Fan Pwung Kopwe Aucheani Liffangom Na, Liffangen Manauom

“Chchaan ewe Kraist epwe alimelima mwelien letipach seni foffor mi lamot mwaal pwe sipwe tufichin akkapwonueta angang mi fel fan iten ewe Kot mi manau.”​—Ipru 9:14, NW.

1. Ikkefa ekkewe pisekin annet mi affata pwe sia wesewesen aucheaani ewe mettoch manau?

 IKA EMON epwe eisinuk ika ifa ukuukun aucheaan manauom, met kopwe apasa? A mmen watte ach aucheaani ewe mettoch manau​—weween, pwisin manauach me manauen io kkan mwo. A ffat ena pun eli sipwe feilo ren emon tokter ika sipwe samau are fan iten chekin samau. Sia mochen pwe manauach epwe sopwosopwolo me epwe pochokkul inisich. A lap me lein ekkewe mi chinnap are ekkewe mi apwangapwang inisir rese mochen malo, nge ra mochen an epwe sopwosopwolo manauer.

2, 3. (a) An Salomon Fos 23:22 a menlapei menni wiis a nom ren aramas? (b) Ifa ussun Kot a kapachelong lon ewe wiis An Salomon Fos 23:22 a kapas ussun?

² Ukuukun om aucheaani manauom a kan kku om riri ngeni aramas. Ren chok awewe, iei ewe emmwen seni an Kot we Kapas: “Nei, kopwe auselinga alon semom, atewe ka up seni, nge kosap aucheangaua inelapom, lupwen a chinlap.” (An Salomon Fos 23:22) Ena kapas “auselinga” esap wewe ngeni chok ach rongorong kapas; nge ena mwiitun a wewe ngeni ach sipwe rong, iwe mwirin, sipwe alleasochisi. (Ekistos 15:26; Tuteronomi 7:12; 13:18; 15:5; Josua 22:2; Kol Fel 81:13) Me ren an Kot we Kapas, met popun sipwe auseling ngeni semach me inach? Esap pokiten chok semach me inach ra watte are tipachchem senikich. A mak ewe popun, iwe, a apasa pwe ‘ka up seniir.’ A iei ussun afoun ena wokisin lon ekkoch Paipel: “Auseling ngeni semom we, ewe mi ngonuk manau.” Iwe, a ffat pwe ika ka aucheaani manauom, ka meefi pwe a wor wiisom ngeni ewe emon manauom a popu seni.

³ A pwung pwe ika en emon chon Kraist mi enlet, ka miritiiti pwe Jiowa wesewesen Populapen manauom. Ka “manau” pokiten i; iwe, en mi tongeni “mwokutukut,” me foffori chommong mettoch pokiten a wor meefiom me ekiekum; me iei ka “nonnom” me en mi tufichin ekieki ussun are akkota minne kopwe fori lon mwach kkan, nge a pwal kapachelong ewe mettoch manaufochofoch. (Fofor 17:28; Kol Fel 36:9; Än Salomon Afalafal 3:11) Me ren minne a mak lon An Salomon Fos 23:22, a pwung ach sipwe “auselinga” Kot fan alleasochis pokiten ach mochen weweiti me apwonueta an ekiek ussun manau, nge sap minne sia mochen eani pwal och ekiek ussun ewe mettoch manau.

Sufoliiti ewe Mettoch Manau

4. Le poputaan uruwoon aramas, ifa ussun lamoten ewe mettoch sufoliiti manauen aramas a piita?

⁴ Seni le poputaan uruwoon aramas, Jiowa a affata pwe ese mut ngeni aramas ar repwe aea are aeamwaalli ewe mettoch manau ren sokkun popun meinisin ese lifilifil. Pokiten an a kon watte ningeringerin Kein, a asopwalo manauen emon esor tipisin, manauen pwiin we Epel. Om ekiek nge a wor an Kein pwuung le filata ena mettoch ussun manauen emon? Esap ina ussun ekiekin Kot. A iei ussun an apwungu Kein: “Met ka fori? Chan pwium we a koriei seni won pwul.” (Keneses 4:10) Nengeni mwo pwe chchaan Epel we me won ewe ppwul a liosueta manauan, manauan we mi sopwolo fan kawet, iwe, a kokko ngeni Kot fan iten apwung.​—Ipru 12:24.

5. (a) Ifa ewe pinin foffor Kot a foratiu lon fansoun Noa we, me a weneiti ion? (b) Ifa ussun ena pinin foffor eu mettoch mi lamot fan iten pwonutaan an Kot kokkot?

