“Lifang mi mürina meinisin me feiöch mi unusöch meinisin ra feitiu seni läng, ra feitiu seni ewe Sam mi föri ekewe Saram lon läng.” (James 1:17) Ei wokisin a áweweei pwe Semach we lón láng, Jiowa Kot, a kisáseú. Nge mei wor eú me lein ekkewe chómmóng liffang Kot a ngeni aramas mi lapalap seniir meinisin. Ifa? Alon Jesus ei mi iteféúló lón Johannes 3:16 a pwári ngenikich, a erá: “Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.”

Án Kot liffang Néún we áláemén, ina wesewesen ewe liffang mi fókkun múrinné emén me emén leich a tongeni angei, iwe ren ena sia tongeni ngaseló seni ewe fétekin tipis, chinnap, me máló. (Kölfel 51:5; Johannes 8:34) Ikaamwo sia fókkun achocho wóón pwisin ach, nge ese wor met sia tongeni féri pwe sipwe ngaseló seni ena fétek. Iwe nge, lón án Kot tong mi lap a awora minne a lamot pwe epwe efisi ena ngaseló. Ren an fangóló Néún we áláemén, Jesus Kraist, pwe epwe ewe méén kepich, Jiowa Kot a ngeni aramas mi álleasochis ewe ápilúkúlúkún manaw esemuch. Nge met wesewesen weween ewe méén kepich? Pwata a lamot? Me ifa usun sipwe tongeni feiéch seni?

Ewe méén kepich ina eú liiwin a kamétiw pwe epwe méénisefáli och mettóch a péútúló are epwe epichaaló ewe féfé. Ewe Paipel a áweweei pwe atun popuch kewe, Atam me Efa, ra fférútá ese wor tipisiir me a nóm rer ewe ápilúkúlúkún pwapwaiti manaw esemuch lón paratis wóón fénúfan pachelong mwirimwiriir kewe repwe oupwatiw. (Keneses 1:26-28) Nge a alólilen pwe a péút seniir meinisin ekkena mettóch pún ra filatá le álleasolapa Kot me wiliti chón tipis. Met mwirilóón? Ewe Paipel a pélúweni: “Ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Atam ese fen ngeni mwirimwirin kewe manaw mi unuséch, nge a fen ngeniir tipis me liwinin we máló.

Minne ewe méén kepich epwe ménatiw epwe chék léllé ngeni minne a fen péútúló. Atun Atam a filatá le álleasolapa Kot, a tipis me sópwólóón a péút seni manawan we mi unuséch. Me ren Paipel, ina met a eselipa ngeni mwirimwirin Atam kewe ar repwe wiliti slave ngeni tipis me máló. Ina popun a lamot manawen pwal emén aramas mi unuséch, weween manawen Jesus we, ewe epwe eáni asor pwe epwe tongeni epichaaló ewe fétek. (Rom 5:19; Efisos 1:7) A chék fis ena pokiten án Kot tong le awora ewe méén kepich pwe aramas repwe pwapwaesini ewe ápilúkúlúk a fen péút seni Atam me Efa, ina ewe manaw esemuch lón paratis wóón fénúfan.​—Pwärätä 21:3-5.

Minne ewe méén kepich a fen apwénúetá, a anúkúnúkú pwe án Kot na liffang, ewe mi atufichi an epwe wor manaw esemuch, ina ewe liffang mi kon múrinné seni meinisin. Ren ach sipwe aúcheani ena liffang mi “unusöch,” sipwe ppii ifa usun a kon luló lón an apwénúetá ekkewe kapasen emmwen lón ewe lesen mwen ei.

Ámenemenéchú ach mochen. Pwisin napanapach aramas, ach sipwe fókkun mochen manaw.  (Än Salomon Afalafal 3:11) Ikaamwo sise tufichin pwisin ámenemenéchú ach kewe mochen, nge ewe méén kepich a atufichikich le féri ena. Ewe Paipel a apasa: “Pun liwinin tipis mäla, nge än Kot lifang manau esemüch lon Kraist Jesus ach Samol.”​—Rom 6:23.

Ataweei ach osupwang. Aramas rese tongeni awora ewe méén kepich. Paipel a áweweei: “Pun liwinin manauen eman aramas a men mömong. Esap fokun naf an epwe möni manauan.” (Kölfel 49:8) Ina popun kich sia fókkun osupwangen án Kot álillis ren ach sipwe ngaseló seni fétekin tipis me máló. Iwe ren ewe méén kepich Jesus Kraist a eáni, Kot a awora met ewe sia wesewesen osupwangan.​—Rom 3:23, 24.

Mi pwúng ewe fansoun. Ewe Paipel a erenikich pwe “lupwen sia chüen nonom lon tipis, Kraist a mäla fänäsengesich.” (Rom 5:8) Pokiten a kawor ewe méén kepich “lupwen sia chüen nonom lon tipis,” a ánneta úkúkún watteen án Kot tong ngenikich inaamwo ika sia chúen nóm lón tipis. A efisi ngenikich ach sipwe chék nenneló mwach, inaamwo ika a wewe ngeni ach sipwe likiitú fán pwúnúngawen tipis.

A pwáraaló eú letip mi múrinné me pennúkú pwisin mochenin. Paipel a affata met a amwékútú Kot le fangóló Néún we pwe epwe eú méén kepich, a erá: “Kot a pwäri an echenikich ren an tinato Nöün Aleman lon fanüfan, pwe kich sipwe manau ren. Iei wewen chen: Esap pwe kich sia echeni Kot, nge i a echenikich.”​—1 Johannes 4:9, 10.

Ifa usun kopwe pwári pwe ka aúcheani ena liffang mi kon múrinné seni meinisin? Kopwe chemeni alon Jesus we lón Johannes 3:16, ewe a affata pwe chókkewe chék mi “lükü” i repwe kúna manaw. Me ren ewe Paipel, lúkú, a “alletätä ekewe mettoch sia apilüküni.” (Ipru 11:1) Ren an epwe nóm rech ena minen anúkúnúk, a lamot sile mi enlet. Ren ei popun, sia peseok kopwe awora fansoun le káé usun Jiowa Kot, ewe Chón Fangoto ei liffang mi “unusöch,” me ppii met mi lamot kopwe féri pwe kopwe tongeni pwapwaiti ewe manaw esemuch án Jesus we méén kepich a atufichi fán itom.

Ka tongeni káé meinisin ekkeei mettóch ren óm etittina ekkewe pwóróus lón ewe Paipel mi kawor online wóón www.jw.org. Chón Pwáraatá Jiowa ra pwapwa ar repwe álisuk. Sia lúkúlúk pwe atun ka káé usun ei liffang mi lapalap me feiéch seni, kopwe chúng me erá: “Kilisou ngeni Kot a angasaei ren ach Samol Jesus Kraist!”​—Rom 7:25.