Ifa Iten Kot? Kot pwisin a apasa: “Ngang Jiowa. Iei itei we.” (Aisea 42:8, NW) Iten Kot na a pwá ina epwe fán 7,000 lón ewe Paipel. Iwe nge lón chómmóng afféún Paipel ra ekkesiwili ei it ngeni eú itelap, áwewe chék ren “Samol.” Kot a mochen epwe chiechiom, ina minne a peseok óm kopwe “köri itan.”​—Kölfel 105:1.

Itelapen Jiowa. Paipel a néúnéú sókkopaten itelap fán iten Jiowa, áwewe chék ren “Kot,” “Ewe mi Unusen Manaman,” “Chón Fératá,” “Semach,” me “Samol.” Lón chómmóng iótek mi mak lón Paipel, ewe chón eáni a néúnéú eú itelap mi ésúfél fán iten Jiowa.​—Taniel 9:4.

 Napanapen Kot. Kot i emén ngún, sise tongeni kúna. (Johannes 4:24) Ewe Paipel a apasa pwe ese “wor eman aramas a küna Kot.” (Johannes 1:18) Ewe Paipel a áiti ngenikich met a meefi. Aramas ra tongeni ámeteki letipan, are atoto an “pwapwa.”​—Än Salomon Fos 11:20; Kölfel 78:40, 41.

Napanapen Kot Kewe mi Amwarar. Kot ese aapaap ngeni aramas ese lifilifil menni mwú ra feito seni are mi fet nónnómur. (Föför 10:34, 35) I a pwal ‘ümöümöch me kirikiröch, a songomang, a pwal wöün tong me allükülük.’ (Ekistos 34:6, 7) Iwe nge, a wor rúáánú me lein napanapen Kot mi kon kkóló aúchear.

Manaman. Jiowa i ewe “Kot mi Unusen Manaman,” iwe, ese wor kaúkún manamanan le apwénúetá minne a pwonei.​—Keneses 17:1.

Tipachem. Ese wor eú tipachem epwe akkarap ngeni án Kot tipachem. Ina weween án Paipel apasa pwe “i chök ewe eman mi unusen tipachem.”​—Rom 16:27.

Pwúng. Kot a féri minne mi pwúng fansoun meinisin. An féffér a “unusen mürina,” me “esap wor an mwäl.”​—Tuteronomi 32:4.

Tong. Ewe Paipel a apasa pwe “Kot mi tong.” (1 Johannes 4:8, Testament Mi Fö) Esap chék pwe Kot a pwári tong, nge i pwisin tong. Napanapan ei mi múrinné a nemeni mettóch meinisin i a féri, me a álilliséch ngenikich lón chómmóng mettóch.

Án Kot Chiechi Ngeni Aramas. Kot i Semach mi tong lón láng. (Mateus 6:9) Ika sipwe lúkú i, sia tongeni emén chiechian. (Kölfel 25:14) Ren enletin, Kot a etiwok óm kopwe akkarap ngeni i lón iótek me isetá ngeni i óm ‘öürek meinisin, pun i a ekieki met kopwe feiöch ren.’—1 Petrus 5:7; James 4:8.

Jesus Esap I Kot. A kkóló aúchean Jesus, i chék ewe emén Kot pwisin a fératá. Ina popun, Paipel a apasa pwe i Néún Kot. (Johannes 1:14) Mwirin án Jiowa fératá Jesus, i a néúnéú néún na mwánichi usun emén “sousile angang” le féri mettóch meinisin me pwal aramas me chónláng meinisin.​—Än Salomon Fos 8:30, 31; Kolose 1:15, 16.

 Esap fán eú án Jesus Kraist apasa pwe i Kot. Nge a fen apasa: “Ngang üa feito seni [Kot], i a tinieito.” (Johannes 7:29) Lupwen Jesus a fós ngeni emén lein néún kewe chón káé, i a erá pwe Jiowa i ‘Semei pwal Sememi’ me ‘ai Kot pwal ämi Kot.’ (Johannes 20:17) Mwirin án Jesus máló, Jiowa a amanawatá i an epwe manaw lón láng, onómu i lepeliefichin, me ngeni watteen nemenem.​—Mateus 28:18; Föför 2:32, 33.

Jesus Kraist A Tongeni Álisuk Óm Kopwe Arap Ngeni Kot

Jesus a feito fénúfan pwe epwe asukulakich usun Seman we. Iei met Jiowa a apasa usun Jesus. “Iei i nei mi achengicheng, oupwe aüselinga.” (Markus 9:7) Jesus a kon sileifichi Kot lap seni aramas meinisin. I a apasa: “Esap pwal wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.”​—Lukas 10:22.

Jesus a unusen áppirúfichi napanapen Kot kewe. Ina ewe popun a tongeni apasa: “Iö a künaei, a küna Semei.” (Johannes 14:9) Jesus a álisi aramas ar repwe akkarap ngeni Kot ren an áppirú án Seman we tong lón an kapas me féffér. A apasa: “Ngang ewe al me ewe let me ewe manau. Esap wor eman epwe tongeni feila ren Semei me lüki.” (Johannes 14:6) A pwal apasa: “Aramas repwe fel ngeni ewe Sam lon manamanen ewe Ngünün Kot me ewe let, pun ewe Sam a kütta chokewe mi fel ngeni lon let.” (Johannes 4:23) Anchangei ena! Jiowa a kúkkútta aramas usun chék en, ámi ekkewe mi mochen silei ewe enlet usun i.