⁵ Mwirin ewe Noter, a poputasefal nonnomun  aramas, nge ir walumon chok. Lon eu kapasen esilesil mi kku aramas meinisin, Kot a pwaralo ekiekin ussun manau me chcha. A apasa pwe aramas repwe tongeni aea futuken man, nge a isetiu won ei pinin: “Oupwe tongeni aea futuken man meinisin mi mwokutukutfeil, nge mi manau. Nge ren iasai mi arauarau, meinisin ua ngenikemi. Futuk fitifengen me manauan chok​—weween, chchaan​—ousap fokkun aea.” (Keneses 9:3, 4, NW) Ekkoch chon Jus ra meefi pwe ena alluk a wewe ngeni pwe aramas resap aea futuken are chchaan emon man mi chuen manau. Nge mwirin och fansoun epwap ffatolo pwe me ikana ie Kot a pinei an aramas aea chcha fan iten ar repwe manau seni. Pwal och, ena alluk Kot a foratiu ren Noa eu mettoch mi fokkun lamot fan iten an epwe pwonuta an we kokkot mi tekia, nge mi longolong won chcha​—weween, eu kokkot mi suuk ngeni aramas ewe alen ar repwe kuna manau esemuch.

6. Ren Noa, ifa ussun Kot a menlapei an ekiek ussun aucheaan ewe mettoch manau?

⁶ Pwal iei alon Kot: “Upwe angei liwinin chchaan manauemi. Seni poun iteiten monumanau upwe angei liwinin; me pwal seni poun aramas, seni poun en me pwiin emon me emon upwe angei liwinin manauen aramas. Iteiten aramas meinisin mi okusu chchaan aramas, ren aramas pwisin chchaan epwe niniilo, pun Kot a fori aramas lon lapalapan we.” (Keneses 9:5, 6, NW) En mi tongeni weweiti seni ena kapasen esilesil ngeni unusen ewe familien aramas pwe me ren ekiekin Kot, chchaan emon aramas a liosueta manauan. Ewe Sou For a ngeni ewe aramas manauan, iwe, esap wor emon epwe angei seni manauan, nge chchaan a liosueta manauan. Ika emon epwe nni manau, ussun Kein, ewe Sou For a wor an pwuung le angei “liwinin,” weween, manauen ewe chon nni manau.

7. Pwata sipwe tipeni ach sipwe silei ussun an Kot we kapasen esilesil ngeni Noa ussun chcha?

⁷ Ren an we kapasen esilesil, Kot a alluku ngeni aramas pwe resap aeamwaalli chcha. Ka fen ekieki fan eu ika met popun a foratiu ena alluk? Iwe, ifa chok ewe popun an a ina ussun ekiekin Kot ussun chcha? Pwungun pwe poluen ena kapas eis a longolong won eu me lein ekkewe afalafal mi fokkun lamot lon ewe Paipel. Ina och chuulapen poraus lon ewe lamalamen Kraist, inaamwo ika chommong lamalam ra kan tunalo. Ifa ena poraus, me ifa ussun a kan kku manauom, minne kopwe wiisen apwungalo, me fofforum kewe?

Ccha​—Ifa Ussun an epwe Pwung Aean?

8. Lon ewe Allukun Moses, ifa an Jiowa alluk ussun aean chcha?

⁸ A lapalo an Jiowa titchiki porausen manau me chcha lupwen a ngeni Israel ewe Allukun Moses. Ren ena foffor, a isetiu pwal och mettoch fan iten an epwe pwonuta an we kokkot. Neman ka silei pwe lon ewe Alluk a wor eu kokkotun kaworen asor ngeni Kot, awewe chok ren asorun uwaan atake, apura, me wain. (Lifitikos 2:1-4; 23:13; Numperis 15:1-5) A pwal kapachelong asorun man. Iei alon Kot ussun asorun man: “Manauen monumanau a nom lon ewe chcha, iwe, pwisin ngang ua fen wata won ewe roong fan asengesimi pwe ami oupwe fori minen omusomusen manauemi, pun ewe chcha, ina ewe minen omusomus ren ewe manau mi nom lon. Ina ewe popun ua fen ereni noun Israel kewe: ‘Esap wor emon leimi epwe aea chcha.’” Jiowa a pwal apasa pwe ika emon aramas, awewe chok ren chon liapeni man are chon atake, epwe awata emon man pwe epwe ochei, epwe ninatiu won ppwul ewe chcha me ireilo. Ei fonufan iei leenien pechen Kot, iwe, ren an ninatiu ewe chcha le ppwul, ewe aramas epwe affata pwe a weweiti nge manauen ewe man a liwiniiti ewe Chon Awora Manau.​—Lifitikos 17:11-13; Aisea 66:1.

