Om Kewe Iotek Repwe Tongeni Siwili Minne Epwe Fis?

IO leich ese mwo kuna fan eu och osukosuk watte nge esor ach nemenem won? Ewe Paipel a aiti ngenikich pwe ewe aposel Paul a silei pwe iotek epwe tongeni kku mwiriloon ekkena fansoun weires.

Lupwen Paul a kalapus lon Rom nge esor tipisin, a tingorei chienan kewe chon luku pwe repwe iotek fan itan, iwe, a pwal apasa: “Ua fakkun tingormau ngenikemi, pwe oupwe fori iei usun, pwe upwe tongeni muttir liwinsefalou remi.” (Ipru 13:18, 19) Fan eu, Paul a apasaou an achifoua pwe Kot epwe auseling ngeni ekkewe iotek pwe epwe muttir ngaselo. (Filemon 22) Ekiselo chok mwirin, Paul a ngaselo seni fotek me poputasefalli an we angangen misineri.

Nge epwe tufich pwe iotek epwe wesewesen tongeni siwili mwiriloon om kewe osukosuk? Neman. Iwe nge, chechemeni pwe ewe mettoch iotek esap chok eu fofforun lamalam. Ina wesewesen ach kapas ngeni Semach we mi tong me manaman lon lang. Epwe och sipwe titchiki masouen ach kkewe iotek, me sipwe pwal mosonottam le witiwiti ifa ussun Jiowa epwe polueni.

Eni Kot esap pwisin polueni iteiten iotek meinisin, iwe, eni esap pwal polueni lon ewe lapalap are lon chok ewe fansoun sia mochen. Awewe chok, Paul a ikkiotek fan chommong ussun “efoch folun ira lon fitukei.” Kot ese amoielo an Paul we osukosuk, ese lifilifil met ewe, nge a aururu Paul ren ekkeei kapas mi apochokkul: “Ai chen mi ku ngonuk, pun unusochun ai manaman epwe pwarata lon apwangapwang.”​—2 Korint 12:7-9.

Sipwe pwal tongeni luku pwe inaamwo ika Kot esap awesalo ach osukosuk, nge epwe tongeni “forata alen angasa[kich]elo, pwe [sipwe] tongeni pworacho ngeni.” (1 Korint 10:13) Arapakan chok, Kot epwe amoielo an aramas kewe riaffou meinisin. Nge tori ena fansoun, ach sipwe fos ngeni “Ewe mi auseling iotek” epwe tongeni siwili met epwe fis.​—Kol Fel 65:2.