni falangen pwul asapwal a kupetalo. Iei minne, ekkewe aramas mi ingau resap uoch lon mwichen ekkewe mi pung.” (Kol Fel 1:4, 5) Nengeni pwe ewe sou mak kol mi fel a apasa, “ekkewe aramas mi ingau resap iei usun.” Weween pwe rese ussun chok ekkewe aramas mi alleasochisi Kot, ewe soumak kol mi fel a alollo ngeni efoch ira mi uwaoch me manauattam.

¹⁸ Inaamwo ika ekkewe aramas mi ngau ra wouochulo nge, ar menemenoch esap nomofocholo. (Kol Fel 37:16; 73:3, 12) Ra ussun chok ewe mwan pisekisek mi miritingau Jises a kapas ussun lon an kapas monomon lupwen emon a tingor pwe epwe apwungu eu osukosuk ussun eu alemwir. Jises a ereni ekkewe aramas mi auseling: “Oupwe nengeni o tumunukemi seni sokkun mochenian pisek meinisin, pun aramas resap manau ren chommongun pisek.” Jises a menlapei ei lesen ren an aporausa porausen fonuen emon mwan mi pisekisek a fokkun uwaoch. A mochen atomalo an kewe imwen iseis pwe epwe aueta ekkoch mi watte seniir fan iten pisekin kewe mi murinno  meinisin. Iwe mwirin ewe mwan a ekiekin mongo, un, me pwapwaiti manauan. Nge Kot a apasa: “En mi puch! Lepwinei chok upwe angei ngunum. Iwe, ifa usun ekkeei mettoch ka fen ammolata, io epwe nouni?” Jises a menlapei an poraus ren an apasa: “Iwe, epwe iei usun ekkewe aramas mi iseis pisek fan asengesin pwisin ir, nge resap pisekisek ren Kot.”​—Luk 12:13-21.

19, 20. (a) Awewei ewe ras me ifa ussun ra limeti ewe wiich me loom. (b) Met popun ekkewe mi ngau ra ussun chok poon wiich?

¹⁹ Ekkewe mi ingau rese “pisekisek ren Kot.” Ina popun, ussun chok ewe poon wiich, apwolun ekkewe foun wiich mi chachchak, rese nukunuk me pochokkul. Loom, loom, mwirin ewe ras ewe wiich epwe feilo ngeni eu leenien alimelim, eu son a kan ekis tekia. Ikewe ie ekkewe man repwe atekini ira mi chou mei wor fau are mecha mi kken won pwe epwe tatakkiselo wasan ewe wiich me aimufeseni ekkewe foun wiich seni ekkewe poon wiich. Mwirin ena repwe aea efoch sofol me ataropasuueta meinisin lon ewe asapwal. (Aisea 30:24) Ekkewe foun wiich ra turutiu won ppwulun ewe son me ewe asapwal a uweiaalo ekkewe fetil mi pwas le pekin me ekkewe poon wiich ra fitaalo ewe asapwal. (Rut 3:2) Mwirin ra sooki ekkewe foun wiich pwe repwe imu seni ekkewe kukkun fau, piipi me metakan, me repwe tongeni isoni are usi ewe wiich. (Luk 22:31) Nge ese chuen wor ewe poon wiich.

²⁰ Ussun chok ekkewe foun wiich ra turutiu won ewe pwuul ra nommolo nge ewe asapwal a kupetalo ekkewe poon wiich, ekkewe mi pwung repwe nommolo me ekkewe mi ingau repwe morolo. Nge, sia pwapwa pwe ekkena aramas mi ingau repwe morolo tori feilfeilo. Pokiten rese chuen nom, aramas mi pwapwaiti ewe allukun Jiowa repwe kuna feioch watte. Pwungun pwe, lo, lo, lo, aramas mi alleasochis repwe angei an Kot liffangen manau esemuch.​—Mattu 25:34-46; Rom 6:23.

Feioch “Alen Ekkewe Aramas Mi Pung”

21. Ifa ussun Jiowa ‘a fen sinei alen ekkewe aramas mi pung’?

²¹ Ewe aewin kol mi fel a muchulo ren ekkeei kapas: “Ewe SAMOL a fen sinei alen ekkewe aramas mi pung, nge alen ekkewe mi ingau epwe morelo.” (Kol Fel 1:6) Ifa ussun Kot ‘a fen sinei alen ekkewe aramas mi pung’? Iwe, ika sia feffetal won ewe alen pung, sia lukuluk pwe Semach  we won lang a kuna ach alleasochisi an kewe alluk me a etiwakich ussun noun chon angang. Nge sia likiti ngeni Kot ach osukosuk meinisin fan ewe lukuluk pwe a tongeikich.​—Isikiel 34:11; 1 Piter 5:6, 7.

22, 23. Met epwe fis ngeni ekkewe mi ngau me ekkewe mi pwung?

²² “Ewe alen aramas mi pung” epwe nonnom tori feilfeilo, nge ekkewe aramas mi ngau rese mochen siwili lapalaper repwe nninnilo pokiten Jiowa epwe apwunguur. Me ‘aler,’ are lapalapen manauer, epwe muchulo rer. Sia tongeni lukuluk won pwonuetaan an Tafit kewe kapas: “A ekis chok fansoun, o ir ekkewe mi ingau resap chuen nom; inaamo ika ka nengenifichi lon leenier, nge resap chuen chok nom ikewe. Nge ir ekkewe mi mosonoson repwele fonueni ewe fonu, o repwe pwapwaesini chommongun ar pisek. Ekkewe aramas mi pung repwe fonueni ewe fonu, o repwe nonnom lon, feilfeilo chok.”​—Kol Fel 37:10, 11, 29.

²³ Mwa met ren ach pwapwa ika sipwe tufichin manau lon paratis won fonufan lupwen aramas mi ngau rese chuen nonnom! Ekkewe aramas mi mosonoson me pwung repwe pwapwaiti kinamwe mi enlet pokiten repwe pwapwaiti “allukun Jiowa” fansoun meinisin. Iwe nge, mwen ena fansoun, a lamot pwe “alon ewe SAMOL” a pwonueta. (Kol Fel 2:7a) Ewe lesen mwirin epwe alisikich le kuna ifa alon we me ifa ussun epwe weneiti kich me aramas meinisin.

Ifa Ussun Kopwe Polueni?

• Met popun emon mi alleasochisi allukun Kot mi pwapwa?

• Met a pwarata pwe sia pwapwaiti allukun Jiowa?

• Ifa ussun emon epwe ussun chok efoch ira mi fotutiu unukkun chanpupu?

• Ifa ussun emon mi pwung a sokko seni emon mi ngau?

[Ekkewe Kapas Eis fan Iten ewe Lesen]

[Sasing lon pekin taropwe 7]

Iotek epwe tumunukich seni ach chiechi ngeni aramas mi ngau

[Sasing lon pekin taropwe 8]

Met popun emon aramas mi pwung a ussun chok efoch ira?