9. Lon ewe allukun Moses, ifa ewe eu chok mettoch aramas repwe aea chcha ren, me met popun?

⁹ Sap minne ena alluk och chok pinin lamalam me esor lamotan ngenikich. Ka kuna ewe popun chon Israel resap aea chcha? Iei alon Kot: “Ina ewe popun ua fen ereni noun Israel kewe: ‘Esap wor emon leimi epwe aea chcha.’” Ifa ewe popun? “Pwisin ngang ua fen wata [chcha] won ewe roong fan asengesimi pwe ami oupwe fori minen omusomusen manauemi.” En mi weweiti pwe ena poraus a affata ewe popun Kot a ereni Noa pwe aramas resap aea chcha? Ewe Sou For a apwungalo pwe me ren an ekiek, epwe fokkun lapalap aucheaan chcha, iwe, a pinini fan iten an epwe aea pwe epwe amanaua chommong. Chcha epwe fokkun auchea fan iten pwolupwolun (omusomusen) tipis. Ina minne, fan ewe Alluk, Kot a mutata aean chcha fan iten chok an epwe asor won ewe roong ren omusomusen tipisin manauen chon Israel,  pun chokana ra kutta omusomusen tipis seni Jiowa.

10. Pwata chchaan man ese tongeni unusen omusalo tipisin aramas, nge ekkewe asor fan ewe Allukun Moses a achchema ngeni aramas ussun met?

¹⁰ Ena ekiek ese towau seni ewe lamalamen Kraist. Iei makkeien Paul, emon chon Kraist mi wiiseni wiisen aposel, ussun an Kot na kokkot, ewe mi pwalo lon ewe Allukun Moses: “Pwungun lon ewe Alluk pwe arapakan mettoch meinisin ra limelim ren cha, pwal ina usun tipis a chok tongeni musala ren pupulan cha.” (Ipru 9:22) Paul a affata pwe ekkewe asor rese awilalo chon Israel ngeni aramas mi unusoch, weween, aramas esor tipis. Iei makkeian: “Nge ekewe asor mi fis iteiten ier ra achema ngeni ekewe aramas ar tipis. Pun chaan ekewe atemwanin kow me chaan ekewe kuuch resap fokun tongeni amorala tipis.” (Ipru 10:1-4) Iwe nge, a wor lamoten ekkena asor. Ra achchema ngeni chon Israel pwe ir chon tipis me ra osupwang ren och mettoch an epwe unusen omusalo ar kewe tipis. Nge ika ewe chcha mi liosueta manauen ekkena man ese tongeni unusen pwoluelo tipisin aramas, mei wor och sokkun chcha seni emon mi manau epwe tongeni fori ena mettoch?

Minne ewe Sou Awora Manau a Fori

11. Pwata sia silei pwe asorun chchaan man a liosueta pwal och mettoch?

¹¹ Ewe Allukun Moses a enletin pwarawu och mettoch mi wenewenen tufichin apwonueta letipen Kot. Paul a eis: “Met popun a kawor ewe Alluk?” A polueni: “A foruta pwe epwe pwari tipis, tori warotoon ewe mwirimwir, ewe mi angei ewe pwon; iwe, a titiitiu ren ekkewe chonlang le poun emon chon affor [Moses].” (Kalesia 3:19, NW) A ina chok pwal ussun makkeien Paul ei: “Ewe Alluk nurun chok ekkewe mettoch mi murinno repwe feito, nge esap wesewesen pwungun ekkena mettoch.”​—Ipru 10:1, NW.

12. Ren ewe poraus ussun chcha, ifa ussun sia tongeni weweiti pwapwaaloon an Kot we kokkot?

¹² Iwe, lon ei ukuukun poraus, chechchemeni mwo pwe lon fansoun Noa we, Kot a allukatiu pwe aramas repwe tongeni aea futuken man pwe repwe manau seni, nge resap tongeni aea chcha. Mwirin och fansoun, Kot a apasa pwe “manauen monumanau kana a nom lon ewe chcha.” Ewer, a filata pwe me ren an ekiek, chcha epwe liosueta ewe mettoch manau, iwe, iei alon: “Pwisin ngang ua fen wata [chcha] won ewe roong fan asengesimi pwe ami oupwe fori minen omusomusen manauemi.” Iwe nge, epwap pwapwaalo pwal och poraus mi amwarar, porausen an Kot we kokkot. Ewe Alluk Moses ina nurun ekkewe mettoch mi murinno repwap feito. Ikkefa ekkena mettoch mi murinno?

