Kot a féri inisich nge a waalong lón ewe tufich mi amwarar le pwisin echikara are amói eú kinás. Atun eú inisi mi péchékkúl a pék, tottomurar, are pwang, ewe inis a “poputááni eú kókkót mi mesemesekkis mi tettelitiw pwe epwe echikara eú kinás ese lifilifil ika a watte are kúkkún.” (John Hopkins Medicine) Ewe inis a mwittir féri met epwe tongeni aúkaló kusun ewe chcha, amalúlú ekkewe waa ewe chcha a fetál lón, echikara ewe ia a fis ewe kinás ie, me apéchékkúla futuken ewe inis.

EKIEKI EI: Ika ewe Chón Fératá a féri inisich pwe epwe pwisin echikara eú kinás, esap pwe sia tongeni eáni lúkúlúkú lón an we pwon pwe epwe pwal álisikich le chikar seni kinásen letipach? Ewe soumakken kélfel a makkeei pwe Kot “a apöchöküla ir mi tatakis leluker o filiti kinaser.” (Kölfel 147:3) Nge ika ka nóm fán riáfféú ren minne a fis ngonuk me lóóm are lón ei fansoun, iwe ifa usun ka tongeni lúkúlúkú pwe Jiowa epwe filiti kinásóm kewe lón pekin memmeef iei me lón mwachkkan?

Kot a pwonei: “Kosap niuokus, pun ngang üa etuk, kosap pwal apilüküngau, pun ngang om Kot. Üpwe apöchökülok, üpwe pwal alisuk.” (Aisea 41:10) Emén mi silei pwe Jiowa a tongei, a eáni kinamween ekiek me ewe tufich le likiitú fán ese lifilifil sóssót. Ewe aposel Paulus a eita ngeni ena sókkun kinamwe “än Kot kinamwe mi tekia seni ach tongeni weweiti.” Paulus a pwal erá: “Ngang mi tufich ren mettoch meinisin lon ewe emon mi apochokkulaei.”​—Filipi 4:4-7, 9, 13; TF.

Ekkeei Wokisin ra álisikich le ámááraatá ach lúkú wóón án Jiowa kewe pwon fán iten manawen aramas lón mwachkkan. Áwewe chék, Pwärätä 21:4, 5 a erenikich met Jiowa epwe féri me pwata sia tongeni lúkúlúk wóón i pwe epwe féri:

• “Epwe talüpwasei chönün mas” seni mesen aramas meinisin. Jiowa epwe aúkatiw meinisin ach kewe riáfféú me aúrek, pwal ach kewe lolilen usun itá me ren ekkewe ekkóch pwe ese kon weires.

• “Ewe mi mot won ewe lenien motun king” lón lingéchún láng, ewe King mi Unusen Manaman wóón férian kewe meinisin, epwe anganga an péchékkúl me nemenem le eppeti riáfféún aramas me a awora ngenikich ewe álillis sia osupwangan.

• Jiowa a alúkúlúkú ngenikich pwe an kewe pwon ra “let o allükülük.” Weween pwe án ewe Kot mi enlet apwénúetá an kewe pwon a tongeni kkúú itéchún.

“‘Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.’ Mürin ewe mi mot won ewe lenien motun king a apasa, ‘Nengeni, üpwe asöfösefäli mettoch meinisin.’ A pwal üreniei, ‘Kopwe makkeetiu ekei kapas, pun ra let o allükülük.’”​—Pwärätä 21:4, 5.

Unuselapen láng me fénúfan me ewe Paipel ra pwári napanapen Semach we lón láng. Férien Jiowa kewe ra amwékútúkich le alapaaló ach silei usun i pwe epwe Chiechiach, nge ewe Paipel a etiwakich ren an erá: “Oupwe arap ngeni Kot, iwe, epwe arap ngenikemi.” (James 4:8) Föför 17:27 a erá: “Kot esap wesewesen toau seni eman me eman leich.”

Lupwen ka awora fansoun le silleló Kot, epwe lallapóló óm lúkúlúk pwe ‘a fen tongek.’ (1 Petrus 5:7) Ikkefa ekkewe feiéch kopwe kúna ika kopwe lúkúlúk wóón Jiowa?

Ekieki usun pwóróusen Toru, seni Japan. A mámmááritá ren inan we mi lúkú Kot, nge a poputá le fiti án chón Japan we Mafia itan yakuza. A erá: “Ua lúkú pwe Kot a oputaei, me ua meefi pwe málóón chókkewe ua sissileer, pwal mwo nge chókkewe ua tongeer, ina kapwúngúi.” Toru a pwári pwe an nónnóm ren ekkena sókkun aramas me eáni ar ekiek, a efisi an epwe wiliti emén “ese sile tong, me ese wor an memmeef fán iten ekkewe ekkóch.” Iei met a erá usun met a mochen achocho ngeni, “Ua mochen upwe chék má me lesáráfééi mwirin chék ai nieló emén mi iteféúló seniei pwe upwe itéch.”

 Nge lupwen Toru me pwúlúwan we Hannah ra káé ewe Paipel, Toru a féri watteen siwil lón manawan me ekiekin. Hannah a erá: “Ua pwisin kúna án pwúlúwei we siwili manawan.” Iei, fán lúkúlúk Toru a erá: “A wor emén Kot mi kan tongei emén me emén kich. Ese mochen emén epwe máló, me a tipemecheres le omusaaló chókkewe mi enletin aier seni ar kewe tipis. A aúseling ngeni ekkewe mettóch sise tongeni ereni pwal emén me lúkún chék I, me ekkewe sókkun mettóch ekkewe ekkóch resap tongeni weweiti. Ekiseló chék, Jiowa epwe áwesaaló meinisin osukosuk, riáfféú, me metek. Pwal mwo iei, a álisikich lón ekkewe napanap sise fókkun tepereni. A tongekich me álisikich atun sia letipechou.”​—Kölfel 136:23.

Pwóróusen Toru a áiti ngenikich pwe ach silei pwe Kot a tongeni me ekiseló chék epwele áwesaaló meinisin minne mi ngaw me epwe télúpwásei chénún mesach meinisin, ese chék awora ngenikich eú lúkú mi núk nge a pwal álisikich le eáni eú sókkun manaw mi múrinné iei. Ewer, Sia tongeni kúna feiéch seni án Kot tong lón ei fénúfan mi uren riáfféú.