Jesus a áweweei ifa usun sipwe “silei pwe Mwün Kot a arapoto.” (Lukas 21:31) Ikkeei ekkóch mettóch a oesini usun pwe epwe fis: watteen maun, watteen chechchechin fénú, nafangawen mwéngé, me málapalap. A fiffis ekkena mettóch ikenái.​—Lukas 21:10-17.

Ewe Paipel a pwal affata pwe ngawen féfférún aramas, ina eú me lein ekkewe mettóch repwe chéúló lón “ekewe ränin lesopolan” án aramas nemenem. Ka tongeni kúna me lón 2 Timoty 3:1-5 ekkena mettóch repwe fis. Atun ka kúna ekkeei féffér me napanap ikenái, ese mwáál ka tipeeú pwe án Paipel ei oesini a fókkun taitap ngeni minne a fiffis lón ei fansoun.

Met ei pwóróus a áiti ngenikich? A fókkun arapoto fansoun án Kot we Mwú epwe féri watteen siwil pwe epwe múrinnéló manaw wóón fénúfan. (Lukas 21:36) Lón ewe Paipel, Kot a pwonei ekkewe mettóch mi múrinné fán iten fénúfan me chókkewe repwe manaw wóón. Ikkeei ekkóch me leir.

“[Jesus] a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni. An nemenem epwe nom tori feilfeilachök, esap tongeni wesila, nge mwün esap tongeni tala.”​—TANIEL 7:14.

Iei weween ngonuk: Ka tongeni pwapwaiti manawom fán nemenemen ena Mwú mi echipwér Kot a féri pwe epwe nemeni unusen fénúfan, ewe Néún we epwe wisen King lón.

“Esap wor eman chon ewe fanü epwe apasa pwe a samau.”​—AISEA 33:24.

Iei weween ngonuk: Kosap fókkun chúen semmwen are wor terin inisum. Kopwe manaw me kosap fókkun máló.

“A aükätiu maun won unusen fanüfan.”​—KÖLFEL 46:9.

Iei weween ngonuk: Esap chúen wor maun me meinisin ekkewe riáfféú a efisatá.

“Ekewe aramasangau resap chüen nom. . . . Ekewe chon tipetekison repwe fanüeni ewe fanü.”​—KÖLFEL 37:10, 11.

Iei weween ngonuk: Esap chúen wor aramas mi ngaw, epwe chék chókkewe mi mochen álleasochisi Kot.

“Repwe aüetä imwer o nonom lon, repwe pwal fotuki irän wain o ochei uan.”​—AISEA 65:21, 22.

Iei weween ngonuk: Unusen fénúfan epwe wiliti eú leeni mi lingéch. Kot epwe apwénúetá ach ióteki pwe letipan epwe fis “won fanüfan.”​—Mateus 6:10