13. Pwata a lamot maloon Jises we?

¹³ Enletin weween ena poraus a weneiti maloon Jises Kraist. Ka silei pwe Jises a kuna riaffou me a nninniilo won efoch ira. A nninniilo ussun emon chon ipweri alluk. Iei makkeien Paul: “Lupwen kich mi chuen apwangapwang, Kraist a malo fan asengesin aramas mi ngau lon ewe fansoun mi kefilita. . . . Kot a pwari an tong ngenikich pwe lupwen kich mi chuen chon tipis, Kraist a malo fan asengesich. (Rom 5:6, 8, NW) Ren an malo fan asengesich, Kraist a awora eu moon kepich pwe epwe pwoluelo ach kewe tipis. Ena moon kepich chuulapen ewe lamalamen Kraist. (Mattu 20:28; Jon 3:16; 1 Korint 15:3; 1 Timoti 2:6) Ifa ussun ena mettoch a riri ngeni chcha me manau, me ifa ussun manauom a kapachelong?

14, 15. (a) Ifa ussun ekkoch Paipel ra menlapei maloon Jises we lon Efisus 1:7? (b) Neman menni poraus esap ffatolo me ren ititin Efisus 1:7?

¹⁴ Ekkoch lamalam ra menlapei maloon Jises,  iwe, chon ekkena lamalam ra kan apasa pwe “Jises a malo fan asengesich.” Nengeni mwo ititin Efisus 1:7 me ren ekkoch Paipel: “Lon atewe me pwal ren an malo sia tufichin ngaselo, weween, a wor omusomusen ach kewe tipis.” (The American Bible, by Frank Scheil Ballentine, 1902) “Ren maloon Kraist sia ngaselo, me a musulo ach kewe tipis.” (Today’s English Version, 1966) “Sia fen ngaselo lon me pwal ren Kraist me asorun manauan, nge ei ngaselo a wewe ngeni omusomusen ach kewe tipis.” (The New Testament, by William Barclay, 1969) “Ren an Kraist we malo ach kewe tipis ra musulo me sia fen ngaselo.” (The Translator’s New Testament, 1973) Sia kuna pwe ititin ekkena wokisin a menlapei maloon Jises. Eli ekkoch repwe apasa, ‘Nge a enletin lamot maloon Jises. Iwe, ita met ese nom lon ekkena wokisin?’

¹⁵ Mi enlet pwe ika kopwe nounou ekkena chok Paipel, eli kosap weweiti eu poraus mi wenewenen lamot, iwe, eli esap lien unus om weweiti an Paipel poraus. Ese ffat me ren ekkena wokisin pwe a wor eu kapasen Kriik mi wewe ngeni “chcha” lon wesewesen kapasen Efisus 1:7. Ina minne, ititin ena wokisin lon chommong Paipel, awewe chok ren ewe New World Translation, a tipeeu ngeni ewe kapasen le popun: “Ren atewe, mei nom rech ewe minen ngaselo ren ewe moon kepich ren chchaan ena emon, ewer, omusomusen ach kewe tipis, me ren wouun umoumochun.”

16. Ei ititin kapas “chchaan ena emon” epwe affata menni poraus ngenikich?

¹⁶ Ena ititin kapas, “chchaan ena emon,” a mmen lamot weween, iwe, epwe achchema ngenikich chommong mettoch. Esap naf an epwe chok malo emon aramas, pwal mwo nge maloon ewe mwan mi unusoch, Jises, nge a lamot an epwe pwal kapachelong pwal eu mettoch. I a apwonueta minne ewe Allukun Moses a liosueta, akkaewin, lon ewe Ranin Omusomusen Tipis. Lon ena ran mi sokkolo aucheaan, a kawor asorun ekkewe sokkun man mi affatetiu lon ewe Alluk. Iwe mwirin, ewe samol fel lapalap a uwoulong och chchaar lon ewe refiref itan Unusen Pin lon ewe imwen fel mangaku are imwen fel, iwe, me ikewe ie a mwei ngeni Kot, nge a ussun ita a nom mwen mesan.​—Ekistos 25:22; Lifitikos 16:2-19.

17. Ifa ussun Jises a apwonueta minne ewe Ranin Omusomusen Tipis a liosueta?

¹⁷ Jises a apwonueta minne ena Ranin Omusomusen Tipis a liosueta, ussun Paul a awewei. Akkom, a makkei pwe ewe samol fel mi lapalap lon Israel a tolong lon ewe refiref mi Unusen Pin fan eu iteiten ier fan ewe chcha mi asor “fan pusin itan pwal fan iten an ekewe aramas tipis ra fori lon ar chechengau.” (Ipru 9:6, 7) Mwirin an manausefallita emon ngun, Jises a feita lang, nge ena mettoch a enletin tipeeu ngeni minne a liosutiu me lom. Pokiten i emon ngun, weween, ese inisini inisin futuk me chcha, a tongeni pwa “mwen mesen Kot fan asengesich.” Met ewe a mwei ngeni Kot? Esap och mettoch kich mi tongeni attapa, nge och mettoch mi fokkun lamot. Pwal iei makkeien Paul: “Lupwen Kraist a war lon wiisan we, wiisen samol fel lapalap . . . , sap minne a tolong fan chchaan siike me atemwanin kowu, nge fan pwisin chchaan, iwe, fan eu chok a tolong lon ewe leeni mi pin me a angei ewe minen kepichilo esemuch fan asengesich. Pun ika chchaan siike me atemwanin kowu . . . a tongeni epini aramas tori an epwe limochulo futuker, iwe, epwe ifa me watteen chchaan ewe Kraist epwe alimochu mwelien letipach seni foffor mi lamotongau, atewe mi mwei ngeni Kot pwisin i ren eu ngun esemuch, nge esor och tterin, pwe sipwe tufichin foffori angang mi fel ngeni ewe Kot mi manau?” Ewer, Jises a mwei ngeni Kot aucheaan chchaan manauan we.​—Ipru 9:11-14, 24, 28; 10:11-14, NW; 1 Piter 3:18.

18. Pwata alon Paipel ussun chcha a lamot ngeni chon Kraist lon ei fansoun?

 ¹⁸ Ena poraus mi enlet seni Kot a atufichikich pwe sipwe weweiti amwararen minne ewe Paipel a apasa ussun chcha​—weween, ewe popun a ina ussun an Kot ekiek ussun chcha, ewe sokkun ekiek sipwe eani ussun chcha, me ewe popun sipwe sufoliiti minne Kot a pinei ussun aean chcha. Ika sipwe alleani ewe Tesin Kriik mi mak fan iten chon Kraist, sipwe kuna chommong wokisin mi kapas ussun chchaan Kraist. (Pi ena eu refiref.) Ekkena wokisin ra affata pwe emon me emon chon Kraist epwe luku “chchaan [Jises].” (Rom 3:25) Sipwe tufichin kuna omusomusen ach tipis ach kinamwefengen me Kot ren chok “ewe chcha atewe [Jises] a ninatiu.” (Kolose 1:20) Mi fokkun enlet ena ren chokewe Jises a foratiu ngeniir eu atipeeu mi sokkolo aucheaan fan iten ar repwe fiti i le nemenem lon lang. (Luk 22:20, 28-30; 1 Korint 11:25; Ipru 13:20) Mi pwal enlet ena ren ewe “mwich mi lapalap” lon ei fansoun, nge ikkena ir ekkewe repwe kuna manau lupwen epwe war ewe “riaffou mi lapalap,” iwe mwirin, repwe pwapwaesini manau esemuch lon eu paratis won fonufan. Lon kapas awewe, ra ‘sopuni ufer mi langattam ren chaan ewe Lam.’​—Pwarata 7:9, 14.

19, 20. (a) Pwata Kot a filata pwe epwe pinei aean chcha, me epwe fet meefiach ussun ena? (b) Sipwe tipeni ach sipwe silei met?

¹⁹ A ffat pwe me ren ekiekin Kot, a sokkolo aucheaan chcha. Epwe pwal chok ina ussun ekiekich. Ewe Sou For, ewe mi aucheaani ewe mettoch manau, a wor an pwuung le pinei met aramas repwe aea chcha ren. Pokiten a watte an aucheaani manauach, a ekiekin aimulo aean chcha fan iten eu kokkot mi fokkun lamot, nge ina ewe eu chok mettoch epwe atufichi manau esemuch. Ena kokkot a longolong won chchaan Jises we mi auchea. Epwe ifa me watteen ach kilisou pwe Jiowa Kot a fori minne a ochitikich ren an aea chcha​—weween, chchaan Jises we​—lon ena kokkot mi amanaua aramas! Epwe pwal ifa me watteen ach kilisou ngeni Jises ren an eani asor chchaan we fan asengesich! Enlet, sia tongeni weweiti meefien ewe aposel Jon lon makkeian  ei: “Ngeni i mi tongeikich o angasalokich seni ach tipis ren chaan, o a fen forikich pwe eu mu pwal samol-fel ngeni Seman we Kot—ling me manaman epwe nonnom ren i, feilfeilo feilfeilo chok. Amen.”​—Pwarata 1:5, 6.

²⁰ Ren fansoun langattam, ach we Kot, nge pwal i ewe Sou Awora Manau mi unusen tipachchem, a ekiekieta ena kokkotun amanaua aramas. Ina minne, sipwe tongeni eis, ‘Ifa ussun ena mettoch epwe kku minne sipwe wiisen apwungalo me fofforuch kewe?’ Ena eu poraus mwirin ei epwe weneiti poluen ena kapas eis.

Ifa Ussun Kopwe Polueni?

• Met sipwe tongeni kaeo ussun an Kot ekiek ussun chcha seni porausen Epel me Noa?

• Lon ewe Allukun Moses, met Kot a pinei ussun aean chcha, me met popun?

• Ifa ussun Jises a apwonueta minne ewe Ranin Omusomusen Tipis a liosueta?

• Ifa ussun chchaan Jises we epwe tongeni amanauakich?

[Ekkewe Kapas Eis fán Iten ewe Lesen]

[Pwóór lón pekin taropwe 12]

CHCHAAN IO A AMANAUA ARAMAS?

“Oupwe pwisin tumunukemi, pwal ewe mwichen siip meinisin, pun seni lon ewe mwich, ewe Ngun mi Fel a fen seikikemita pwe chon maser, pwe oupwe foleni ewe mwichefel an ewe Samol, ewe a fen pwisin moni ren chaan.”​—Fofor 20:28.

“Iwe, iei sia fen kuna pung ren chaan; iei minne, epwe pwal fakkun amanauakich seni ewe liwinin ingau me ren Kot.”​—Rom 5:9.

“Esor ami apilukuluk allim; ami oua pwal chon lukun Kot won fonufan. Nge iei, lon Kraist Jises, ami kena mi pin touaulo, oua fen arapoto ren chaan Kraist.”​—Efisus 2:12, 13.

“Mi fich ngonuk pwe kopwe angei ewe taropwe o suuki an kewe minen mechen, pun ra niukulo, o fan asengesin Kot ka isetiu chaom pwe penmanauen aramas seni einang meinisin, o sokkun kapas meinisin, o sokkun aramas meinisin, o pwal mu meinisin.”​—Pwarata 5:9.

“Ren Kraist, Kot epwe achasefalli mettoch meinisin ngeni pwisin i, mettochun fonufan are mettochun lang, o epwe akinamwelo mettoch meinisin ren chaan an we irapenges.”​—Kolose 1:19, 20.

“Iwe, pwii kena, pun mi wor ach pworacho le tolong lon ewe leeni mi fel ren chaan Jises.”​—Ipru 10:19.

“Ami ngaselo ese fis ren ekkewe mettoch mi epwe morelo . . . nge a fis ren chaan Kraist mi auchea, usun chok chaan emon siip mi sap limelimengau, o esor an tikitikipwul.”​—1 Piter 1:18, 19.

“Nge are sia fefetal lon saram, usun chok i a nonnom lon saram, iwe, sia chiechifengen lefilach, o chaan Noun we, Jises, a alimelimakich seni sokkun tipis meinisin.”​—1 Jon 1:7.

“Ra fen oturatiu ewe chon tipi ngeni pwich kewe, . . . o ra pworaiti i ren chaan ewe Lam o ren kapasen ar we pwarata.”​—Pwarata 12:10, 11.

[Sasing lón pekin taropwe 10]

Ren ewe Allukun Moses, Kot a affata pwe chcha epwe lamot fan iten ewe kokkotun omusomusen tipis

[Sasing lón pekin taropwe 11]

Amanauen chommong epwe tongeni fis ren chchaan Jises we